Die Universiteit Stellenbosch sal die April-gradeplegtighede, wat van Maandag 4 April tot Donderdag 7 April 2022 plaasvind, in kontakvorm aanbied. Die formaat van die plegtighede sal aan die huidige vlak 1-pandemiebeperkings voldoen, en sal nie graduandi of hulle gaste se gesondheid en veiligheid in gevaar stel nie.
Die kontakplegtighede sal plaasvind by die Coetzenburgsentrum, tussen die Danie Craven-stadion, die Sportwetenskapgebou en die Maties Gimnasium.
Die volledige program en naamlys van graduandi sal teen 29 Maart 2022 op ons gradeplegtigheidsblad geplaas word.
