Prof. Eugene Cloete, Viserektor: Navorsing en Innovasie, het saam met sy twee studente, dr. Danielle de Beer en dr. Ruenda Loots, geseëvier nadat hulle Donderdag hul doktorsgrade in biochemie tydens die sesde gradeplegtigheid by die Universiteit Stellenbosch verwerf het.

Dr. de Beer het 'n biologiese filtreersisteem ontwikkel wat spesifiek vir wynkelders se afvalwater ontwerp is. Die tegnologie is intussen gepatenteer en gelisensieer en word tans kommersieel vrygestel. Haar mede-studieleier was dr. Marelize Botes.

Dr. Ruenda Loots het 'n biomimetiese benadering gevolg om die algemene oorlewingstrategieë van biofilms te bestudeer. Sy het bevind dat biofilms baie vining op veranderinge in hul omgewing reageer, en daardeur hul oorlewing verseker. Sy het ook 'n biomimetiese raamwerk ontwikkel waarbinne nuwe strategieë bedink kan word om biofilms te bestry, asook om komplekse mikrobiese ekologiese fenomene te verduidelik.

Nog 'n biochemie-kandidaat, dr. Carl Christensen, het sagteware ontwikkel wat die verskillende metaboliese prosesse in die liggaam kan modelleer.

Die Departement Chemie en Polimeerwetenskappe het vanjaar vyf PhD gegradueerdes opgelewer. Hulle is dr. Lonwabo Ngodwana, dr. Waheen Saban, dr. Angelique Blanckenberg, dr. Dominic Castell en dr. Emile Engel.

Dr. Wilfrid Ndebeka en dr. Ntombizikhona Ndlovu het beide hul doktorsgrade in fisika ontvang, terwyl die Departement Wiskundige Wetenskappe twee PhD gegradueerdes opgelewer het, naamlik dr. Fortunat Rajaona (rekenaarwetenskap) and dr. Nantsoina Ramiharimanana (wiskunde).

PhD grade is ook toegeken aan dr. Tanja Davis (fisiologiese wetenskappe), dr. Arno de Klerk en dr. Christoff Truter ((dierkunde), dr. Anneke Postma en dr. Mariska Laubscher (mikrobiologie), en dr. Azwimbavhi Mulidzi (geologie).