Personeel en studente van die Universiteit Stellenbosch (US) kan uitsien na nog 'n internasionale ervaring in Asië. Dit volg op 'n ooreenkoms met Hunan Normal University (HNU), een van die top universiteite in China. Die twee universiteite het beloof om nouer saam te werk en te kyk na uitruilgeleenthede vir studente en personeel, asook onderrig en somerprogramme. Prof Hester Klopper, adjunk-visekanselier: Strategie en Internasionalisering het die samewerkingsooreenkoms onderteken gedurende 'n besoek van 'n hoëvlak afvaardiging van HNU. Die HNU afvaardiging is vergesel deur die voorsitter van die universiteitsraad.

Met meer as 30 000 studente op vyf kampusse is HNU een van China se top 100 universiteite. Die ooreenkoms met US sal geïmplementeer word deur 'n wye verskeidenheid strategieë, onder andere die uitruil van student en personeel, asook gesamentlike navorsingsprogramme. Die US ooreenkoms met HNU skuif die getal institusionele en departementele ooreenkomste  in China​ op tot elf.

Die HNU-afvaardiging het gedurende hul besoek op 29 November ook met Robert Kotzé, senior direkteur van Universiteit Stellenbosch Internasionaal en Jennifer Jian, mede-direkteur van die Confucius Instituut by Universiteit Stellenbosch vergader. Hulle het ook 'n lesing oor die Chinese harp, aangebied deur Cui Junzhi, die stigter van moderne Chinese Konghou-kuns, in die GUS Gallery bygewoon.

​Die HNU-afvaardiging het bestaan uit prof Li Min, voorsitter van die universiteitsraad, prof Yuan Daoxiang, visedekaan: Instituut vir Ideologiese en Politieke Onderwys, mnr Li Xuerong, voorsitter: Shuda Kollege raad, prof Tang Jianguo, dekaan: Xiang Dong Hospitaal, mnr. Shen Xianlan, adjunkdirekteur: Kantoor van die universiteitsraad en mnr Zhou Ke, hoof: Kantoor van Internasionale Uitruil en Samewerking.