Prof Daniel Malan, medeprofessor in etiek en korporatiewe
bestuursgedrag aan die Universiteit Stellenbosch Besigheidskool (USB), is
aangestel as medevoorsitter van Besigheid Twintig (B20) se taakspan belas
met integriteit en voldoening vir 2020.
Die B20 is die amptelike struktuur vir dialoog tussen die
besigheidswêreld en die Groep van Twintig (G20), en verteenwoordig die
besigheidsgemeenskap in al die G20-lande; dit is die lande wat verantwoordelik is vir meer as 80%
van die wêreld se Bruto Nasionale Produk. Die B20, wat in 2010 tot stand gekom
het, was die eerste amptelike skakel met die G20, wat leiers van beide
ontwikkelde en ontwikkelende lande bymekaar bring. Suid-Afrika is die enigste
Afrika-lid van die G20.
Die taakspan het onlangs in Riyadh,
Saudi-Arabië, vergader. Volgens prof Malan
sal daar noue samewerking wees met die G20 se werksgroep oor antikorrupsie.
“Die aanstelling is vir my persoonlik ‘n groot eer, asook belangrike
internasionale erkenning vir die USB. Die belangrikste bydrae van die B20 is die
ontwikkeling van beleidsvoorstelle. Lidlande van die B20 fokus tans op die
verbetering van integriteit en voldoening in alle industrieë. Ons sien daarna
uit om saam met die ander taakspanne te werk, asook met ander strukture van die
G20, om sodoende integriteit in al die lidlande te bevorder,” het hy gesê.
Die oorgrote meerderheid van die ses taakspanne van die B20 bestaan
uit sakeleiers uit die onderskeie lande, met slegs ‘n paar verteenwoordigers
uit die akademie. “Dis nie ‘n teoretiese oefening nie,” sê prof Malan. “Die fokus is
op beleidsvoorstelle en spesifiek op die implementering daarvan, wat die sukses
van die B20-aktiwiteite gaan bepaal.” Daar kan onder meer gekyk word na die rol
van tegnologie, staatsaankope en ondernemings in staatsbesit – wat alles besonder
relevant in Suid-Afrika is.
Die taakspan sal vanjaar ‘n paar keer vergader om beleidsvoorstelle en uitvoerbare optrede vir die G20 te ontwikkel, voordat hulle hul
aktiwiteite afsluit met die formele oorhandiging daarvan aan die G20-leiers by die jaarlikse
B20-beraad in Riyadh in Oktober 2020.
