Dit is met skok
en hartseer dat die Stellenbosse Universiteitsgemeenskap vandag (Saterdag 1
Mei) van die afsterwe van ʼn lid van die Studenteraad, me Nomzamo Buthelezi,
verneem het.
Volgens die
inligting tot die Universiteit se beskikking, is me Buthelezi oorlede nadat sy
beseer is ʼn vermeende tref-en-trap-voorval in Merrimanlaan, Stellenbosch.
Me Buthelezi, ʼn BSc-student
van Gauteng, het in ʼn senior koshuis op die kampus gewoon.
“Ons is verpletter
deur die nuus. Sy was ʼn gewilde lid van die SR,” het dr Choice Makhetha, Senior
Direkteur: Studentesake, gesê.
“Die
omstandighede rondom haar dood maak deel uit van die polisie-ondersoek, so die
Universiteit wil nie nou daaroor kommentaar lewer nie, maar ons doen ʼn
dringende beroep op die polisie om seker te maak dat die skuldige party(e) aangekeer
word.
“Ons waardeer die
ondersteuning wat die nooddienste verskaf het, insluitend die hulp van Kampussekuriteit,”
het sy bygevoeg.
Mnr Xola Njengele,
SR-voorsitter, het gesê: “Ons is diepbedroef oor die verlies van ons geliefde
spanlid, Nomzamo Buthelezi. In haar rol as SR-beleidsbeampte en Voorsitter van
die Verenigingsraad het sy onskatbare bydraes tot ons span en die Universiteit
in die geheel gelewer.
“Voorts was sy ʼn
opregte vriendin en vertroueling, en het almal rondom haar diep geraak. Haar
heengaan laat ʼn groot leemte in ons harte en dié van haar vriende, familie en
kollegas. Dit was ʼn voorreg om met so ʼn dinamiese persoon saam te werk. Ons sal
jou mis, Nomzamo. ”
Prof Deresh
Ramjugernath, Viserektor: Leer en Onderrig, het die Universiteit se innige
meegevoel met me Buthelezi se familie en vriende betuig.
Die Universiteit is
in kontak met me Buthelezi se familie, en bied die nodige ondersteuning aan die
SR. Enige student wat berading benodig, word aangemoedig om die
24-uur-krisisdiens te kontak (010 205 3032 ná ure, en 021 808 4994
gedurende werksure).
Die Universiteit
bied sy volle ondersteuning aan Suid-Afrikaanse Polisiediens (SAPD), wat die
omstandighede rondom die voorval ondersoek, en doen ʼn beroep op die
kampusgemeenskap om die privaatheid van die betrokkenes te respekteer en om nie
op sosiale media oor die saak te bespiegel nie.
• Enigiemand met
meer inligting oor die voorval word versoek om die Stellenbosse SAPD te kontak, by telno 021 809 5015/12.