Twee Voedselwetenskapstudente, Emma van der Merwe en Lara Moller, is die toppresteerders vanuit die Fakulteit AgriWetenskappe wat na die Universiteit se jaarlikse prestige-aand vir eerstejaarstudente genooi is.

Die geleentheid by Neethlingshof het die akademiese prestasies van diegene wat in 2015 eerstejaars was gevier. Erkenning is gegee aan die verskillende fakulteite se topstudente. Dié studente het ook elkeen kans gehad om die dosente te nomineer wat tot dusver die grootste positiewe impak op hul studies gemaak het.

Emma is 'n Bolander wat aan Worcester Gimnasium gematrikuleer het. Sy is baie opgewonde oor die opsies wat vir haar wag as voedselwetenskaplike, en hoop om eendag daardeur 'n verskil in mense se lewens te maak.

Emma het haar chemielektor, dr Gareth Arnott genomineer. "Hy maak chemie pret en verstaanbaar, en kry dit altyd reg om 'n positiewe energie uit te straal."

​Lara kom van Durban, waar sy aan Westville Meisieskool gematrikuleer het. Oor haar keuse van Voedselwetenskap as studierigting sê sy: "Dit voel asof ek 'n manier gekry het waardeur ek wetenskap kan kombineer en steeds 'n impak op die mense rondom my kan hê."

Sy sê die energie en grappies waarmee Voedselwetenskapdosent prof Pieter Gouws sy lesings aanpak het 'n groot indruk op haar gemaak. Sy ondersteuning het haar gehelp om 'n sukses van haar kursus te maak.

Prof Gouws sê dit was 'n groot eer om om hierdie wyse erken te word. "Om op so 'n wyse erken te word, besef jy net die belangrike taak wat elke dosent het."