Die Universiteit Stellenbosch (US) het een van sy grootste individuele
skenkings nog ontvang – ʼn bedrag van R194.6 miljoen. Dié skenking is in die vorm
van ʼn erflating deur wyle mnr DW (Dirk) Ackermann, ʼn ingenieur van beroep.
“ʼn Belegging in die toekoms van ʼn nuwe geslag Maties.” So beskryf prof
Wim de Villiers, US-Rektor en Visekanselier die skenking aan die Universiteit. “Dit
is verseker een van die mees betekenisvolle skenkings wat die universiteit nog
van ʼn individu ontvang het. Die US-gemeenskap is baie dankbaar en het regtig
groot waardering vir mnr Ackermann vir hierdie besondere erflating. Ons waardeer
dit opreg,” het prof De Villiers gesê.
Die erflating, in die vorm van ʼn aandeleportefeulje ter waarde van
R8.4m, is reeds in 2006 deur mnr Ackermann aan die Universiteit Stellenbosch
bemaak. Mnr Ackermann is ʼn aantal jare gelede oorlede.
“Die waarde van die aandeleportefeulje het intussen van R8.4m na R194.6m
gegroei,” vertel mnr Hugo Steyn van die US se Ontwikkeling en
Alumni-betrekkinge kantoor. “Onderworpe aan die voorwaardes van mnr Ackermann
se erflating, is hierdie skenking onlangs ten volle aan die Universiteit
oorgedra.
Soos bepaal in sy testament, sal die Universiteit hierdie bemaking
gebruik om die DW Ackermann Beursfonds op die been te bring tot voordeel van
verdienstelike studente in die dissiplines van elektroniese en elektriese
ingenieurswese, die kapitaal dienooreenkomstig belê en die inkomste gebruik vir
beurse wat jaarliks beurse toegeken sal word in terme van die kriteria bepaal
in sy testament.
“Die fonds sal as ʼn skenkersfonds bestuur word en volhoubaar aangewend
word om baie studente in die toekoms te ondersteun. Die fonds sal binnekort
beskikbaar wees en na konsultasie met die Fakulteit sal beurse heel moontlik
reeds vanaf 2018 toegeken kan word,” het Steyn gesê.
Totale skenkings aan die US in 2016 het met 53% toegeneem van die vorige
jaar, en het ook die hoeveelheid skenkings wat in 2014 ontvang is, oorskry.
“Die aanname dat alle US-studente uit welgestelde families kom, is nie
korrek nie. Meer as ʼn derde van ons nuutste gegradueerdes het een of ander vorm
van finansiële ondersteuning tydens hul studies ontvang,” het prof De Villiers
bygevoeg. “Dit is fassinerend om te sien hoe dit oor tyd verander het. In 2000
het 28% Maties finansiële ondersteuning ontvang. Teen 2014, het die syfer
gestyg tot 38%. En verlede jaar was 41% van ons studente uit die sogenaamde verlore
middelgroep (‘missing middle’) – huishoudings met ʼn gesamentlike inkomste van
minder as R600 000 per jaar.”
Aan die begin van 2017 het die US R1,1 miljoen in filantropiese
skenkings ontvang, geoormerk om die finansiële behoeftes van studente aan te
spreek. Dié skenkings is in ooreenstemming met die doelwit en rol van die
“Register All”-beurse wat deur die Studenteraad geadministreer word.
Die US het in die 2016 akademiese jaar drie nuwe rekords opgestel. Finale
syfers toon dat die Universiteit altesaam 8 348 kwalifikasies toegeken het,
5,6% meer as die vorige jaar. Dit sluit 1 468 meestersgrade in – die
meeste nog vir een jaar. Dieselfde geld vir die aantal doktorsgrade. Altesaam
278 doktorsgrade is toegeken, waarvan 47% (teenoor 39% in 2015), aan swart,
bruin, Indiër en Asiër-studente toegeken is.
“Dit bevestig die US se waardevolle bydra as ʼn nasionale bate en dit stuur
‘n sterk sein aan potensiële skenkers wat ʼn belang het by voortgesette
studentesukses en ʼn stabiele uitset van gegradueerdes vir die ekonomie wil
sien. Onlangse navorsing wys daarop dat ons goed daarin vaar om donateurs te
behou en die hoeveelheid geld wat hulle skenk, te vermeerder,” het prof De
Villiers gesê.