Iemand
het een keer gesê om universiteit toe te gaan is ‘n bietjie soos om “die heelal
te betree”. Alles is verwarrend en enorm. Dis hoekom die personeel en huidige
studente van die Universiteit Stellenbosch (US) se Fakulteit Geneeskunde en Gesondheidswetenskappe
(FGGW) baie moeite gedoen het om die “kompleksiteite” wat dikwels met sy
aanbieding gepaard gaan, tydens sy Ope Dag op 24 Februarie 2018 op te klaar.
Die
Fakulteit – een van tien van die US – bied die volgende programme aan: MB,ChB; B
in Arbeidsterapie; B in Spraak-, Taal- en Gehoorterapie; BSc in Dieetkunde, en
BSc in Fisioterapie. Die Fakulteit hoop ook om van 2019 af ‘n B in
Verpleegkunde en Verloskunde aan te bied, afhangende van finale akkreditasie
van die program deur die Suid-Afrikaanse Verpleegraad (SANC)
Sowat 3000 leerders van so ver as Gauteng af het aan die dag
se aktiwiteite by die Fakulteit se Tygerberg-kampus deelgeneem, waar huidige
studente ook ‘n projek onderneem het om kragtige stellings oor hul gekose
studieveld by die Fakulteit te maak en ten toon te stel. Me Farah Fredericks, Adjunkregistrateur
en Hoof van die Sentrum vir Studente-administrasie (Tygerberg), het gesê: “Ons
huidige studente is ons ware ambassadeurs en hulle was wonderlik. Nie net het
voornemende studente ‘n voorsmaak gekry van hoe dit sal wees om hier te studeer
nie, maar hulle kon ook met mense met eerstehandse werkervaring van die Fakulteit
se studievelde praat. Die beroepe waarin ons studente oplei kan as lewensreise
beskou word, wat bydra tot ons algehele visie om gesondheid en gelykheid vir
alle Suid-Afrikaners te bevorder. Dit was wonderlik om die interaksie tussen
ons toekomstige TygerMaties en die FGGW-studente en -personeel te beleef.”
Vornemende
studente, tesame met hul onderwysers en ouers, het ‘n lewendige belangstelling
in kampustoere en demonstrasies getoon. Die program het leerders, hul ouers en
onderwysers die geleentheid gebied om uit te vind presies watter programme by
die FGGW beskikbaar is, die keuringsproses, beurse, huisvesting, asook ‘n
algemene indruk van die studentelewe op die Tygerberg-kampus. Verteenwoordigers
van die Ukwanda-sentrum vir Landelike Gesondheid en die Sunloc-eenheid, wat die
logistiek van die Fakulteit se uitgebreide kliniese platform in die Wes-Kaap en
dele van die Oos- en Noord-Kaap koördineer, het ook ‘n belangrike
teenwoordigheid op de dag gehandhaaf.
Onderskrif: Huidige studente by die Universiteit Stellenbosch se Fakulteit Geneeskunde en Gesondheidswetenskappe maak kragtige stellings oor hul gekose studieveld.