StudentELEWE
GODSDIENS
Stellenbosch bied verskeie moontlikhede vir
studente van verskillende geloofsgemeenskappe. Die dorp het ’n aantal kerke,
sowel as ’n sinagoge en moskee.
vermaak
Om op ’n wyntoer te gaan is een van studente se
gunstelingtydverdrywe. Stellenbosch is omring deur pragtige wingerde, en baie
van die plase bied gratis wynproesessies vir die publiek aan. Die meeste bedien
ook koffie of selfs iets te ete. Brosjures oor die verskillende wynroetes in
die streek is by die meeste toerisme-agentskappe te kry. Wees ook op die uitkyk
na kos- en wynfeeste in die Stellenbosch-omgewing. Vir verdere inligting,
raadpleeg die webtuiste van Stellenbosch Wynroetes.
Stellenbosch is ’n lewendige dorp met heelwat
aktiwiteite vir oud én jonk. ’n Eklektiese versameling restaurante en kroeë,
prentjiemooi wynplase, teaters en konsertsale sal sorg dat jy altyd iets het om
jou mee besig te hou. Vir verdere inligting oor wat tans op Stellenbosch aan
die gang is, gaan na die webtuiste Vibescout.
restaurante
Die wye verskeidenheid restaurante,
koffiewinkels en kitskoswinkels deur die hele Stellenbosch het iets vir elke
smaak en begroting. Die gebied rondom Dorp-, Kerk-,Andringa- en Ryneveldstraat is veral feestelik,
en jy sal heelwat toeriste hier aantref wat buite oor ’n bord kos, koppie
koffie of glas wyn kuier.
sport en ontspanning
As jy sport geniet, is die Universiteit Stellenbosch die ideale plek om te studeer. Die Universiteit is trots op sy geskiedenis van uitmuntende sportprestasies. Die tuiste van sport is Coetzenburg, waar nie net provinsiale en nasionale spelers hulle talent slyp nie, maar waar duisende studente ook net vir ontspanning en pure pret aan 'n verskeidenheid sportsoorte deelneem. Coetzenburg is tussen Stellenboschberg en die Eersterivier geleë en kyk uit oor die asemrowende bergtonele van die Jonkershoekvallei, wat dit een van die voorste sportkomplekse in die land maak. Dit dien ook as 'n oefenterrein vir internasionale superatlete.
Die Universiteit het meer as 20 mededingende sportklubs vir prestasiesport. Maties Rugby, wat in 1880 gestig is, is die oudste en gewildste, en het al ten minste 150 Springbokspelers en nie minder nie as elf Springbokkapteins opgelewer. Ons ander klubs, veral atletiek en hokkie, het ook al diep spore in die sportwêreld getrap.
Die Universiteit bied die volgende sportsoorte aan: atletiek, pluimbal, basketbal, kanovaart, krieket, landloop, fietsry, duik, skerm, gholf, gimnastiek, hokkie, perdry, judo, skerpskutterskuns, netbal, valskermspring, roei, rugby, sokker, muurbal, branderry, swem, gesinchroniseerde swem, tafeltennis, tennis, driekamp, onderwatersport, vlugbal, waterpolo en stoei.
verenigings
Daar is 'n wye verskeidenheid verenigings wat deur studente met gemeenskaplike belangstellings gestig en bedryf word. Dít sluit in 'n voetslaanklub, verskeie godsdienstige verenigings, en klubs vir digkuns, drama, rolprente en baie meer. Nader gerus die Studenteraadskantoor (op die derde verdieping van die Neelsie) vir kontakbesonderhede van die verskillende verenigings.
Klik hier vir 'n lys verenigings.
