Die Fakulteit Ekonomiese en Bestuurswetenskappe (EBW) het Vrydag
'n entoesiastiese groep eerstejaars by 'n inligtingsessie in die Kruiskerk verwelkom. Die Fakulteit verwelkom tradisioneel 1 550 nuwelinge elke jaar.
Die studente is deur die dekaan, prof Ingrid Woolard; visedekaan (leer en onderrig), prof Ronel du Preez; ander personeel en die Fakulteit se studentekomitee,
die ESBK, verwelkom.
Prof Woolard het gesê minder as 30 000 leerders uit die 787 000 wat die Nasionale
Senior Sertifikaat-eksamen in 2019 afgelê het, voldoen aan EBW se toelatingsvereistes. Sy het die eerstejaars aangemoedig om aan
dié statistiek vas te hou omdat dit van groot waarde vir hulle kan wees
gedurende hul studies.
“Julle
is dus 'n baie spesiale groep en ons weet dat julle toppresteerders is. Ons wil
hê dat julle daaraan moet vasklou, want die probleme wat studente dikwels in
hierdie omgewing ondervind, is dat hulle gewoond is om die toppresteerder in
hulle skole te wees. Nou kom hulle skielik in 'n omgewing waar almal toppresterende
studente is en waar hulle resultate as gemiddeld tel.
“Julle moet onthou dat julle onder die drie
persent toppresteerders tel en dat julle uiters bevoorreg is om toegang tot
hoër onderwys te kan hê.”
Sy het hulle ook aangemoedig om hulself oop te stel om nuwe mense
van alle agtergronde te ontmoet en netwerke te bou wat handig te pas sal kom in
die toekoms.
“Kyk rondom jou na die mense in hierdie lokaal. Sommige gaan naam
maak as bedryfsleiers of direkteurs-generaal in belangrike
regeringsdepartemente, miskien selfs as kabinetsministers. Dit is 'n
ongelooflike kragtige netwerk van mense wat jy om jou het. Julle moet seker
maak dat julle dié netwerk oor die volgende paar jaar ontwikkel,” het Woolard gesê.
Du Preez het uitgebrei oor vyf besluite wat sy gesê het sal bepaal
of studente die US slegs met 'n matrieksertifikaat, lae selfbeeld en groot
studiekuld sal verlaat of met 'n gevoel van prestasie wanneer hulle in 2022
gradueer.
Dit sluit in die keuse van die regte studieprogram en die
belangrikheid van studentebetrokkenheid, ondersteuning, tydsbestuur en
klasbywoning.
Antoinette Lotter, EBSK-voorsitter, het gesê EBW is 'n baie opwindende
fakulteit om van deel te wees.
“Daar
is 'n ongelooflike verskeidenheid dinge wat jy kan doen sodra jy die
universiteit verlaat, sowel as baie fassinerende geleenthede wat jy kan
aangryp terwyl jy hier is,” het sy gesê. “Oor die afgelope drie jaar het ek
gesien hoe studente hul eie ondernemings begin, liefdadigheidsorganisasies stig,
baie indrukwekkende beleggingsportefeuljes skep en aan ongelooflike programme
deelneem.”