U word uitgenooi na die vierde en laaste seminaar van die Virtuele Seminare vir Leer- en Onderrigverryking vir 2021, onder beskerming van die Viserektor (L&O), Prof Deresh Ramjugernath, en die Afdeling Leer- en Onderrigverryking.
Onderwerp
ʼn Heeltemal nuwe wêreld: Oorbrug die gaping tussen kritiese digitale onderrigmetodiek en die (nuwe) geoutomatiseerde virtuele onderrig- en leeromgewing
Aanbieder
Dr Sonja Strydom
Dr Sonja Strydom is die Adjunk-Direkteur (Akademiese Ontwikkeling en Navorsing) by die Sentrum vir Leertegnologieë asook 'n Navorsingsgenoot by die Sentrum vir Hoër en Volwassene Onderwys. Sy het 'n DLitt et Phil in Sielkunde en 'n PhD in Kurrikulumstudie verwerf. Sonja doseer in 'n verskeidenheid nasionale- en internasionale nagraadse kursusse. Haar huidige navorsingsbelangstelling is tegnologie-gemedieërde kurrikulumontwikkeling, kritiese oorwegings in die geoutomatiseerde klaskamer en digitale welstand.
Reklameteks
Daar is al heelwat oor die Vierde Industriële Revolusie, outomatisering en een-en-twintigste-eeuse vaardighede geskryf. Hierdie narratiewe het ook al hulle weg gebaan na die gebied van die hoër onderwys. Wêreldwyd word daar van hoëronderwysinstellings verwag om vooruitdenkend te wees en nuwe tegnologiese vooruitgang, soos kunsmatige intelligensie en masjienleer, aan te gryp. Hierdie seminaar sal beklemtoon hoe belangrik dit is om hierdie twee wêrelde krities in oënskou te neem. Dit vereis dat ons op die unieke kontekstuele behoeftes van studente in verskillende instellings reageer, terwyl ons terselfdertyd ʼn dieper begrip ontwikkel van die geleenthede en impak wat outomatisering, en spesifiek kunsmatige intelligensie, in onderwys kan bied. Die seminaar kan beskou word as die eerste stap in die bewusmaking van en die aanvoor van die bespreking oor hierdie belangrike komponente, en oor hoe ons as dosente en professionele administratiewe steundienstepersoneel, steeds binne die Universiteit Stellenbosch en die breër leeromgewing in hoër onderwys hierop kan reageer.
Tyd: 13:00 – 14:00, 21 Oktober 2021 op MS Teams
Skakel vir die Microsoft Teams vergadering
Klik hierdie skakel om by die seminaar aan te sluit
Navrae: Anthea Jacobs (jacobsa@sun.ac.za)
