Prof Steven Robins, 'n sosiale antropoloog en akademikus aan die Universiteit Stellenbosch, se memoires, Letters of Stone,
is een van vyf boeke wat vir die Sunday Times Alan Paton-toekenning vir
niefiksie genomineer is en die kortlys vir 2017 gehaal het. Die
toekenning word gemaak met die medewerking van Porcupine Ridge.
In Letters of Stone
boekstaaf Robins, 'n dosent in die Departement Sosiologie en Sosiale
Antropologie aan die Fakulteit Lettere en Sosiale Wetenskappe, sy
familie se desperate poging om Nazi-Duitsland en die konsentrasiekampe
wat tot die dood van miljoene Jode gelei het, te ontvlug. 'n Enkele foto
wat in sy gesin se huis uitgestal is en waarop sy grootmoeder, Cecilie,
en sy tantes, Edith en Hildegard, verskyn, het die vonk verskaf vir sy
diep persoonlike en pynlike weergawe van die ware gruwel en omvang van
die Nazi's se rassebeleid teen Jode. Lees die volle verhaal oor Robins
se memoires hier.
"Dit
is vir my 'n vreugde en 'n eer om die kortlys te haal. Om só 'n
persoonlike boek te kon skryf, was vir my en ons groter familie baie
belangrik. Om erkenning vir die boek deur die Sunday Times Alan
Paton-toekenning te ontvang, is 'n wonderlike bonus," sê Robins.
Die wenner van die toekenning word op Saterdag, 24 Junie, aangewys en kry R100 000 prysgeld.
Volgens
'n verklaring deur Pippa Green, die voorsitter van die
beoordelaarspaneel, was daar onder die aanvanklike langlys, wat uit 26
boeke bestaan het, "'n aantal memoires, biografieë en outobiografieë wat
die stories van intieme familieverhoudings uitbeeld teen die agtergrond
van die ingrypende geskiedkundige kragte wat in die vorige eeu aan die
werk was". Die ander lede van die beoordelaarspaneel sluit in prof
Tinyiko Maluleke, 'n raadgewer aan die prinsipaal en visekanselier van
die Universiteit van Pretoria en buitengewone professor aan die
Universiteit van Suid-Afrika; en regter Johann Kriegler, 'n voormalige
regter van die Konstitusionele Hof.
Vanjaar
is die 28ste keer dat die Alan Paton-toekenning erkenning verleen aan
'n boek wat "die kollig werp op getrouheid aan die waarheid, spesifiek
die vorme daarvan wat nuut, delikaat en ongewild is, en in die aangesig
van mag seëvier", en wat van "deernis, fyn skryfwerk, en intellektuele
en morele integriteit" getuig, lui die verklaring wat die Sunday Times uitgereik het.
"Die
kortlys omvat 'n uiteenlopende verskeidenheid onderwerpe en
geskiedkundige eras: van die herkoms van die mensdom tot die
Marikana-voorval van slegs drie jaar gelede, van die hedendaagse
Kaapstad tot die oorlogtydse Berlyn," vervolg die berig.
Die ander vier boeke wat die kortlys gehaal het, is Under Nelson Mandela Boulevard: Life Among the Stowaways deur Sean Christie, Darwin's Hunch: Science, Race, and the Search for Human Origins deur Christa Kuljian, Murder at Small Koppie: The Real Story of The Marikana Massacre deur Greg Marinovich, en My Own Liberator deur Dikgang Moseneke.
"Hierdie
boeke stel kritiese vrae oor ons verlede, hede en toekoms," sê Pippa
Green. "Die belangrike vraag wat gestel word, is: Wie is ons?"
Foto: Prof Steven Robins met sy memoires, Letters of Stone, wat vir die kortlys vir die Sunday Times Alan Paton-toekenning gehaal het. (Lauren E.H. Muller)