Die Ubuntu Learning Community (ULC) is ʼn vennootskap tussen die Universiteit Stellenbosch
(US) en die Departement van Korrektiewe Dienste (DKD). Dit bevorder
hoëronderwys-geleenthede vir US- en Unisa-studente in Brandvlei-tronk in
Worcester om onder leiding van US-akademici verder te studeer en saam en van
mekaar deur dialoog en die deel van ervarings te leer.
Nelson Mandela
was die inspirasie vir die ULC, wat gesê het, “Onderwys is die magtigste wapen
wat jy kan gebruik om die wêreld te verander”. Dit is die eerste keer dat ʼn
residensiële Suid-Afrikaanse universiteit ʼn vennootskap met ʼn tronk aangaan op ʼn
manier waarop samewerkende onderwys as die ‘praktyk van vryheid’ (Paolo
Freire) verstaan word – ʼn instrument vir transformasie en bemagtiging.
Die ULC bestaan uit verskeie komponente: ʼn opvoedkundige vennootskap
tussen die US en die DKD, sosiale ondersteuning en herintegrasie vir studente
ná gevangenskap, en opvoeding en sensitisering van US-studente (en die breër
gemeenskap) oor die
gevangenisstelsel, ʼn komponent wat deur studente gelei word. Hierdie komponente
is belangrik vir die bemagtiging van deelnemers deur samewerking en interaksie,
wat die transformatiewe mag van die onderwys as ʼn instrument vir sosiale
geregtigheid in die hand werk.
Transformatiewe leer vind plaas wanneer
studente aan nuwe ervarings en perspektiewe blootgestel word, soos interaksie
met verskillende eweknieë – studente ontwikkel persoonlike en sosiale
verantwoordelikheid, wat help om kennis en vaardighede met waardes, selfgevoel,
identiteit en doel te integreer.
Deelnemers leer
dat hulle dieselfde dink, visies gemeen het, dat persepsies aangenaam verkeerd
kan wees en dat mense meer met mekaar in aanraking wil kom.
Hierdie
inisiatief is ʼn vorm van kritiese burgerskap, wat gemik is op die aanmoediging
van kritiese besinning oor die verlede en die indink van ʼn moontlike toekoms
wat deur sosiale geregtigheid gevorm is ter voorbereiding daarop om saam in
harmonie in diverse samelewings te leef.
Die inisiatief
behels ook samewerkende internasionale navorsing met vennote van die
Universiteit van Cambridge, VK; UC Berkeley, VSA (die Fulbright Scholar-program);
en die John Jay College of Criminal Justice, VSA. Die US se betrokkenheid by
hierdie inisiatief hou die moontlikheid in om aanmerklike – en oorspronklike –
navorsingsuitsette op die gebiede van onderrig en leer en strafreg-verwante gebiede
te genereer.
Die doel van die herintegrasie-komponent is om studente te help met die
oorgang van tronk na die gemeenskap om hul onderwys voort te sit, werk te kry
en stabiele, produktiewe en vervullende lewens ‘daar buite’ te lei. Die doel is ook om sosiale benadeling as
ʼn hindernis tot hoër onderwys aan te pak deur hertoegangsfasilitering en steun
aan studente in die gevangenis te gee om hul studies te voltooi of ná hul
vrylating by die US verder te studeer.
Die studentegedrewe/kampusonderwys-komponent is daarop gemik om die
grense tussen universiteite en tronke af te breek en die gemeenskap te
sensitiseer en op te voed oor die projek, ons gevangenisstelsel en die
realiteite daarvan en die rol wat gemeenskappe moet speel.
“Ons moet die
manier waarop ons oor oortreders en die gevangenisstelsel dink, verander om
grense tussen tronke en universiteite af te breek”, sê Caitlin Kleynhans (ʼn vierdejaar-LLB-student).
Volgens die DKD
is die kanse kleiner dat mense wat aan die onderwys deelneem sal terugkeer
tronk toe. Dit is tot voordeel van individue, hul gesinne en gemeenskappe. Dit
lê ook die grondslag vir lewenslange leer en het ʼn positiewe impak op die hele
tronkbevolking.
Soos deur ʼn Brandvlei-gevangene
opgemerk: “Die gevangenes wat met die US-studente gewerk het, het nuwe hoop en
vertroue in die goedheid van mense gekry. Ons voel weer soos mense. Julle het
ons nes enige ander student behandel.”
Hierdie
vennootskap kan ʼn reuse-impak hê om gevangenes te help om produktiewe lede van
die samelewing te word en kan daartoe lei dat minder mense tronk toe gaan. Dit
verbeter studente in die gevangenis se vooruitsigte vir suksesvolle terugkeer
ná hul vrylating en verlaag terugvalling.