Wiskunde-studente van die US het goed gevaar by die onlangse Internasionale Wiskunde-kompetisie wat in Bulgarye gehou is, met honneursstudent Dylan Nelson wat ’n plek in die tweede prys-kategorie behaal het.

Die ander drie studente, Elrich Groenewald, Petri-John Last en René Spoerer, het almal eervolle vermelding verwerf.

Volgens prof. Stephan Wagner, hoof van die afdeling Wiskunde in die Departement Wiskundige Wetenskappe, is dit die eerste keer dat ’n US student ’n plek in een van die top kategorieë behaal het: “Die kompetisie bestaan sedert 1994, maar ons het eers in 2013 begin deelneem. Hierdie kompetisie is ’n goeie manier om wiskunde-studente geïnteresseerd te kry in uitdagende wiskundige probleme wat buite die gewone kurrikulum lê. Terselfdertyd kry hulle waardevolle internasionale blootstelling.”

Dylan, wat algeheel die 98ste plek uit 320 studente behaal het, sê hy sal die kompetisie aanbeveel vir enige een wat hulleself wil uitdaag. “Die kompetisie selekteer probleme wat opgelos kan word deur die toepassing van die kennis en tegnieke uit die voorgraadse wiskunde-kurrikulum, maar met ’n effense kinkel. Oor die algemeen verg die probleme die toepassing van relevante tegnieke op interessante maniere.” “Studente moet egter nie voel dat hulle suksesvol in hierdie tipe kompetisies moet wees om ’n suksesvolle wiskundige te kan wees nie,” voeg hy by.

Dylan is tans besig met ’n HonsBSc in wiskunde en beplan om dit op te volg met ’n MSc in Wiskunde, ook aan die US.

Die kompetisie is georganiseer deur die Universiteitskollege Londen (UCL) en vanaf 25 tot 31 Julie 2016 aangebied by die  Amerikaanse Universiteit van Bulgarye.

Op die foto, van links na regs: Dylan Nelson, René Spoerer, Elrich Groenewald en Petri-John Last. Foto: Liam Baker.