Beste
Kollega
Die Fakulteit Geneeskunde en Gesondheidswetenskappe (FGGW) van die Universiteit
Stellenbosch (US) keur die kwaadwillige, kwetsende en rassistiese gedrag wat op
Sondag 15 Mei 2022 in ʼn selfoonvideo vasgelê is in die Huis Marais-koshuis op
die Stellenbosch-kampus ten sterkste af.
Alhoewel hierdie spesifieke voorval nie op ons kampus plaasgevind het nie, wil
ons as fakulteit benadruk dat ons rassisme en geweld veroordeel en geen
diskriminasie, viktimisering of boelie-gedrag (insluitend ontgroening) op ons
kampusse duld nie. Ons staan saam met die Tygerberg Studenteraad (TSR) in
solidariteit met ons studente en personeel teen sulke gedrag by ons instansie.
Ons is bewus van die omvattende ondersoek wat so gou moontlik die uitkoms van
hierdie saak sal bepaal, en ons doen ʼn beroep dat geregtigheid so gou moontlik
moet geskied.
Ons is verbind daartoe om ʼn verwelkomende, inklusiewe en transformerende
omgewing in lyn met ons waardes te skep en te koester. Ons moedig personeel en
studente ten sterkste aan om voort te gaan om ons te help deur enige
diskriminerende gedrag binne hulle omgewings aan te meld met behulp van die
beskikbare meganismes. Sulke gevalle sal streng en beslissend hanteer word.
Studente en personeel by die FGGW kan gevalle van diskriminasie of teistering
by die US se Eenheid vir Gelykwaardigheid aanmeld deur hier
te kliek of ’n e-pos te stuur aan unfair@sun.ac.za.
In krisisgevalle na-ure (tussen 16h00 en 08h00) kan die ER24 nooddienste
geskakel word op 082 557 0880.
Vriendelike groete
Prof Elmi Muller
Dekaan
