Universiteit Stellenbosch
Welkom by Universiteit Stellenbosch
Studente-atlete kry graad
Outeur: Maties Sport Media
Gepubliseer: 27/03/2018

Ongeveer 100 studente-atlete van die Universiteit Stellenbosch het in die 2017 akademiese jaar gegradueer tydens gradeplegtighede in Desember (2017) en Maart (2018).

Die graduandi is lede van 'n verskeidenheid Maties-sportklubs, insluitend die Hoëprestasie- (HP) sportkodes rugby, hokkie, netbal, atletiek, swem, fietsry, basketbal, krieket en Parasport. Ander graduandi het 'n gesonde en aktiewe lewenstyl in hul studentejare nagestreef deur lede te word en Maties te verteenwoordig in sportkodes soos gimnastiek, judo, pluimbal, roei, kanovaart, seil, waterpolo en branderplankry.

Die graduandi sluit in Parasport-wêreldkampioene Charl du Toit en Dyan Buis (atletiek), Paralimpiese medaljewenner Hendri Herbst (swem), Wêreldstudentespele-deelnemers Emma Chelius (swem) en Lwazi Madi (waterpolo), verskeie Maties Rugby-staatmakers, insluitend die kaptein van FNB Maties se 2018 Varsity Cup-span Niel (Chippie) Oelofse en losskakel Chris Smith, en Dusi Kanomarathon-wenner Jordan Peek.

“Ons is uiters trots op hierdie studente-atlete," sê Ilhaam Groenewald, Maties Sport se hoofdirekteur.

“Dit is nie maklik om jou studies suksesvol af te handel terwyl jy jou universiteit, jou provinsie en in sommige gevalle selfs jou land op die sportveld verteenwoordig nie. Bo en behalwe hul akademiese verpligtinge, moet hierdie studente-atlete tyd maak om oefensessies by te woon en in wedstryde of aan kompetisies deel te neem, wat dikwels vereis dat hulle na ander plekke in Suid-Afrika en selfs die wêreld moet reis.

“Studente-atlete is egter eers​ studente en dan atlete. Maties Sport vier dus hul akademiese prestasies en streef daarna om 'n omgewing te skep waarin studente akademies sowel as op die sportveld kan floreer. Hierdie proses word gedryf deur ons Maties Sport HP-eenheid en word ondersteun deur die PACER-program," voeg Ilhaam by.

“Ons verstaan dat dit baie uitdagend is om 'n studente-atleet te wees en ons ondersteun hulle wanneer en waar ons kan."

PACER is 'n Engelse akroniem vir Persistence, Authenticity, Commitment, Empathy en Resilience.