Hierdie miniskool bespreek ʼn keur van onderwerpe wat met materiaalwetenskap en die toepassings daarvan in energieomsetting verband hou. Die eerste lesing bespreek die belang en unieke eienskappe van 2D-materiaal vir fotokatalise en fotovoltaïka, en die belang van 2D-heterostrukture vir die versterking van hierdie toepassings. Die tweede lesing bespreek die huidige uitdagings ten opsigte van herlaaibare batterye en brandstofselle, en hoe rekenaarhulpmiddels gebruik kan word om geleivermoë en rendement te verbeter. Die derde lesing fokus op grafeengebaseerde katalisators vir brandstofselle en hoe rekenaarhulpmiddels aangewend kan word om nuwe materiale vir hoëkapasiteits- energieomsetting te ontdek. Die skool sluit af met ʼn lesing wat die toepassing van fotosintetiese beginsels vir die ontwerp van doeltreffende sonenergiestelsels, met die fokus op organiese polimeer-sonselle en kleurstofgesensitiseerde sonselle, bekendstel.​​