Die sentrale geleentheids- en konferensiekantoor (CECO) van die Universiteit Stellenbosch (US) is vereer met 'n toekenning vir uitnemendheid in sakegeleenthede van die Southern African Association for the Conference Industry (SAACI) 2024 op hul jaarlikse kongres en as deel van die Enkula-toekennings.
Anita Nel, Hoofbestuurder Innovasie en Kommersialisering, sê hierdie toekenning is 'n werklike weerspieëling van CECO se impak op sake-toerisme aktiwiteite in Stellenbosch. “Dit beklemtoon die span se uitsonderlike pogings om die sosiale, kulturele en omgewingslandskap van die gemeenskap te transformeer deur innoverende geleentheidsbestuur."
CECO, wat deel vorm van SUNCOM, en funksioneer onder die sambreel van Factory 209 het homself gevestig as 'n onontbeerlike hulpbron vir geleentheidsbeplanning regoor die universiteit se verskeie afdelings en die breër sakegemeenskap in Stellenbosch. Die kantoor bedien 'n diverse kliëntebasis, insluitend personeel, studente, alumni en eksterne belanghebbendes. Deur 'n eenstopwinkel, gestroomlynde benadering in te sluit, het CECO die dikwels komplekse wêreld van gebeurtenisbeplanning suksesvol vereenvoudig deur dit toeganklik en doeltreffend te maak vir almal betrokke.
Catherine Channing, CECO se bestuurder, sê die kantoor se sukses word deuidelik in hulle portefeulje weerspieël — dit strek oor 'n wye verskeidenheid geleenthede van vergaderings, konferensies, grootskaalse sportgeleenthede, konserte en rolprentproduksies. “Die vermoë om aan te pas en hul toewyding aan uitnemendheid, het nie net CECO se portfolio verbeter nie, maar ook die dorp Stellenbosch geposisioneer as 'n primêre bestemming vir sakegeleenthede."
Die jaarlikse Meet Stellenbosch-geleentheid, 'n inisiatief wat instrumenteel was in die vertoning van die dorp se potensiaal as 'n sakebestemming, het ook bygedra tot CECO se sukses deur hulle uit te daag om elke jaar beter te presteer en met die industrie-standaard tred te hou. Stellenbosch het onlangs verskyn op die ranglys van die Internasionale Kongres- en Konvensie-assosiasie (ICCA) Land en Stad – 'n prestasie wat die impak van sulke aktiwiteite illustreer, aangesien dit die eerste keer as dat die dorp apart van Kaapstad gelys is.
Volgens Channing beklemtoon CECO se filosofie, om "#BeyondEventing" te gaan, hul verbintenis om 'n blywende positiewe impak in die sake-, sosiale en akademiese gemeenskap te maak. “Hierdie benadering het 'n duidelike standaard in die industrie gestel, wat bewys dat innovasie in geleentheidsbestuur 'n kragtige instrument vir sosiale en ekonomiese ontwikkeling kan wees. CECO werk gereeld saam met plaaslike KMO's en organisasies om te verseker dat klein ondernemings en entrepreneurs as verskaffers gelys word, wat verseker dat hulle 'n inkomste ontvang," sê Channing.
“Die toekenning, wat by die SAACI-kongres op 29 Julie 2024 oorhandig is, beklemtoon CECO se potensiaal vir toekomstige innovasie en groei. Soos die US voortgaan om sy posisie as 'n leier in hoër onderwys en innovasie in Afrika te versterk, sal CECO se rol in die stimulasie van die plaaslike ekonomie en die bevordering van gemeenskapsbetrokkenheid verder die Universiteit se reputasie as 'n sentrum van innovasie en uitnemendheid versterk," sê Channing.
