Onderwerp
Dringende kwessies soos klimaatsverandering, biodiversiteitsverlies en gronddegradasie is tereg en noodwendig op die voorgrond van die kurrikulum in Bewaringsekologie, wat dit die titel van ‘krisisdissipline’ besorg. Dit is onvermydelik dat studente gereeld met negatiewe nuus oor die stand van ons omgewing te doen kry. Die feite oor die probleme dra boonop weinig daartoe by om hulle hoop te gee dat die grade waarvoor hulle studeer enige merkbare verskil aan die wêreldwye uitdagings van die Antroposeen sal maak.
Die veldtog #dosomething ontwrig die gedagte dat “ons niks aan die probleme kan doen nie”. Studente word gevra om ’n dringende bewaringskwessie waaroor hulle in hulle eie, persoonlike hoedanigheid passievol is die hoof te bied. Deur ’n aantal leeraktiwiteite word semesterlesingtemas en -assesserings geïntegreer met individuele veldtogte wat aan die begin van die semester gekies word.
Iterasie oor vyf jaar het gelei tot 'n onderrig- en leerproses wat drie onverwagte voordele opgelewer het: a) Studente kry dit reg om wêreldwye verandering op groot tydskale met hulle eie lewenservarings te verbind, wat hulle in wese in staat stel om hulleself as deel van die stelsel te sien. b) Studente leer ken mekaar se lewenservarings en steek sosiale (rasse- en ekonomiese) grense oor om die sienings te verstaan van klasmaats met wie hulle nie andersins sou gesosialiseer het nie. c) Terwyl studente self verandering oor tyd moniteer, leer hulle dat hulle individuele optrede verandering en kreatiewe reaksies kan teweegbring.
Dit is nie om dowe neute dat die titel van my aanbieding Paulo Freire se pedagogie van hoop eggo nie. Ek besin ten slotte oor die metafisika van 'n benadering tot onderrig en leer wat hoop skep en mense aanmoedig om self op te tree.
Die Spreker
Dr Rhoda Malgas
Hoe kan ek my studente
kenmerke en vaardighede leer wat fundamenteel is vir bewaringskunde in ’n
onseker toekoms, maar wat moeilik is om uitdruklik te onderrig? Dít is die rede
vir my kreatiwiteit in die program BSc Bewaringsekologie. Ek gee klas in volhoubare
landbou, die volhoubare oes van wilde fynbos, en ekosisteemgoedere en -dienste
in landboulandskappe. Ek geniet veral my derdejaarmodule, Bewaring in
sosio-ekologiese stelsels.
Navrae & Bespreking
Lucy Lucks / Simbongile Ntwasa
llucks@sun.ac.za / sim@sun.ac.za
021 808 3717
