Die Universiteit Stellenbosch (US) waardeer die geleentheid om deur formele
Memoranda van Verstandhouding (MVV’s) met plaaslike regerings te kan saamwerk. Die
Universiteit het bestaande MVV’s met die Wes-Kaapse Regering (WKR) en die Stad
Kaapstad deur sy lidmaatskap van die Kaapse Hoëronderwyskonsortium (KHOK). Die
US het ook MVV’s met die Stellenbosch en die Drakenstein Plaaslike
Munisipaliteit (al twee in die Kaapse Wynlande-distriksmunisipaliteit); die Saldanhabaai
Plaaslike Munisipaliteit (in die Weskus-distriksmunisipaliteit); asook die Hessequa
Plaaslike Munisipaliteit en, mees onlangs, die Oudtshoorn Plaaslike
Munisipaliteit (al twee in die Eden-distriksmunisipaliteit).
Die Universiteit met sy visie van inklusiwiteit,
innovasie en toekomsgerigtheid, en met sy fokus op die ontwikkeling van personeel
en studente as denkleiers in die bevordering van positiewe sosiale impak in die
samelewing, gaan voortaan ’n sleutelrol in die ontwikkeling van menslike en
infrastruktuurpotensiaal in Oudtshoorn hê. ’n Amptelike MVV tussen die US en Oudtshoorn
is op 18 Mei 2018 deur prof Nico Koopman, Viserektor: Sosiale Impak, Transformasie
en Personeel, en die Uitvoerende Burgemeester van Oudtshoorn, rdl Colan
Sylvester, onderteken. “Deur die ondertekening van die MVV verstewig en
versterk die Universiteit Stellenbosch sy aktiwiteite en inisiatiewe in die Oudtshoorn-streek,”
sê dr Leslie van Rooi, Senior Direkteur: Sosiale Impak en Transformasie.
Die strategiese fokus van die ooreenkoms val op die
onderwysvennootskapprojek vir Oudtshoorn-skole, ondersteun deur die direkteur
van die Sentrum vir Pedagogie (SUNSEP), dr Trevor van Louw, die Eden-kunsakademie,
asook die skolekunstefees wat strategies deur die direkteur van die US Woordfees,
me Saartjie Botha, gestuur word. Die vestiging van ’n Agri-Park om in die
behoeftes van die Klein-Karoo in sy geheel te voorsien, sover dit die plaaslike
landbou-ekonomie betref, vorm die derde strategiese fokus. Die Universiteit gaan
verder Oudtshoorn se strategieë vir die implementering van sporttoerisme, die
uitbouing van gesonde en sosiaal stabiele gemeenskappe, die bemagtiging van ’n
werksmag en gemeenskappe, die bevordering van goeie regering, en die
stimulering van die plaaslike ekonomie deur die Geïntegreerde Ontwikkelingsplan
(GOP) en Plaaslike Ekonomiese Ontwikkeling (PEO) ondersteun.
Soos met ander soortgelyke MVV’s, maak hierdie ooreenkoms
deur kapasiteitskepping en gesamentlike inisiatiewe van die US se intellektuele
kapitaal en die munisipaliteit se burgerlike infrastruktuur gebruik, ten einde die
ontwikkelingsbehoeftes van die munisipaliteit aan te spreek. Inisiatiewe maak
’n integrerende deel van die Oudtshoorn Munisipaliteit se GOP uit.
US-personeel en -studente word genooi om deur middel van verbonde-akademieskap-
en ‑burgerskapinisiatiewe medewerkende sosiale-impakinisiatiewe met die gemelde
munisipaliteite aan te gaan wat die geïdentifiseerde ontwikkelingsgebiede, of
enige ander moontlike gebiede, sal bevoordeel. Tree gerus met die Bestuurder: Verbonde
Akademieskap in die Afdeling Sosiale Impak, mnr
Mawethu Nyakatya, in verbinding. Voorbeelde van bestaande US Sosiale-impakinisiatiewe
met munisipaliteite is beskikbaar op die Sosiale-impakkennisplatform.
