Vir die meeste
mense is die kreune en krake van ‘n stuk staal pure irritasie. Dis egter
meganiese ingenieur prof Anriëtte “Annie”
Bekker se kos. Sy lei ‘n navorsingsprogram aan die Universiteit Stellenbosch
(US) wat elke vibrasie, beweging, slag en kreungeluid van Suid-Afrika se
poolnavorsingskip, die SA Agulhas II, ondersoek.
Bekker sal op 26 September
2019 meer daaroor vertel by die volgende Stellenbosch Forum-lesing, wat tussen
13:00 en 14:00 in die US Museum in Ryneveldtstraat aangebied word.
‘n Pad met die
SA Agulhas II
Die SA Agulhas II
word gereeld gebruik om navorsers en tegnici na Suid-Afrika se
navorsingsbasisse in Antarktika en Marion- en Gougheilande te neem.
“Ons taak is om
uit te vind watter invloed beweging deur ys en stormwaters op die skip se
skagte en propellers het, en hoe passasiers se gemak aan boord geraak word deur
die slaankrag van die golwe, die enjins se vibrasie en die beweging van die
skip,” vertel prof Bekker, wat sedert 2012 direkteur is van die Klank- en
Vibrasienavorsingsgroep in die US Departement Meganiese en Megatroniese Ingenieurswese.
“Uiteindelik hoop ons dat ons navorsing sal bydra tot beter skeepsontwerpe en digitale
dienste vir die SA Agulhas II en die skeepsbedryf.”
Tans werk ‘n
student aan ‘n skaalmodel van die vaartuig om uiteindelik in die Departement
Meganiese en Megatroniese Ingenieurswese se sleeptenk te kan toets. Ander werk
weer saam om sogenaamde “digitale tweelinge” of modelle van passasiers aan
boord te skep. Dié sal hopelik vir kapteins ‘n ingeligte idee kan gee oor hoe
passasiers en bemanning spesifieke weers- en ystoestande wat die skip teëkom
ervaar. Danksy dié virtuele hulpmiddel sal kapteins kan weet hoe ongemaklik of
seesiek hul passasiers dalk is, en of hulle nog enigsins hul werk gemaklik kan
verrig. Daarvolgens sou hulle kon besluit om eerder spoed te verminder of
rigting te verander, tot voordeel van die mense aan boord en die
navorsingsoogmerke van elke vaart.
Volgens Bekker sal sulke “digitale tweelinge” die
skeepsbedryf in die algemeen kon help om die veiligheid van bemanning te
verseker, en meer gemaklike roetes te beplan wat passasierskepe kan volg.
Enigiets wat
vibreer
Bekker se
navorsingsgroep fokus nie net op skepe nie. Sy en haar studente het al in
samewerking met die Ford motormaatskappy studies gedoen oor watter stoele die
mees gemaklikste is as dit om by vibrasies absorbeer. Hulle het al die
klankkwaliteit binne die kajuit van elektriese motors gedoen, en oor hoe mense die
nuwe klanke in dié “stiller” voertuie ervaaar.
Haar
navorsingsgroep het al met mynboumaatskappye saamgewerk en gemeet hoeveel
vibrasies en klanke die bestuurders van swaarvoertuie aan blootgestel word. Sulke
langdurige blootstelling word onder meer in die Fakulteit Ingenieurswese se
Struktuurlaboratorium nagevors, waar ‘n vibrerende platform in plek is om toetse
mee te doen.
“Die voortdurende
vibrasies en skokke waaraan ‘n bestuurder van ‘n reuse konstruksievoertuig daglank
blootgestel word kan mettertyd tot beserings lei,” verduidelik Bekker
“Ons kan tegnies
enigiets navors wat vibreer. Meganiese stelsels, musiek, elektriese stimuli en
weerdata produseer almal seine wat ossilleer.
Danksy vibrasie-gebaseerde tegnieke kan ons uit die ossillasiedata aflei wat
elkeen se belangrike kenmerke is,” vertel Bekker, wat al die Mail & Guardian
se lys van top 200 jong Suid-Afrikaners gehaal het.
Akademiese pad
Bekker, wat in
Benoni groot geword het in ‘n huis van selferkende petrolkoppe en
motorfanatici, sê haar belangstelling in ingenieurswese is ‘n natuurlike
uitvloeisel van haar liefde vir wiskunde, kreatiwiteit en probleemoplossing.
Sy het haar
BEng-graad in meganiese ingenieurswese aan die Universiteit Stellenbosch in 2001
behaal, en ‘n MEng-graad cum laude in 2004. Haar doktorsgraad het in
2008 aan die Universiteit Kaapstad gevolg, met ‘n studie oor hoe beserings
verminder kan word in voertuie wat in landmyngebiede werksaam is.
