Welcome
Welkom by Universiteit Stellenbosch
​​​​​

Verwelkomingsboodskap van die Rektor en Visekanselier​

Welkom, nuwe Maties!

Beste nuwelingstudent

Welkom by die Universiteit Stellenbosch (US). Wat ’n opwindende reis lê vir jou voor!

Die afgelope jaar was vir ons almal besonder uitdagend, veral vir jongmense soos jy wat hulle skoolloopbaan moes voltooi, en voorberei vir die volgende hoofstuk: universiteit. Geluk met jou harde werk en deursettingsvermoë. Jy het jou eindeksamen geslaag en toelating tot die US ontvang – ’n reuseprestasie gedurende ’n wêreldwye pandemie. Kyk vir ’n oomblik terug op die lang pad wat jy gestap het, en waardeer waar jy vandag is.

Verlede jaar was moeilik, en ons sal ongetwyfeld vanjaar steeds heelwat struikelblokke teëkom met die voortslepende uitwerking van COVID-19 op ons universiteitsgemeenskap, ons land en die res van die wêreld. Hoewel ons daarna uitsien dat ons kampusse weer besig raak namate studente en personeellede terugkeer, sal ons aan alle voorgeskrewe maatreëls voldoen. Ons sal jou ook vra om in te stem tot ’n gedragskode, wat insluit om riskante aktiwiteite weg van die kampus te vermy. Ons moet elkeen verantwoordelikheid aanvaar om te keer dat die koronavirus verder versprei.

By die US is ons oorhoofse prioriteite vir 2021 dieselfde as verlede jaar: om die akademiese projek te laat slaag, en volhoubaar te bly as ’n toonaangewende hoëronderwysinstelling. Dít sal ons bly nastreef terwyl ons ook ons studente en personeel se gesondheid en veiligheid prioritiseer. Onthou, om deur COVID-19 te kom is nie ’n naelloop nie; dis ’n marathon. En nou besef ons dit is nie sommer enige marathon nie, maar ʼn ultra-marathon! Dit is ’n veeleisende tyd, en ons moet fiks word én bly om die eindstreep oor te kan steek.

Ek hoop jy is reeds vertroud met die opwindende Inskakelingsprogram wat ons aanlyn bekend gestel het. Hierdie program stel jou bekend aan die US en help jou jou voete vind en voorberei vir jou studies en die unieke studente-ervaring wat voorlê op kampus. Daardie ervaring begin met ons bekende jaarlikse Verwelkomingsprogram.

Sommige komponente van die Verwelkomingsprogram sal aanlyn gebeur om groot byeenkomste te vermy. Nietemin sal sekere elemente, wat binne die perke van die COVID-19-regulasies kan geskied, op kampus sal voortgaan. Soos altyd, sal ons alles moontlik doen om jou kennismaking met die kampuslewe spesiaal en onvergeetlik te maak. Hou www.sun.ac.za/welcome dop vir die jongste verwikkelinge en program.

Van nou af sal jy toegang hê tot verskeie steundienste by die Afdeling Studentesake. Hier staan ervare en bekwame beroepslui gereed om jou leer en ontwikkeling te ondersteun en jou elke tree van die pad by te staan. Maak gerus gebruik van hul dienste om die heel meeste uit jou tyd op universiteit te haal.

Ons is oortuig jy het wat dit verg om suksesvol te studeer en te gradueer. Bly glo in jouself, maak jou studies ’n prioriteit en werk hard. En onthou om darem ook pret te hê – baie universiteitsvriende word lewenslange vriende.

As jy in die weke en maande wat voorlê hulp nodig het, reik eenvoudig uit en vra. Want by Maties beweeg ons saam vorentoe.

Prof Wim de Villiers
Rektor en Visekanselier ​

Rektor en Visekanselier Verwelkomingsvideo

​​