Waarom
SUNFin?
Die volgende redes lig enleke aspekte uit waarom verandering noodsaaklik is:
- Ons huidige finansiële stelsel is in 1989 ontwikkel en het die einde van sy leeftyd bereik. Dit kan nie doeltreffend onderhou en opgegradeer word nie, aangesien Natural (die programmeringstaal waarmee die stelsel geskryf is) nie meer aan tersiêre instellings ondersteun word nie. Die stelselvaardighede daarvoor is dus aan die krimp.
- Volgens die US aanvaarde bestuursmodel van gedesentraliseerde verantwoordelikheidsentrums is elke fakulteit en departement vir sy eie finansiële volhoubaarheid verantwoordelik. Die huidige stelsel bied nie genoegsame steun in die doeltreffende uitvoer van dié model nie.
- Ten einde effektiewe, ingeligte en doeltreffende institusionele besluite te kan neem, word akkurate, intydse data wat maklik met slim en gebruikersvriendelike ontledingsware en kontrolepanele bekom word, benodig.
Wie bestuur die implementering van die projek?
Mnr Manie Lombard, Hoofdirekteur: Finansies, bestuur die implementering van die SUNFin-projek. Hy is ook voorsitter van die SUNFin Stuurkomitee, wat verteenwoordigers vanuit Finansies, Informasietegnologie, Fakulteitsbestuur, Inligtingsoorsigbestuur en die SUNStudent-projek insluit. Die Stuurkomitee word deur 'n projekbestuurspan bygestaan.
Watter veranderings sal die nuwe stelsel meebring?
Met die implementering van enige nuwe stelsel aan die US behoort daar ook oor die impak daarvan op ons mense en bedryfsprosesse besin te word. Hier volg 'n paar van die opwindende veranderinge wat SUNFin sal meebring:
- Die nuwe koppelvlak is gebruikersvriendelik en webgebaseer.
- Die, intydse interkommunikatiewe funksie- Oracle Social Networking , stel gebruikers in staat om met mekaar te kommunikeer. Sodoende kan onafgehandelde transaksies vinniger opgevolg en afgehandel word.
- Sigblaaie kan met SUNFin geïntegreer word om groot hoeveelhede data in te voer, en die stelsel kan verslae en tabelle met transaksies na Excel uitvoer vir verdere ontleding van groot hoeveelhede data.
- Kragtige verslagdoenings- en ontledingsware bied aan bedryfsbestuurders en besluitnemers regstreekse, voortdurende insae. Begrotingsbestuurders kan met een oogopslag die saldo's en ondersteunende transaksies op begrotings, verbintenisse, verpligtings, uitgawes en beskikbare fondse sien.
SUNFin word nie op die US kampus gehuisves nie. Toegang daartoe word verkry deur ʼn veilige kommunikatiewe protokol wat deur Oracle, as die huisvestingsgasheer, verskaf word.
Wie is betrokke by die SUNFin-projek?
Die geslaagde SUNFin implementering sal afhang van die verbintenis en ondersteuning van die leierspan en die betrokkenheid van personeellede en studente. Die SUNFin-projekbestuurspan verseker dat die regte belanghebbendes op die regte tyd betrek en in die gepaste kennis en vaardighede opgelei word om te sorg dat alle SUNFin-gebruikers daartoe verbind en daartoe in staat is om die nuwe werkswyse aan die US te omarm.