Die Universiteit Stellenbosch se Fakulteit Geneeskunde en Gesondheidswetenskappe se Departement Psigiatrie het ʼn skenking van Sanford Health
ontvang vir ʼn navorsingsgenootskap in fetale alkoholspektrumversteuring (FASV).
Die skenking is aangekondig tydens ʼn onlangse besoek van ʼn
afvaardiging van Sanford Health aan die Fakulteit Geneeskunde en
Gesondheidswetenskappe (FGGW) van die Universiteit Stellenbosch (US). Sanford
Health is een van die grootste geïntegreerde gesondheidsorgstelsels sonder
winsbejag in die VSA en het die Sanford World Clinic Initiative gevestig, wat
hoofsaaklik op internasionale pediatriese gesondheidsorg fokus. ʼn Teenwoordigheid word tans in vier lande gehandhaaf.
Die Sanford Hoyme-navorsingsprogram in FASV sal ʼn genootskap
vir kliniese en genetiese navorsing in die voorkoming en behandeling van FASV
in die Departement Psigiatrie aan die FGGW ondersteun. Dit is genoem na dr Gene
Hoyme, Hoof van Genetika en Genoommedisyne en Hoof- Akademiese Beampte van
Sanford Health. Hy was die afgelope 15 jaar aan die spits van
FASV-navorsingstudies in Suid-Afrika en het gehelp om die voorkomssyfer daarvan
in Suid-Afrika te bepaal. Dit is tans steeds die hoogste aangetekende syfer ter
wêreld.
“Hierdie navorsingsvennootskap met die US is revolusionêr
wat betref ons begrip van hierdie toestand – nie net om die omvang van die
probleem hier in Suid-Afrika te help definieer nie, maar ook om te weet hoe om
ʼn vinnige, akkurate diagnose te maak en baie van die wetenskap wat daarby
betrokke is,” het Hoyme tydens die onthulling van ʼn plaak in die Departement
Psigiatrie ter erkenning van die borge van die genootskap gesê.
Hoyme werk al sedert 2008 saam met prof Soraya Seedat, Hoof
van die Departement Psigiatrie, op die gebied van FASV-navorsing. Die
departement het ʼn gevestigde FASV-navorsingsprogram en Hoyme was die
hoofspesialis in dismorfologie van ʼn reeks opeenvolgende studies in die
Wes-Kaap, wat deur die National Institutes of Health in the VSA gefinansier is.
Hoyme het oor die jare heen ook Suid-Afrikaanse navorsers en klinici aan die
begin van hul loopbane gementor.
“Hierdie skenking sal ons in staat stel om, tot in ewigheid,
ʼn talentvolle jong navorsingsgenoot aan te stel wat nougeset deur dr Hoyme
gementor sal word,” het Seedat gesê.
Volgens haar is die navorsingspan ook baie opgewonde oor die
moontlikheid van die vestiging van ʼn FASV-navorsingsleerstoel in die nabye
toekoms, om broodnodige intervensie- en voorspellings- diagnostiese navorsing
op hierdie gebied te handhaaf en uit te brei.