'n
Kapasiteitsbouprojek wat met die Universiteit Stellenbosch (US) se Fakulteit
Agriwetenskappe verbind word en deur die Europese Unie gefinansier word, het
die weg gebaan vir die US se Sentrum vir Leertegnologieë om sy voetspoor na
Uganda en Kenia uit te brei.
As
deel van die PASUFONS-projek is twee telematiese leersentrums by die
Makerere Universiteit in Uganda en die Jomo Kenyatta Universiteit
vir Landbou en Tegnologie in Kenia geopen. Hierdie historiese gebeurtenis
is Woensdag (10 Februarie) gevier met 'n regstreekse interaktiewe
satelliet-uitsending vanuit Stellenbosch na hierdie sentrums in Kampala en
Nairobi.
Die PASUFONS-projek
is 'n samewerkingsprojek wat deur die Europese Unie onder die ACP-EU EDULINK
II-program gefinansier word. Dit word gekoördineer deur prof John Muyonga
by Makerere Universiteit, prof Marena Manley by die US en dr
Arnold Onyango by Jomo Kenyatta Universiteit vir Landbou en Tegnologie.
Die Suid-Afrikaanse Vereniging vir Voedselwetenskap en Tegnologie en die
Streeksforum vir Kapasiteitbou in Landbou is medevennote.
Die
beweegrede agter die PASUFONS-projek lê daarin dat die meeste Afrikalande
se ekonomieë hoofsaaklik op landbou berus. Ten spyte hiervan heers daar
voedselonsekerheid en wanvoeding op die kontinent. Universiteite kan bydra tot
die verligting van voedsel- en voedingonsekerheid deur belangrike navorsing
en graduandi met die nodige vaardighede te lewer.
Die
projek beoog om: voedsel- en voedingswetenskapopleiding en -navorsing by universiteite
in Oos- en Suider-Afrika op te skerp; die bydrae deur voedsel- en
voedingswetenskapdepartemente aan universiteite te verhoog om die kontemporêre
menslikehulpbron- en navorsingsbehoeftes van die voedsel-, voeding- en
landbousektore te kan aanspreek; en die samewerking tussen deelnemende
instansies te bevorder om die uitruil van inligting en die deel van opleiding-
en navorsingshulpbronne aan te moedig.
Die
gebruik van die telematiese platform sal die uitruil van inligting
bevorder en een van die beoogde aktiwiteite sal behels dat kundiges in die veld
lesings regstreeks na die drie leersentrums uitsaai.
Om
te illustreer hoe dit sal werk, het vier paneellede Woensdag deelgeneem
aan 'n regstreekse uitsending terwyl mense die regstreekse video-voer in die
onderskeie sentra kon volg en vrae, kommentaar en gelukwense via 'n
webvorm, SMS of Whatsapp kon stuur om die interaktiewe aard van die
diens ten toon te stel.
Die
paneellede was: dr Antoinette van der Merwe, senior direkteur: Afdeling vir
Leer- en Onderrigverryking by die US, prof Arnold Schoonwinkel,
Viserektor: Leer en Onderrig by die US, prof John Muyonga, PASUFONS se
projekleier en verteenwoordiger van Makerere University en prof Glaston Kenji
van die Departement Voedselwetenskap en Tegnologie aan die Jomo Kenyatta
Universiteit vir Landbou en Tegnologie.
Dr
Van der Merwe het verduidelik dat om deel van die projek te wees, 'n baie
opwindende geleentheid vir die US is aangesien dit die eerste keer is dat die
telematiese diens verder noord in Afrika as
Namibië uitgebrei is.
"Dit was ons
droom om ons dienste na die res van Afrika uit te brei, maar ons het
vennote nodig gehad. Dit is nie sinvol om 'n leersentrum en 'n
satellietverbinding sonder enige doel of inhoud te hê nie. Daarom is ons
verheug om hierdie vennootskap te hê wat ons toelaat om die universiteit se
voetspoor as kennisvennoot in Afrika uit te brei en wat samewerking en
kapasiteitbou moontlik maak."
Prof Schoonwinkel
het na die PASUFONS-projek verwys as 'n egte Afrika-vennootskap. "Ander projekte
sal hopelik ook van hierdie platform gebruik maak om samewerking te
verbeter."
Hy
het bygevoeg dat dit goed inpas by die US se visie om toekomsgerig en
innoverend te wees.
Prof
Muyonga het die bekendstelling as 'n mylpaal vir die PASUFONS-projek beskryf.
"Dit
was 'n lang reis," het hy gesê. Een van die grootste uitdagings was om
toestemming by die plaaslike uitsaai-owerhede in Uganda en Kenia te kry om
ontvangsentra by die onderskeie vennootuniversiteite in te rig.
"Ek
is baie bly dat ons uiteindelik hierdie projek van stapel kan stuur. PASUFONS
het in hierdie infrastruktuur belê en ons wil dit gebruik, maar dit ook deel.
Die tegnologie maak dit makliker om kundigheid te deel en ons moedig ander
eenhede aan om van hierdie geleentheid gebruik te maak."
Prof
Kenji het gepraat oor die belangrikheid van die voedsel- en
voedingswetenskapveld in Afrika. Hy het verduidelik dat die aantal inrigtings
wat kursusse in voedselwetenskap aanbied, toegeneem het en dat hierdie platform
'n groot rol gaan speel in die deel van menslikehulpbronkapasiteit sowel as
navorsingsbevindings.
"Dit
is 'n baie groot innovering en 'n goeie strategie om die doelwitte van PASUFONS
te bereik," het hy bygevoeg.