Die Senaat van
die US, die instelling se hoogste akademiese liggaam, het op 19 Maart 2021 ʼn
aanbeveling van die Akademiese Beplanningskomitee, ʼn subkomitee van die Senaat,
aanvaar dat daar vir die eerste semester van 2021 afgewyk word van fakulteite
se taalimplementeringsplanne, in dié sin dat dosente nuwe leermateriaal net in Engels
beskik hoef te stel, en nie ook Afrikaans soos bepaal in die huidige US Taalbeleid (2016) nie.
Dis is belangrik
om daarop te let dat hierdie besluit net vir die eerste semester van 2021
geld, spesifiek weens die bykomende werkslading veroorsaak deur die verskuiwing
na meer aanlyn onderrig weens COVID-19. Om dieselfde rede is dieselfde afwyking
vir die tweede semester van 2020 toegestaan.
Ook belangrik is
dat dit net nuwe leermateriaal raak. Dosente sal bestaande leermateriaal
wat reeds in Afrikaans bestaan, steeds aan studente kan verskaf.
In die
aanbeveling word verwys na die praktiese realiteit dat daar tydsbeperkinge is
om leermateriaal soos podsendings in beide Engels en Afrikaans op te neem. Wat
egter ook goedgekeur is, is dat dosente sterk aangeraai word om steeds die US
Taalsentrum te gebruik om hul Engelse podsendings in Afrikaans te vertaal waar
prakties uitvoerbaar.
(Die Taalkomitee
van die Raad het verlede jaar met waardering kennis geneem van die aanlyn
inisiatiewe van die Taalsentrum met ’n bepaalde klem op die bevordering van
meertaligheid gedurende noodafstandsonderrig. Ondanks vele uitdagings is daar
groot suksesse behaal, wat goed deur sowel personeellede as studente ontvang
is. Dít sluit in die vertaling van podsendings, aanlyn konsultasies deur die
Skryflaboratorium, en innoverende nuwe aanlyn kursusse en digitale bemarking te
midde van COVID-19.)
Voorts lui die
goedgekeurde aanbeveling dat dosente steeds behoort voort te gaan om in ander
vorme van leerfasilitering, soos aanlynbesprekingsforums en e-posse, student
deur middel van nie net Engels nie maar ook Afrikaans te ondersteun, soos deur
die betrokke modulespesifikasies vereis.
Wat nie deur
hierdie aanbeveling geraak word nie, is assessering. Dit sal steeds in beide
Engels en Afrikaans geskied. Met ander woorde, studente sal steeds hul
werkopdragte in Afrikaans kan indien as hulle wil, en ook toetse en eksamens in
Afrikaans kan aflê.
Die aanbeveling
hou geen verband met die hersiening van die US se Taalbeleid nie. Klik hier
vir meer inligting daaroor.