Lamese Chetty is 'n akademiese adviseur wat ʼn unieke ondersteunende rol by die Fakulteit Geneeskunde en Gesondheidswetenskappe speel. Talle studente wat met geestesgesondheids- of leerprobleme sukkel, gee haar krediet daarvoor dat sy hulle gehelp het om struikelblokke te oorkom sodat hulle hul volle potensiaal kan bereik. Ons vier Werkersdag in Mei en dra hierdie reeks profiele op aan ons personeel en hul bydraes van deurslaggewende belang tot die Universiteit Stellenbosch (US). In hierdie onderhoud vertel Chetty ons meer van haar werk.
Wat behels jou rol aan die US?
Ek is die akademiese adviseur by die Fakulteit Geneeskunde en Gesondheidswetenskappe (FGGW) en ek dink hierdie is die eerste pos van sy soort by die US. Ek rapporteer aan die Visedekaan: Leer en Onderrig van die fakulteit en maak deel uit van die Studente-ondersteuningsafdeling. Ek sien alle voorgraadse studente in die fakulteit wat dalk uitdagings ervaar wat hul akademiese prestasie beïnvloed. Ek skakel met die toepaslike akademiese en ondersteuningspersoneel om hulle toe te laat om hierdie uitdagings te verstaan en maniere te vind om die studente tegemoet te kom.
Hoe lyk ʼn tipiese werkdag?
ʼn Tipiese dag bestaan uit studente wat afsprake vir akademiese ontwikkeling en ondersteuning maak en versoeke van departemente vir groepwerksessies. Die onderwerpe sluit in die implementering van ʼn gestruktureerde roetine, studie- en leerstrategieë, vaardighede vir die neem van aantekeninge, meta-kognitiewe/denkvaardighede, assesserings-/eksamenvoorbereidingstegnieke, emosionele intelligensie in groepe, asook hoe om empatie en verstandhoudinge te bou. Ek kry navrae van studente wat moontlik met geestesgesondheids- of leerafwykings gediagnoseer is en ek sien hulle vir psigo-opvoedkundige ondersteuning.
Ek bestuur ook die tutorprogramme. Dit is studentegedrewe en ons het 110 mentors en 40 vakspesifieke tutors vir die fakulteit. Ons is bevoorreg om hierdie intellektuele en emosioneel gesonde studente te hê wat hul eweknieë in hierdie fakulteit wil ondersteun.
Ek woon ook vergaderings met personeel by om studente te help wat agter geraak het. Tyd vir kliniese oefening is van deurslaggewende belang en studente moet inhaal as hulle siek was en uitgemis het.
Ons het ʼn ongelooflike studente-ondersteuningsafdeling by die fakulteit met passievolle kollegas wat as ʼn multivlak-kampusondersteuningspan werk. Dit sluit in Studente-administrasie, die Kampusgesondheidsdiens, die Sentrum vir Studentevoorligting en -ontwikkeling en Studentesake.
Hoe het jou opleiding of vorige ervarings jou vir hierdie werk voorberei?
Ek het ʼn graad in sielkunde aan die Universiteit van Wes-Kaapland verwerf en ʼn nagraadse sertifikaat in onderwys by Unisa. Ek het ook my meestersgraad in opvoedkundige sielkunde aan die US verwerf, en is as ʼn opvoedkundige sielkundige by die Raad vir Gesondheidsberoepe van Suid-Afrika (RGBSA) geregistreer.
My ervaring en kwalifikasies het my intensief vir hierdie rol voorberei. Ek het 11 jaar lank as ʼn geregistreerde berader in akademiese ondersteuning in die tegniese beroepsopleiding- en opleidingsektor (TVET) gewerk en ses jaar as ʼn opvoedkundige sielkundige. Ek het 17 jaar ondervinding in akademiese ontwikkeling en ondersteuning. Ek verstaan die leeruitdagings wat studente ervaar en ek glo vas in inklusiewe onderwys binne tersiêre omgewings.
Wat geniet jy die meeste van jou rol en werk by die US?
Ek geniet dit om studente te lei en te ondersteun in hulle oorgang van skool na hierdie nuwe, diepsinnige akademiese ruimte. Wanneer hulle die US betree, leer hulle om onafhanklik, selfversorgend en veerkragtig te word en het ondersteuning nodig om hierdie vaardighede te ontwikkel. Ek vind ek kan my kundigheid gebruik om hulle van raad te bedien om hierdie vaardighede te ontwikkel, en mettertyd leer hulle om sielkundig gesonde burgers in ons land en verder te word. Die US bied my die perfekte omgewing om dit te doen, veral die Tygerberg-kampus, waar kollegas groot klem op die fisiologiese en sielkundige gesondheid van gesondheidswetenskapstudente lê.
Vertel ons iets opwindends oor jouself wat min mense sou verwag?
Hardloop is my terapie. Ek het gedurende die grendeltyd met langafstande begin en in 2022 ernstig betrokke geraak. Ek het verlede jaar my eerste halfmarathon voltooi en gaan vanjaar my eerste volle marathon aandurf!
Ek is ook die aangewese grimeerkunstenaar en -stilis in my familie- en vriendekring. Wanneer my gemeenskap geleenthede het, verf ek die kinders se gesigte. Dit besorg hulle soveel vreugde en die geleentheid om my kreatiwiteit te beoefen, maak my ook gelukkig.
FOTO: Stefan Els
