In die gees
van Wêreldtuberkulosedag op 24 Maart het lede van die Fakulteit
Geneeskunde en Gesondheidswetenskappe (FGGW) ʼn paar uitreikingsiniatiewe
aangebied om TB-bewustheid onder personeel, studente en die breër gemeenskap te skep.
Sowat 500 leerders
uit die Worcester-gemeenskap kon verlede week die interaktiewe uitstalling “TB
in die kollig” geniet wat deur TB-navorsers van die Fakulteit aangebied is.
“Hierdie projek het ten doel om bewustheid oor TB onder leerders te skep, hulle
oor TB te onderrig en die stigma rondom TB te help afbreek,” aldus dr. Michael
Whitfield, ʼn navorser verbonde aan die DWT/NNS-sentrum vir Uitnemendheid
van Biomediese Tuberkulosenavorsing en die Suid-Afrikaanse Mediese
Navorsingsraad se Sentrum vir Tuberkulosenavorsing, wat by die FGGW se Afdeling
Molekulêre Biologie en Menslike Genetika gehuisves word.
“TB is ʼn reuseprobleem
in Suid-Afrika en dis hoekom dit so belangrik is om die jeug op te voed, sodat
hulle na hul gemeenskappe kan teruggaan en hul vriende en gesinne kan vertel
wat hulle geleer het. Ons hoop ook om hulle in die proses opgewonde oor die wetenskap
te maak!” sê Whitfield.
Leerders van
etlike plaaslike skole is na die uitstalling aangery, wat by die
Ukwanda-sentrum vir Landelike Gesondheid van die Universiteit Stellenbosch se
Worcester-kampus aangebied is. Die uitstalling het uit vier stasies bestaan,
waar leerders met rekwisiete, speletjies en animasies kon interreageer. Dit het
hulle meer geleer oor (1) die tekens en simptome van TB; (2) TB-diagnose; (3)
pasiëntbehandeling en -uitkomste; en (4) TB-wetenskap/navorsing.
“Die idee is
om dit so prettig, kreatief en interaktief moontik vir die leerders te maak
sodat hulle opgewonde oor die onderwerp raak en meer oor TB leer,” het
Whitfield gesê. Die uitstalling is in samewerking met die Suid-Afrikaanse
TB-entstofinisiatief (SATVI) en die Departement Antropologie aan die
Universiteit van Kaapstad onderneem, asook met die Wes-Kaapse Departemente van Gesondheid
en Onderwys.
Soortgelyke
uitreikaksies sal in April in Robertson en Stellenbosch gehou word.
Die FGGW se Eenheid
vir Kliniese Navorsing oor Molekulêre Biologie het ook aan die vooraand
van TB-dag ʼn TB-bewustheidsprogram in die Elsiesrivier- en Adriaanse-gemeenskappe
aangebied. ʼn Motiveringspreker, dramasessie, vraag-en-antwoordsessie,
speletjies vir kinders en middagete het deel van die program uitgemaak. Gratis
TB-toetse is ook vir gemeenskapslede aangebied.
Die Desmond
Tutu TB-sentrum (DTTC) het ʼn etenstyd-seminaar vir studente en personeel van
die FGGW aangebied, waar die kollig op die groot TB-las, die hoë risiko van TB-infeksie onder gesondheidswerkers en nuwe
ontwikkelinge in pediatriese TB in die kollig was.
“Wie sorg
vir die sorggewers? Ek en jy wat by gesondheidsorg betrokke is, is passievol
oor die lewering van sorg van ʼn hoë gehalte en die voorkoming van TB.
Ons dink nie veel aan ons eie gesondheid en die risiko wat gesondheidswerkers
daagliks in die gesig staar nie,” het dr. Angela Dramowski van die Departement Pediatrie
en Kindergesondheid gesê. Sy is ʼn kenner op die gebied van
infeksiebeheer en -voorkoming en het self TB oorleef.
“Om seker te
maak dat goeie TB-infeksievoorkoming in plek is, of jy nou by ʼn kliniek,
hospitaal of navorsingsentrum werk, is standaardpraktyk en net so belangrik
soos enige ander werk wat ons doen,” het sy gesondheidswetenskappestudente,
gesondheidswerkers en ander mediese praktisyns meegedeel wat die gedenking van
Wêreld-TB-dag by die Tygerberg-kampus bygewoon het.