Prokureur Neville Naidoo het die belangrike taak om enige regsuitdagings en potensiële risiko's wat oor die Universiteit Stellenbosch (US) se pad kom, aan te spreek. Hy is sedert Februarie die Universiteit se Direkteur: Regsdienste nadat hy die golwende suikerrietbedekte heuwels van KwaZulu-Natal – waar hy die regsadviseur aan die Universiteit van KwaZulu-Natal was – vir die wynlande van Stellenbosch verruil het.
Naidoo, wat meer as 15 jaar regsondervinding het, het met die Afdeling Korporatiewe Kommunikasie en Bemarking gesels oor sy verwagtinge van sy nuwe rol by die US, die verwagte regsimplikasies van die gebruik van KI in hoër onderwys en die vreugde om 'n tweeling groot te maak.
Wanneer het jy in jou nuwe pos begin?
My eerste dag op kantoor was 1 Februarie 2024.
Waarna sien jy die meeste uit in hierdie nuwe rol?
Hierdie rol bied 'n nuwe regslandskap propvol vars geleenthede om die US se evolusie strategies te hanteer. Dit bied die geleentheid om nou saam te werk met verskeie belanghebbendes, insluitend die Rektoraat, administrateurs en eksterne regsadviseurs, om wetlike hindernisse aan te spreek en die Universiteit se vordering te bevorder.
Ek sien daarna uit om innoverende regsoplossings te formuleer en te implementeer wat met die instelling se transformerende doelwitte ooreenstem, om risiko's te verminder en om 'n ondersteunende omgewing te kweek wat bevorderlik is vir volhoubare groei en sukses. Die US is bekend vir administratiewe doeltreffendheid, iets wat die kapasiteit van algehele ontwikkeling baie help, en ek sal daarna strewe om deel daarvan te wees.
Wat is van die belangrikste (wetlike) uitdagings binne die hoëronderwysruimte en wat dink jy sal die US waarskynlik oor die volgende paar jaar die hoof moet bied?
Binne die Suid-Afrikaanse hoëronderwyslandskap bied bestuur 'n beduidende regsuitdaging vir instellings soos die US. Die behoud van institusionele outonomie terwyl gemeenskapsdeelname en -betrokkenheid moontlik gemaak word, bly 'n uitdagende kwessie. In die jare wat voorlê, sal die US waarskynlik sy pad moet vind deur kompleksiteite wat met oorsigbestuur verband hou, 'n balans tussen outonomie met regulatoriese nakoming moet vind en doeltreffende besluitnemingsprosesse te midde van ontwikkelende sosiopolitieke dinamika moet verseker.
Is die regsimplikasies van kunsmatige intelligensie (KI) in hoër onderwys 'n spesifieke fokus – soos byvoorbeeld die gebruik daarvan in assesserings en kopiereg- en skendingsrisiko's van AI?
AI sal instrumenteel wees in die bepaling van dinge in die toekoms gaan lyk. 'n Belangrike aspek in hoër onderwys is die oorweging van die regsimplikasies van die groei van KI, veral in assesserings en die bestuur van kopieregrisiko's. Die US moet etiese kwessies ten opsigte van die gebruik van KI in assesserings oorweeg ten einde en regverdigheid, deursigtigheid en nakoming van privaatheidsregulasies te verseker. Terselfdertyd verg die bevordering van KI vir sy voordele, soos die verbetering van leerervarings en om administratiewe take stroombelyn te maak, proaktiewe maatreëls om regskompleksiteite aan te spreek.
Dit sluit die formulering en opstel van duidelike riglyne vir die gebruik van KI, die bevordering van navorsing oor die potensiaal van KI en die ontwikkeling van beleide om beskerming teen kopieregskending te bied, in terwyl innovasie in die onderwys aangemoedig word. Dit is uiters belangrik vir universiteite om 'n balans tussen regsoorwegings en die bevordering van KI se voordele te handhaaf ten einde hulle pad deur die ontwikkelende landskap van hoër onderwys te vind.
Het jy na Stellenbosch verhuis en geniet jy die dorp?
Ek pendel tans nog tussen Durban en Stellenbosch terwyl ek meer langtermynverblyf vir my gesin reël. Hoewel verhuising 'n destabiliserende gebeurtenis kan wees, is Stellenbosch se prag, natuurskoon en aantrekkingskrag uniek en ongeëwenaard.
Hoe ontspan jy of wat doen jy in jou vrye tyd wanneer jy nie besig is om regsadvies aan US-personeel en -bestuur te verskaf nie?
Vir my is 'n mens se gesin die heilige middelpunt van die lewe. Ek ontspan en vind vreugde daarin om saam met my vrou ons tweeling-kleuters groot te maak. Hulle fassinasie met die eenvoudige skoonheid van die lewe bring eindelose vreugde en herinner 'n mens om elke oomblik te koester. Ons geniet die buitelewe en om te stap, en om tyd op die strand saam met ons oorgretige Boston-terriër, Sir Lewis, deur te bring.
Foto: Stefan Els
