In Januarie van 2020 het vier studente van die
Fakulteit Opvoedkunde as deel van ʼn jaarlikse uitruilooreenkoms hulle vlerke
gesprei en gaan besoek aflê by die Humboldt Universiteit van Berlyn. Hier het
die vier Maties die geleentheid gehad om tydens hulle Duitse eweknieë se proeftydperk
klasse waar te neem en meer uit te vind oor wat die praktiese element van ʼn
onderwysgraad aan hierdie Duitse universiteit behels. Die studente het selfs
informeel die kans gehad om te assisteer in die klaskamer.
Die vier Maties gereed om 'n seminaar by te woon.
Nicole Minnies, Rozanne Theron, Alexa Plaatjies
en Delmé Barkhuizen is verlede jaar as topkandidate aangewys wat aan die
uitruil na Berlyn sou deelneem. Om vir hierdie uitruil in aanmerking te kom
word studente gevra om ʼn opstel te skryf oor veeltaligheid in die klaskamer
waarna daar met ʼn kortlys van studente onderhoude gevoer word deur prof C van
der Walt, dr M van der Merwe en mnr J Ruiters, die medewerkers in die projek.
Na afloop van die onderhoude word die topkandidate genomineer en kry hulle die
geleentheid om vir een maand die Duitse kultuur te gaan beleef.
Nicole Minnies voor die “Mitte Kampus" van die Humboldt Universiteit in Berlyn.
Die studente het in universiteitsakkommodasie tuisgegaan wat loopafstand is van waar die klasse bygewoon is. Buiten die akademiese verpligtinge, het hulle ook kans gehad om die omgewing te verken en Berlyn se ryk kultuur in te neem.
Nicole Minnies en
Alexa Plaatjies werk saam met ʼn Duitse onderwysstudent aan sy projek.