Die US se Fakulteit Geneeskunde en Gesondheidswetenskappe werk nou saam met SALT, ʼn organisasie sonder winsbejag vir sosiale geregtigheid wat poog om die gaping tussen openbare en privaat gesondheidsorg te oorbrug. “Toeganklikheid, opvoeding en inligting moet ook vir die kwesbaarstes in ons gemeenskappe beskikbaar wees. Ons het ʼn passie vir vroue se gesondheid in die geheel: liggaamlik, emosioneel, geestelik en sosio-ekonomies,” sê Sandra Warne van SALT. “Ons help ook vroue om vir ID-boekies, geboortesertifikate en toelae aansoek te doen en bied ʼn beradingsdiens wat strek van werkloosheid en lewensvaardighede tot prostitusie en mensehandel. Ons glo in gelyke regte en waardigheid vir almal.”

In die loop van die jaar het Johnson & Johnson se babaprodukte-afdeling opleiding en inligting aan die US se versloskunde-studente verskaf oor hoe om babas te bad en te masseer asook basiese velsorg vir pasgeborenes en kinders. Die inligting en vaardighede is daarna aan die moeders by SALT oorgedra. Altesaam 43 studente het inligtingspraatjies aan 120 vroue gelewer en is opgelei in onderwerpe soos inentings, borsondersoeke, diarree en gevaartekens, voorbehoeding en hoe om babas te bad en te masseer. Die vroue kon daarna hierdie inligting aan hul familie, vriende en gemeenskapslede oordra. “As ʼn vroedvrou kan ek die lewens van vroue en kinders verbeter en ʼn impak op ʼn kind se eerste 1 000 dae en daarna maak,” sê sr Amy Howes.

“Ons het geleer van die belang van ontwikkeling van persoonlike vaardighede deur in ʼn taal te praat wat ʼn vrou kan verstaan. Ons bemagtig vroue deur hulle op te voed en dit sal help om ons gemeenskap en nasie te versterk. Ons wens is om gesondheidsdienste, van die behandeling van siekte en traumas tot die voorkoming daarvan, te heroriënteer. Deur ʼn ondersteunende omgewing vir gesondheidsdienste te skep, skep ons ook ʼn onbevooroordeelde houding teenoor mense se keuses, lewens en menings. Ons wil hê alle vroue moet weet ons is daar vir hulle. Dit skep ook ʼn omgewing van vertroue – dit is baie belangrik dat verpleërs ʼn onbevooroordeelde houding het. Die werklikhede van vroue in verskillende gemeenskappe, soos ʼn gebrek aan geld vir vervoer, kan hulle verhoed om in noodgevalle toegang tot ʼn apteek te verkry, byvoorbeeld vir diarree-medikasie. ʼn Mens moet realisties na die probleme kyk en hulle vertel wat hulle in ʼn noodgeval vir hulself en hul kinders kan doen. Dit was ʼn verootmoedigende ervaring om die groot sosiale behoefte in die gemeenskap en die behoefte aan basiese onderwys te sien,” sê sr Amy Howes.

Deur die jaar het gevorderde verloskunde-studente in vennootskap met SALT gewerk en ʼn welweesdag met 80 vroue gehou. Hulle het bloeddruklesings, gewig en LMI geneem en urine- en swangerskapstoetse gedoen om ʼn algemene idee van die vroue se gesondheid te kry. Hulle het ʼn praatjie gelewer oor voortplantingsgesondheid en gesinsbeplanning en oor antiretrovirale nakoming gesels. Hulle het mondelinge en inspuit-voorbehoedingsopsies op die dag gebied en dit is weereens uitgelig dat die vroue nie toegang tot basiese inligting het nie en onvoldoende toegang tot basiese voorkomende gesondheidsorgmaatreëls het.

Op 7 Augustus, as deel van vrouemaand en in samewerking met SALT en Pink Drive, het studente borsondersoeke vir die vroue van Dunoon en die publiek gedoen. Hulle het 158 vroue gesien en borsondersoeke, gesondheidsopvoeding en demonstrasies oor bors-selfondersoeke gegee. Vroue met toegang tot privaat mediese sorg het geen opvolging benodig nie. Sestig vroue is vir opvolging verwys, waarvan vyf kwaadaardig was en nie toegang tot privaat mediese sorg gehad het nie. Dit wys op ongelyke ervaring met betrekking tot vroue met toegang tot privaat gesondheidsorg en dié daarsonder.

Daar is ʼn ernstige gebrek aan toegang tot inligting onder vroue in Dunoon en ʼn gebrek aan toegang tot basiese gesondheidsorg. Die bestaande gesondheidsorg is oorlaai en dit lei tot lang wagperiodes waartydens vroue wat inspuit-voorbehoeding benodig nie opgevolg kan word nie. As gevolg hiervan neem onbeplande swangerskappe toe. Talle ander kwessies het ook na vore gekom – rakende sosiale, emosionele en geestesgesondheid. Studente was daar om nou die vroue te luister en kon bydra tot die stryd teen borskanker.

Studente wat by hierdie inisiatief betrokke was, het persoonlike groei ervaar ten opsigte van bestuursvaardighede, hul persoonlike kennis het uitgebrei en hulle het die geleentheid gekry om ʼn diens aan hierdie gemeenskap te lewer. Die gaping tussen openbare en privaat gesondheidsorg moet oorbrug word. Daar moet meer samewerking tussen die US, die DvO en organisasies sonder winsbejag in hierdie opsig wees en meer gesondheidsbevorderings- en siftingsdae moet in die toekoms aangebied word.