"Kom ons vier innovasie, kundigheid en die vind van Afrika-oplossings vir Afrika."
Hierdie gelukwense kom van Dr Beth Engelbrecht, Hoof van die Departement van Gesondheid in die Wes-Kaap, tydens die bekendstelling van 'n moderne beeldingsnavorsingsfasiliteit wat verlede week sy deure by die Tygerberg-hospitaal geopen het.
Die Kerngeneeskunde-navorsingsinisiatief (NuMeRI) Nodus vir Infeksiebeelding (NII) is Suid-Afrika se eerste positron-emissie-tomografie/rekenaar-tomografie (PET/CT) fasiliteit wat toegewy is aan kliniese navorsing. Dit het een van die mees gevorderde PET/CT-stelsels wat tans in die wêreld beskikbaar is, 'n Philips Vereos PET/CT - slegs die tweede van sy soort wat in die Suidelike Halfrond geïnstalleer is.
"Ons is baie gelukkig om die gasheer te wees van een van die Departement van Wetenskap en Innovasie se Sentrums vir Uitnemendheid in Tuberkulose-navorsing, en deur hierdie spesifieke nodus van NuMeRI kan ons baie navorsing doen om ons nader aan die uitwissing van die siekte te bring," het Prof Eugene Cloete, Universiteit Stellenbosch se Viserektor: Navorsing, Innovasie en Nagraadse Studies, tydens die bekendstelling gesê.
Die NuMeRI NII vorm deel van die South African Research Infrastructure Roadmap (SARIR). Die Nodus word bestuur deur die Sentrale Analitiese Fasiliteite van Universiteit Stellenbosch en is by die Tygerberg-hospitaal in Kaapstad geleë. Dit word befonds deur die Departement van Wetenskap en Innovasie, Universiteit Stellenbosch en die Bill en Melinda Gates-stigting.
"Gegewe die hoë voorkoms van tuberkulose in die Wes-Kaap, wil die fasiliteit navorsing gebruik om nuwe oplossings te vind om hierdie siektelas op te los," sê dr Daniel Adams, Hoofdirekteur: Basiese Wetenskappe en Infrastruktuur by die Departement van Wetenskap en Innovasie (en waarnemende Adjunk-Direkteur-Generaal). “Die teenwoordigheid van die fasiliteit moet die lewens van mense in die Wes-Kaap raak en bydra tot die verbetering van die lewensgehalte van mense in die land."
Dr Alex Doruyter, Direkteur en Personeelwetenskaplike van die NuMeRI NII, het gesê dat “PET/CT baie geskik is vir navorsing om die siektes wat ons samelewing pla, te bestudeer. Dit sluit in aansteeklike siektes soos MIV en TB, maar ook kwaadaardige siektes soos bors-, long-, serviks- en prostaatkanker; neurodegeneratiewe siektes soos Alzheimer, Parkinson-siekte en traumatiese breinbesering; psigiatriese siektes soos depressie en angs; en hartsiektes soos koronêre arteriesiekte." PET-CT is 'n beeldtegniek wat nie-indringende, noukeurige beelding van biologiese prosesse moontlik maak deur die gebruik van radioaktiewe molekules van belang (radiofarmaseutika); tesame met die anatomiese detail van konvensionele CT-skandering. "Dit stel navorsers in staat om geselekteerde biologiese prosesse met 'n hoë mate van akkuraatheid te visualiseer en te kwantifiseer," het Doruyter gesê.
Die NII bevat 'n volledig toegeruste radio-farmaseutiese laboratorium met onder andere warm en koue laboratoriums en ʼn kwaliteitskontrole-area onder toesig van 'n gespesialiseerde radio-apteker. Hierdie komponent van die fasiliteit verseker dat die inspuit van radiotracers van hoë gehalte en veilig is; maak voorsiening vir radio-etikettering; en is betrokke by die de-novo sintese van nuwe kandidaatmolekules.
Alhoewel PET-CT al 'n geruime tyd in die Wes-Kaap beskikbaar is, moes navorsers meeding met die hoofmandaat van hierdie skandeerders, wat kliniese diensverskaffing is. “Daar was tot dusver nog nie veel toegang vir navorsers nie. Die kombinasie van die wêreld se enigste werklike digitale PET-CT-skandeerder, gekombineer met ons radiofarmasie-fasiliteite en navorsingskundigheid, bied navorsers 'n gulde geleentheid om eersteklasnavorsing uit te voer," het Doruyter gesê.
Fotobyskrifte:
Hooffoto:
Van links na regs: Dr Daniel Adams, Dr Beth Engelbrecht en Prof Eugene Cloete by die PET/CT skandeerder.
NuMeRI:
Van links na regs: Dr Dimitri Erasmus, Prof Eugene Cloete, Prof Gary Stevens, Dr Daniel Adams, Dr Beth Engelbrecht, Dr Alex Doruyter, Prof Jimmy Volmink, Mr Charles Mokonoto en Prof Nico Gey van Pittius.
Foto's deur Stefan Els
