​Wat is Plantpatologie?

Plantpatologie word omskryf as die studie van die organismes en omgewingstoestande wat siekte in plante veroorsaak, die meganismes waardeur dit voorkom, die interaksies tussen hierdie veroorsakende faktore en die plant (uitwerking op plantgroei, opbrengs en gehalte), en die metodes waardeur plantsiekte bestuur en beheer word.  Dit maak ook gebruik van ander wetenskaplike velde soos mikologie, mikrobiologie, virologie, biochemie, bio-informatika, ens.​

Die Departement Plantpatologie

Dit is die visie van die Departement om nasionaal en internasionaal erken te word as 'n akademiese departement wat onderrig en navorsing van die beste gehalte bied deur 'n omgewing te skep wat die ontwikkeling en produktiwiteit van studente en personeel ondersteun en aanmoedig. Dit word gedoen deur verbintenisse met die bedryf te vestig en in stand te hou,deur strategies gerigte navorsingsprogramme en dienslewering, en deur nasionale en internasionale samewerking te kweek vir innoverende en voorpunt-navorsing wat op volhoubare voedselproduksie gerig is.

Die Departement Plantpatologie het 'n holistiese en interdissiplinêre benadering tot navorsing en opleiding en maak van die jongste tegnologieë gebruik ten einde die impak van patogene op plante te verminder en die weerstand van plante te verhoog. Konvensionele en molekulêre tegnieke word op 'n volhoubare en ekonomiese wyse gebruik om plantpatogene wat 'n bedreiging vir plaaslike oeste en uitvoermarkte is, te beheer.

Programinligting​​

Voorgraadse programme

BScAgric (Plant en Grondwetenskappe) 

Die vierjaarprogram in plant- en grondwetenskappe bied opleiding in die produksie van akkerbou- en groentegewasse, weidingsgewasse, aromatiese plante, sagtevrugte, sitrus, fynbos en wingerd. Vir elke gewas is kennis van die volgende in 'n betekenisvolle geheel geïntegreer:  landbou-ekonomie, biochemie, biometrie, oesproduksie, entomologie, genetika, nematologie, plantpatologie en grondkunde.

In hierdie program is daar drie studierigtings waaruit studente kan kies. 

• Gewasproduksiestelsels: In hierdie studieterrein ontvang jy opleiding in die produksie en gehaltebestuur van onder andere akkerbougewasse, sagtevrugte, sitrus, fynbos, wingerd en kweekhuisgewasse.
  
•  Gewasbeskerming en -teling: Hierdie studieterrein lei jou op as deskundige in gewasbeskerming  (entomologiese en nematologiese plae, plantsiektes en die beheer daarvan) en genetiese gewasverbetering (kweking en manipulasie).​
  
• Grond- en Waterbestuur:  Hierdie studieterrein rus jou toe met die kundigheid om die aard, belangrikheid en bestuur van grond en water met betrekking tot gewasproduksie te verstaan.
  

Die keuse van studie in een van hierdie drie rigtings berei jou voor vir verskeie loopbane in die landboubedryf of landbouverwante industrieë, waaronder loopbane as adviseur, konsultant, entrepreneur, bestuurder, tegnikus en navorser. 

Nagraadse programme​

HonsBSc (Plantpatologie)

MSc (Plantpatologie)

PhD (Plantpatologie)

Navorsing​

Die Departement Plantpatologie is aan die voorpunt van navorsing om die impak van patogene (aansteeklike siektes) op oeste te verminder en oesweerstand te verhoog en sodoende momentum aan voedselproduksie te verleen.  Dit word al belangriker omdat 40% van alle voedsel wat geproduseer word weens plantsiekte, plae en onkruid verlore gaan en die wêreldbevolking teen die jaar 2050 'n geraamde 9 biljoen sal bereik.

Die Departement word weens sy programme oor patogene in wingerd en sagtevrugte-oeste as 'n wêreldleier beskou en gegradueerdes speel, nie net in Suid-Afrika nie maar ook internasionaal, 'n leiersrol in hierdie veld.  Navorsing is veral gerig op die beskerming van vrugte-, sitrus-, groente- en graanoeste deur middel van geïntegreerde patogeenbestuur en plantverbetering.

Navorsingsprogramme oor siektes van druiwe en sagtevrugte is stewig in die Departement gevestig, terwyl navorsingsprojekte oor siektes van sitrus-, groente- en graanoeste meer onlangs ingestel is.​

'n Omvattende lys van alle navorsingsartikels is beskikbaar by http://www.sun.ac.za/research/en/research-report
​

Navorsingsfokusterreine

• Vooroes Siektebestuur
• Naoespatologie
• Molekulêre Plantpatologie

Navorsingskundigheidsterreine

• Fusarium Navorsing
• Vrug- en Naoes-patologie
• Wingerdpatologie
• Sitruspatologie
• Oömiseetkarakterisering en -opsporing

Personeel

Akademies

Tegniese & Ondersteunend Personeel