Terwyl die eerste semester ten einde loop en Stellenbosch begin inkruip vir die jaarlikse winterslaap, berei verskeie studente van die Universiteit Stellenbosch voor vir die volgende opwindende stap in hul akademiese reis – 'n internasionale uitruilsemester by een van ons gesogte vennootinstellings regoor die wêreld.

Gedurende die tweede semester van 2025 sal 'n totaal van 67 BCom (Internasionale Besigheid) studente hul uitruilsemesters aanpak. Hierdie, die grootste groep studente wat sedert die aanvang van die graad in 2016 vanuit Stellenbosch sal vertrek, is meer as drie maal groter as die eerste kohort van 22 baanbrekerstudente wat in 2018 onverskrokke in die buiteland gaan studeer het.

Hul reise sal hul na 38 universiteite in 16 verskillende lande neem, versprei oor vyf van die sewe kontinente (oral behalwe Afrika en Antarktika – vir nou?).

Soos altyd bly Europa die gewildste bestemming, wat 52 studente lok. Nederland lei die wedloop met 18 studente, gevolg deur Duitsland (7), België en Italië (6 elk), Frankryk en die Verenigde Koninkryk (4 elk), Switserland (3), en Oostenryk en Denemarke (1 elk).

Verder hiervandaan sal Asië sewe van ons studente huisves – vier in Japan, twee in Turkye en een in Hong Kong. Noord-Amerika sal die tuiste wees vir vyf studente, met drie studente wat na Kanada en twee na die Verenigde State op pad is. Twee studente sal die lang pad na Australië toe aanpak, terwyl een avontuurlustige student besluit het om 'n meer eksotiese ligging te kies, naamlik Brasilië in Suid-Amerika.

Die internasionale uitruilsemester is 'n hoeksteen van die BCom (Internasionale Besigheid)-graad, en is ontwerp om studente bloot te stel aan verskillende kulture, sake-omgewings en denkwyses. Van Europa en Asië tot die Amerikas en Australië, sal ons studente die Universiteit Stellenbosch op die wêreldverhoog verteenwoordig terwyl hulle waardevolle akademiese en persoonlike ervaring opdoen.

Benewens akademiese verryking, bied die uitruilsemester ons studente ook die geleentheid om 'n globale ingesteldheid te ontwikkel, hul interkulturele kommunikasievaardighede te versterk en internasionale netwerke te bou wat hulle in die toekoms sal ondersteun.

Ons wens ons studente ʼn veilige reis en verrykende ervarings in die buiteland toe. Reis veilig, omhels die onbekende en geniet elke oomblik – jul globale klaskamer wag. Ons sien uit daarna om julle terug te verwelkom, gevul met nuwe perspektiewe, vars idees en baie, baie stories om te deel!