​Stellenbosch Universiteit se Eenheid vir Internasionale Kreditering (SU-EIK) is trots om terug te kyk op ’n belangrike mylpaal in die bevordering van toeganklike internasionale onderwys op die kontinent. In Junie 2025 het die SU-EIK die vrystelling goedgekeur van die sesde aflegging van die Onafhanklike Eksamenraad (IEB) se Internasionale Sekondêre Sertifikaat (ISC) en Verdere Studie-eksamens vir Mei 2025 — ’n beduidende stap in die voortgesette uitrol van Afrika se eerste internasionale skoolverlaterskwalifikasie.

Die ISC, wat eksterne kwaliteitsversekering deur die SU-EIK ondergaan, bied ’n geloofwaardige, kontekstueel relevante en bekostigbare internasionale alternatief vir tradisionele skoolverlaterskwalifikasies. Met die sesde eksamensessie agter die rug, brei die kwalifikasie steeds sy reikwydte en impak uit.

Tydens die Mei 2025-eksamensessie het 79 kandidate die ISC-eksamens in 14 vakke afgelê, terwyl ’n verdere 895 kandidate die Verdere Studie-eksamens geskryf het. Die totale aantal leerders wat die Verdere Studie-eksamens afgelê het, het toegeneem vanaf 699 in Mei 2024. Die ISC-eksamens is afgelê by onafhanklike skole in Namibië, Mosambiek en Eswatini — wat die program se streeksvoetspoor onderstreep.

Die SU-EIK is verantwoordelik vir eksterne kwaliteitsversekering, handhawing van internasionale standaarde en toesig, en het bevestig dat die eksamens onder omstandighede afgelê is wat billikheid, geldigheid en betroubaarheid verseker het. Die Eenheid het geen bewyse van onreëlmatighede gevind wat die integriteit van die uitslae kon ondermyn nie en het die IEB geloof vir hul goed georganiseerde, streng eksamens.

Universiteite Suid-Afrika (USAf) het vroeër bevestig dat kandidate wat die IEB ISC op meriete of op gevorderde vlak slaag en aan ’n Suid-Afrikaanse hoëronderwysinstelling toegelaat word, aan die minimum vereistes vir toelating tot ’n graadprogram sal voldoen.

Hierdie volgehoue sukses beklemtoon die potensiaal van die ISC om betekenisvol by te dra tot onderwys-transformasie in Afrika. Deur ’n internasionaal-geëvalueerde kwalifikasie aan te bied wat bekostigbaar, aanpasbaar en akademies streng is, maak die ISC breër toegang moontlik tot hoër onderwys en werksgeleenthede — plaaslik én internasionaal.