Dr Sean Chetty, adjunkhoof van die
Departement van Anestesiologie en Kritieke Sorg by die Universiteit Stellenbosch,
is onlangs verkies tot vise-president van die Pynvereniging van Suid-Afrika,
oftewel PynSA. Volgens die vereniging se grondwet, beteken dit dat Chetty die
presidentskap van die vereniging vir ’n tydperk van drie jaar tot 2020 sal
behartig – die eerste keer dat dié
eer ’n personeellid van US toekom.
Chetty is reeds sedert 2009 ’n
bestuurskomiteelid van PynSA, en dien sedert 2012 as die vereniging se
tesourier. In sy rol as visie-president, sal hy die huidige president, prof
Romy Parker, ondersteun. Hy sal ook daarop konsentreer om institusionele
kapasiteit en strategiese vennootskappe uit te brei.
“Die aanstelling gee erkenning aan al die
werk wat ek oor baie jare gedoen het om pynkennis en die behoorklik bestuur van
pasiënte in Suid-Afrika te bevorder,” sê Chetty. “Dit was nog altyd my passie.
Hoewel ek dit nooit vir persoonlike gewin gedoen het nie, is dit tog lekker om
te weet dat my insette erken en waardeer word.”
Tydens sy term as
president wil Chetty daarop fokus om opvoeding en opleiding in pynbestuur te
ontwikkel. “Ek wil spesifiek plaaslike Suid-Afrikaanse navorsing aanmoedig. Ek
wil ook graag sien hoe ons meer geïntegreerde, multi-dissiplinêre pynnavorsing,
wat basiese wetenskapnavorsing en kliniese praktyk kombineer, doen.”
Die narkotiseur wil ook
graag verseker dat die pynbestuur-subspesialiteit deur die Raad van
Gesondheidsberoepe van Suid-Afrika goedgekeur word vóór hy sy term in 2023
voltooi. “Ek hoop verder dat Suid-Afrika in 2022
die Wêreld-pynkongres sal kan huisves. Die bod word in 2018 toegestaan.”
Chetty se aanstelling sluit uitstekend aan by die Fakulteit Geneeskunde en
Gesondheidswetenskappe se
plan om nagraadse opleidingsprogramme in die behandeling en bestuur van pyn te
ontwikkel. Sy aanstelling as visie-president, en uiteindelik president, van
PynSA sal ook die fakulteit se kundigheid in die bestuur van pyn ten toon stel.
“Dít sal weer die universiteit help om meer met ander internasionale
universiteite te skakel.”
Die veld is besig om op die oomblik vinnig te
verander, wat intensiewe samewerking tussen die verskillende
gesondheidsorgdissiplines vereis. “Samewerking is belangrik in terme van
pasiëntsorg en die ontwikkeling van navorsing in die veld,” sê Chetty.
Danksy die werk wat tans deur hierdie pynkenner
en ander personeellede gedoen word, lyk dit of die fakulteit binnekort ’n leier
op die gebied van pynnavorsing en -opvoeding sal wees.
Chetty sluit af: “Nou moet ons net die
ondersteuning, welwillendheid en entoesiasme in die fakulteit inspan om tasbare
resultate te lewer.”
Onderskrif: Dr Sean
Chetty is onglangs verkies tot visie-president van die Pynvereniging van Suid-Afrika.
