Dr Ndivhuwo Mureni, ’n oud-leerder van LTT Murunwa
Privaatskool in Louis Trichardt, moes meer as een hindernis oorkom voordat sy haar
PhD in biochemie by die Universiteit Stellenbosch op Donderdag 16 Maart 2017
verwerf het.
“Ndo livhuwa mma na baba (‘Dankie ma en pa’). Ek is
so dankbaar vir jul liefde en ondersteuning deur al die jare,” was haar
boodskap aan haar familie wat meer as 1800 kilometers ver gereis het vanaf die
plattelandse gehuggie, Ha-Maelula, sowat 30 kilometer duskant Louis Trichardt,
om haar gradeplegtigheid by te woon.
Dit het Ndivhuwo ’n baie moeilike twaalf jaar geneem
om hierdie mylpaal te bereik. Behalwe vir die aanvanklike aanpassing vanaf die
platteland en om in ‘n derde taal te studeer, was sy boonop gedurende die
laaste jaar van haar MSc studies die slagoffer van ‘n tref-en-trap ongeluk.
“Dit was regtig moeilik om te aanvaar dat iemand my
vir dood langs die pad gelos het,” sê sy. Daarmee saam moes sy ook die dood van beide haar oumas
én 'n broer binne twee jaar verwerk.
Maar haar deursettingsvermoë
om haar studies te voltooi word duidelik as sy vertel hoekom sy uiteindelik op
biochemie as vakrigting besluit het: “As voorgraadse student het ek die meeste
met biochemie gesukkel. Gevolglik het ek baie meer daarop begin fokus en dit
het daartoe gelei dat ek dit beter begin verstaan het en uiteindelik vir ‘n BSc
Honneursgraad in biochemie toegelaat is.”
Haar studieleier, prof.
Erick Strauss, en medestudente soos dr. Lizbé Koekemoer en dr. Ilse Rootman-le
Grange, het haar toe aangemoedig om met ‘n MSc en PhD voort te gaan.
Prof. Straus het vandag net
lof vir hierdie student wat vyf jaar geneem het om haar BSc-graad klaar te
maak, maar haar PhD tesis in net vier jaar voltooi het!
Hy sê die eksterne eksaminators
het haar PhD tesis as “’n belangrike en oorspronklike bydrae tot wetenskaplike
kennis” beskryf, en dat sy “diepgaande wetenskaplike kennis” van die onderwerp
getoon het.
Ndivhuwo se droom is om meer
vroue aan te moedig om ‘n loopbaan in die natuurwetenskappe te volg: “Ek hou
baie van navorsing, veral om middels te ondersoek wat teen malaria en ander infeksies
gebruik kan word. Ek geniet dit om te probeer verstaan hoe verskillende
patogene die liggaam affekteer en hoe die immuunstelsel daarteen veg. My
navorsing in biochemie laat my toe om te doen waarvan ek regtig hou."
Sy sit tans haar navorsing
voort as ’n nadoktorale genoot in die US se Departement Chemie en
Polimeerwetenskap.
Ndivhuwo is veral dankbaar
teenoor haar man, Nnditsheni Tshililo, en haar jonger susters Mulalo en Mulavhelesi,
asook haar twee broers, Maanda en Magidi. Sy meld ook haar hoërskool wiskunde
onderwyser, mnr. Mudau, en die US se Prof. Marina Rautenbach wie haar
gemotiveer het toe sy nog as ‘n voorgraadse student gesukkel het om die mas op
te kom.
Haar raad vir leerders en
ander voorgraadse studente wat soortgelyke uitdagings in die gesig staar?
“Droom, maar wees geduldig,
maak nie saak hoe moeilik of onmoontlik die lewe blyk te wees nie. Konsentreer
op jou studies. Daar is baie dinge wat jou aandag kan aflei maar dit is van
kortstondige waarde. Dit neem langer om ’n droom te verwesenlik, maar dit is
beslis die moeite werd.”
Ndivhuwo is nie die eerste
lid van dié familie om ‘n graad aan die US te verwerf nie. Haar oom, prof.
Philip Kutame, het in 2004 sy B.Phil graad verwerf.
Op die foto: Hierdie Venda familie het 1800 kilometer ver gereis
om by te wees wanneer hul geliefde, Dr Ndivuwho Muneri (nou Tshililo), haar
doktorsgraad in biochemie van die Universiteit Stellenbosch verwerf. Weerskante
van haar staan haar ouers, Sylvia en Thomas Muneri, en langs hom is haar skoonsuster, mev. Khumbudzo Muneri. Agter is haar oom en US
alumnus prof. Philip Kutame, haar man, mnr. Nnditsheni Tshililo, en haar broer,
mnr. Maanda Muneri. Foto: Stefan Els