Haar tande in die
veld van vibrasie en klank is geslyp as lid van Suid-Afrika se Optimal
Energy-span wat die Joule elektriese voertuig ontwerp het. Vyf prototipes van die
Joule is gebou, maar die projek het geëindig weens ‘n begroting wat gesny is.
Ysige avonture
Dieselfde het
gelukkig nie met Bekker se loopbaan gebeur nie. Sy’t in Julie 2011 by die US
aangesluit. Kort daarna het ‘n Finniese kontak voelers uitgesteek om te hoor of
die US dalk deel wou wees van navorsingsprojek oor die SA Agulhas II. Dié was in
aanbou in opdrag van die Suid-Afrikaanse Departement van Omgewingsake en sou die
verouderde SA Agulhas I-poolskip vervang. Die navorsing sou begin wanneer die
skip se vermoë om yswaters te hanteer in Bothniabaai in die Baltiese See digby
Finland getoets word.
Sy het die
uitdaging aanvaar om met die nodige toerusting en al na Finland te reis vir vyf
dae van toetse. Sodoende het die Universiteit Stellenbosch, saam met onder meer
die Universiteit van Aalto in Finland, een van die belangrikste vennote geword
in die bestudering van die skip as ysbreker.
“As jy eers aan
boord was, en die omgewing sien waarbinne jy werk, los dit mens nie sommer
nie,” verklap sy.
Talle van haar
studente het sedertdien vaarte in Antarktika se rigting meegemaak. Met ‘n meetstelsel
van 200 sensors (waaronder 32 versnellingsmeters) word die beweging en
buiging van die skipstruktuur gedurende vaarte gemonitor. Klankopnames word ook
in ʼn kajuit gedoen met ʼn “winkelpop” genaamd
Mike, met mikrofone in sy “ore”.
"Ons is baie
trots op die 32-sensor-versnellingstelsel wat by die Universiteit Stellenbosch
self ontwikkel is. Daarmee kan navorsers die verplasing en vervorming van die
skip se struktuur naspeur soos wat dit deur ys en groot golwe beur,”
verduidelik Bekker, wat erken sy kan nie sonder die Latex program wat geskrewe
dokumente. maak, en Matlab wat grafieke plot van die data wat ingesamel word nie.
Wanneer haar
studente terugkeer Stellenbosch toe na hul yslandskap-avonture, geniet sy dit
om te luister na hul vertellings, en na die insigte oor hulself wat hulle keer
op keer ontdek in die proses.
Einde verlede
jaar het Bekker haar rekenaar afgesit, genoeg kos in die vrieskas gepak en haar
jong gesin tuis gelos om vir die eerste keer self weer aan boord van die SA
Agulhas II te klim en Antarktika te ervaar. Sy was deel van ‘n internasionale
navorsingspan wat die eerste keer sedert 2002 na die berugte Weddellsee van
Ernest Shackleton-en-die-Endurance-faam gevaar het – en kon in die proses self
ervaar hoe ‘n reis deur stormagtige waters ‘n mens se maag kan laat draai.
“Niks kan jou voorberei
vir hoe ontsagwekkend Antarktika is nie. Benewens die klanke van die skeepsmasjienerie
is dit stil. Daar is ‘n rustigheid en vrede. Selfs die skaduwees wat die wolke
maak beïnvloed die landskap. Omdat dit nooit donker word nie, verloor jy selfs jou
sin vir dag en nag. Dit is ʼn omgewing waar aansien nie tel nie en waar die
gebrek aan internet en ʼn bestaande kultuuromgewing toets wie en wat jy is. Daar
is nie plek om weg te kruip nie. Die gevolg is ʼn verbasende gevoel van vryheid,
selfs uitbundigheid – soos ek nog nooit voorheen ervaar het nie.”
Energie
Danksy haar
betrokkenheid met die SA Agulhas II het twee studente reeds hul doktorsgrade
verwerf, en ses hul meestersgrade in ingenieurswese. Twee studente werk vir
ruimte-agentskappe – een in Duitsland en die ander in Pakistan. ‘n Derde
student is in die Duitse motorvervaardigingsbedryf betrokke.
Sy koester die
dae waarop haar studente hul tesisse verdedig “Ek bly verbaas oor hoe studente
ontwikkel en hoe hulle individuele vindingrykheid gereeld jou verwagtinge
oortref in uitdagende oomblikke.”
“Die beste deel
van my werk is om deure vir nuuskierige studente met potensiaal oop te maak en om
te sien hoe vars en vol durf hulle by jou uitstap” verklap sy. “Dis inspirerend
om te kan sien hoe doelgerig, vindingryk en kreatief hulle probleme eenvoudig
oplos. Dit gee my
geweldig baie energie.”