’n Voormalige hoofmeisie van die
Hoërskool Waterkloof in Pretoria, Melise du Toit, is die ontvanger van die
dekaansmedalje as die beste honneursstudent in 2015 in die Fakulteit
Natuurwetenskappe by die Universiteit Stellenbosch (US).
Hierdie medalje van egte silwer word
jaarliks toegeken aan ’n honneursstudent wat die hoogste gemiddelde persentasie
gedurende beide die BSc-, sowel as die HonneursBSc-program gehandhaaf het.
Melise het voorgraads toegepaste wiskunde as hoofvak gehad en dit reggekry om deurentyd ’n gemiddeld van 81% te
handhaaf. In haar honneursjaar het sy ’n gemiddeld van 91,6% behaal.
Haar susksesresep?
“Ek het
nege onderskeidings in matriek gekry, omdat ek geweet het dat ek hard moet werk
vir ’n beurs om aan die Universiteit Stellenbosch te kan studeer. Maar die
groot hoeveelheid werk op universiteitsvlak, is iets waarop niemand jou kan
voorberei nie. ’n Aanleg en passie vir wiskunde sal ’n bietjie help, maar ek
moes regtig baie hard werk.”
Sy sê dat
dit in haar geval baie gehelp het om ’n groep vriende te hê wat saam studeer en
mekaar motiveer.
Vir die
volgende twee jaar sal sy ’n internskap doen in die navorsingsgroep van die
Wetenskaplike en Nywerheidnavorsingsraad (WNNR) in Stellenbosch wat fokus op
modellering en digitale wetenskappe. Die internskap bestaan uit navorsing vir ’n
MSc in toegepaste wiskunde aan die US, onder leiding van prof. Francois Smit en dr. Josefine Wilms. Die eerste vier jaar van haar studies is ook deur die
WNNR gefinansier.
Haar MSc
sal fokus op een aspek van die eerste Afrika-gebaseerde klimaatsveranderingsmodel
wat deur die WNNR ontwikkel word. Sy verduidelik: Een aspek van hierdie model
is die model-gegenereerde interaksie tussen landoppervlak en water. Ek sal
fokus op die modelling van die vloei van water vanaf die landoppervlak na die
riviermonde. Die idee is om die bestaande fisiese model te oorweeg end an ’n
data-gedrewe model (masjienleer) toe te pas ten einde die akkuraatheid van die
model se resultate te verbeter. Dit sal lei tot meer betroubare en akkurate
voorspellings van toekomstige veranderings in riviere se afloop.”
“Ek is werklik dankbaar dat ek ’n
loopbaan kan volg in ’n vakgebied waaroor ek baie passievol is,” voeg sy by.
Op die foto, Melise du Toit (regs) ontvang die dekaansmedalje van Prof. Louise Warnich, Dekaan van die Fakulteit Natuurwetenskappe by die US.