US se droogte-reaksieplan werp vrugte af

Die Universiteit Stellenbosch(US) doen sy deel om aan die ernstige waterbeperkings te voldoen en het sy waterverbruik suksesvol met 45% verminder.

Die US kon hierdie betekenisvolle besparing bewerkstellig deur ’n wye reeks innoverende waterbesparingsintervensies te implementeer en deur mense se gedrag en waterverbruikpatrone te verander met openbare inligtingsveldtogte. Die intervensies word uiteengesit in die US-droogte-reaksieplan – ’n omvattende dokument wat die US riglyne gee hoe om die watertekort die hoof te bied. Dit sal die US se volhoubaarheid verseker as die krane in die Wes-Kaap opdroog. Die plan is in 2017 opgestel onder leiding van die Hoofdirekteur van Fasiliteitsbestuur, Nicolette van den Eijkel, en die onderskeie intervensies is met die steun van die Droogte-reaksiegebeurlikheidswerkgroep bekend gestel.

John de Wet, Bestuurder van Omgewingsvolhoubaarheid by die US, sê hulle is tevrede met die intervensies se sukses en met die steun wat hulle van die kampusgemeenskap kry. De Wet sê hul aanvanklike strategie was ŉ reeks kitsoplossings waartydens die US die ‘Oorlog teen Lekkasies’-projek van stapel gestuur het. Tydens die projek is ’n permanente span saamgestel wat lekkasies op al die US-kampusse identifiseer en herstel. Die vervanging van ou toiletspoelbakke met waterslimspoelbakke het deel van die projek uitgemaak. Die aanbring van Flush Buddy-sakke in spoelbakke het die hoeveelheid water wat per spoel gebruik word, drasties verminder.

Die implementering van grootmaatgryswaterstelsels by koshuise het in ’n groot mate tot die Universiteit se waterbesparings bygedra, terwyl die installering van doeltreffende toerusting in kombuise en koshuise gesorg het vir besparings van tot tussen 20 en 30% in die verbruik van drinkbare water. Die US het ses bestaande boorgate oopgemaak en vernuwe; elkeen is vir ’n spesifieke doel toegewys. Watermeters wat De Wet en sy span van akkurate waterlesings in 15-minuutintervalle voorsien, is by geboue op die Stellenbosch-kampus geïnstalleer.

Al is Dag Zero vir eers uitgestel, sê De Wet dat die Universiteit voortgaan om waterbesparingsinisiatiewe te implementeer en dat die US se vraag na drinkbare water na verwagting met 63% kan afneem. Drie groot projekte gaan hierdie jaar aangepak word. Dit sluit in die bou van ’n toiletgryswaterstelsel waar gryswater van koshuise deur ’n enkel sentrale suiweringskema op die Stellenbosch-kampus gaan beweeg en weer terug na die koshuise en administratiewe geboue herlei gaan word vir die spoel van toilette. ’n Splinternuwe suiweringsaanleg wat met omgekeerde osmose werk, gaan by die Bellville Park-kampus opgerig word en die Tygerberg-kampus sal ’n boorgatveld met vyf boorgate kry.

“Ons omgewingsvolhoubare visie vir die US is dat die Universiteit teen 2030 getransformeer moet wees en op die groenste volhoubare manier moet funksioneer met die verskaffing van infrastruktuur en stelsels, asook in daaglikse bedrywighede. Dit sal minimale impak op die omgewing en op die hulpbronne wat nodig is tot gevolg hê,” sê De Wet.

So lyk die US se waterintervensies:

Verandering van stortkoppe en vermindering van druk in krane;
Gevulde sakke word in toiletbakke geplaas om een liter water per spoel te bespaar;
Sewe boorgate is op die Stellenbosch-kampus geboor as addisionele bronne van water;
Slegs boorgatwater word gebruik vir swembaddens en kunsmatige hokkievelde;
Krieketplekke word net met boorgatwater en uit die dam natgemaak;
Slegs die Craven A-veld word uit die dam gehit om te verseker dat die US die bestaande ooreenkoms vir die FNB Varsitybeker eer. Die spelers oefen daar en, indien so droog, breek die grasblare af en die sandveld kan maklik ontwikkel. Die ander sportvelde word nie meer natgemaak nie.
Die Lentelusvelde is besproei totdat die grasperke gestig is, maar water is nie meer noodsaaklik nie.
Die Universiteit se tuine is sedert November 2017 nie natgemaak nie. Boorgate word op strategiese plekke gebruik om ou historiese tuine soos by die Wallenberg-sentrum en elders op die kampus in stand te hou.
Eendrag en Simonsberg koshuise het reeds gryswaterstelsels om stortwater te suiwer om die tuine te besproei. Soortgelyke stelsels is ook op die Tygerberg-kampus geïnstalleer.
Die swembad by Tygerberg word as reservoir gebruik. Indien dit nodig word, kan water vanaf die steengroef op die Bellvillepark-kampus na Tygerberg vervoer word.
Die US ontvang behandelde rioolwater van Stellenbosch Munisipaliteit om sekere bome te besproei
Die US het twee damme - Ertjieskloof en Welgevallen - met 'n kwota om die water in die somer vir besproeiing te gebruik. Hierdie water is gereserveer vir die Craven A-veld, die krieketveld en die sentrale deel van die atletiekbaan.

Wat behels die droogte-reaksieplan van die US:

Die plan is gebaseer op drie vertrekpunte: verminderde watergebruik deur mense se gedrag te verander en ander intervensies; die hergebruik van gryswater; en om alternatiewe waterbronne te vind.

100 #Waterslim idees

Personeel word ook aangemoedig om hul waterbesparende pogings voort te sit. Om te help het die Korporatiewe Kommunikasie Departement 'n reeks plakkate ontwerp wat sal dien as 'n herinnering om water spaarsamig te gebruik terwyl u by die kantoor is.

U kan die plakkate hier aflaai.

Wat kan jy nou nog doen?

Stort so kort as moontlik – nie langer as twee minute nie – en vang die stortwater in 'n emmer op.
Gebruik 'n prop in die wasbak wanneer jy hande was, tande borsel of skeer. Moenie water net laat wegloop nie.
Spoel toilette met stortwater.
'n Toilet hoef nie na elke gebruik gespoel te word nie.
Stel 'n voorbeeld en inspireer ander om minder water te gebruik.
Hoewel die US nie gedurende die reses van 30 Maart tot 8 April sal sluit nie, word studente aangemoedig om in dié tyd huis toe te gaan. Dit sal help om waterverbruik in Stellenbosch te verminder.
Hoewel wateronderbrekings nie in hierdie stadium voorsien word nie, word personeel en studente aangeraai om 5 liter water beskikbaar te hê om ongerief te voorkom.