Ons voorpuntnavorsing word moontlik gemaak deur topklasfasiliteite. Dít sluit in die Biomediese Navorsingsinstituut op Tygerbergkampus, die grootste en mees gevorderde navorsingskompleks van sy soort in die suidelike halfrond. Die Sentrum vir Epidemiereaksie en -innovasie, ’n leier in genoomreeksbepaling, is onder andere hier geleë, sowel as die Biobewaareenheid, wat die suidelike halfrond se eerste ten volle geoutomatiseerde biobewaarstelsel bevat.​
     

Die Jan Mouton Leersentrum is ’n model vir toekomstige kampusontwikkeling. Dié kontemporêre, meerdoelige fasiliteit bevat gevorderde tegnologie vir lesings, stroming, konferensies en gespreksklasse.
     

Ná onlangse uitgebreide opknappings bied die US Biblioteek etlike ultramoderne ruimtes om kennis te ontdek en te skep. Die biblioteek se Makerspace ondersteun verskeie innoverende aktiwiteite, van 3D skandering tot die ontwikkeling van klein robotika. ​
     

Die Wallenbergnavorsingsentrum by die Stellenbosse Instituut vir Gevorderde Navorsing is uitgeknip vir grensverskuiwende navorsing. Die moderne fasiliteit spog met individuele en gemeenskaplike werkruimtes en ’n meerdoelige konferensieafdeling. ​
           

Die US is ’n voorkeurnavorsingsvennoot in plaaslike, vastelands- en wêreldverband. Ons het nagenoeg 320 vennote in 64 lande. Hierdie vennootskappe wissel van departementele en fakulteitsinisiatiewe tot algemene institusionele ooreenkomste om van die dringendste wêrelduitdagings sáám die hoof te bied. ​
     

Ons neem ook aktief deel aan verskeie hoëprofiel- akademiese netwerke, waaronder die Globale Universiteitsalliansie oor die Klimaat (GAUC), die Universiteitskonsortium vir Globale Gesondheid (CUGH), die Europese Gilde van Navorsingsintensiewe Universiteite, die Venesiese Internasionale Universiteit, en die Internasionale Alliansie van Guangzhou-susterstaduniversiteite (GISU). Samewerkingshoogtepunte in Afrika sluit in die Afrikanavorsingsuniversiteitsalliansie (ARUA), Periperi U, die Afrika Instituut vir Wiskundige Wetenskappe (AIMS), die Vennootskap vir Afrika se Volgende Generasie Akademici (PANGeA), en NEPAD-ondersteunde inisiatiewe.​
         

Die US is ten volle verbind tot volhoubaarheid wat nasionale en wêreldontwikkeling sowel as ons eie institusionele stelsels betref. ​
     

Met die oog op volhoubaarheid op lands- en wêreldvlak strook ál ons strategiese navorsingsgebiede met Suid-Afrika se Nasionale Ontwikkelingsplan, die Afrika-unie se Agenda 2063-doelwitte en die Verenigde Nasies se volhoubare ontwikkelingsdoelwitte. Op dié manier sorg ons dat ons akademieskap volhoubare ontwikkeling plaaslik, in ons streek én die res van die wêreld dien. Ons Sentrum vir Volhoubare-ontwikkelingsimpak (SDG/2063 Impaksentrum) vervul ’n kernrol om te sorg dat ons werk internasionale sowel as Afrikadoelwitte bevorder.​
      

In ons strewe na sistemiese volhoubaarheid ontwikkel ons die US op ’n manier wat ekologiese perke respekteer en die samelewing en die natuurlike omgewing versterk. Prioriteite sluit in minder koolstofvrystellings in ons werksaamhede, die gebruik van gryswaterstelsels, die installering van fotovoltaïese sonpanele, afvalherwinning, en die implementering van doeltreffender geboubestuurstelsels.