belangrike plekke/fasiliteite
rekenaarfasiliteite
Verskeie rekenaarsentrums op kampus bied
rekenaars met internettoegang vir studente se gebruik. Toegang tot die netwerk
is eers ná registrasie beskikbaar, en vereis ’n gebruikernaam en wagwoord. Hoewel
jy ná registrasie voltyds toegang tot die rekenaarsentrum sal hê, kan jy ook
jou eie skootrekenaar saambring, wat jy by die Universiteit se Afdeling IT vir
netwerktoegang kan registreer.
Jou studentekaart bied toegang tot die
rekenaarsentrums op kampus. Aansluitingspunte vir persoonlike en skootrekenaars
is in die meeste universiteitskoshuise beskikbaar. ’n Vorm (op die webtuiste
van die Afdeling IT) moet voltooi word om
aansoek te doen om by die netwerk aan te sluit. Studente kan vir die
rekenaarfasiliteite by die onderskeie rekenaarkamers hieronder registreer. Die
registrasiefooi word jaarliks bepaal en per semester gehef.
Die fooi sluit onbeperkte e-postoegang in, maar
’n ekstra fooi moet betaal word vir toegang tot eksterne webtuistes. Toegang
tot die Universiteit Stellenbosch se tuisblad is gratis. Let daarop dat die
rekenaarsentrum wat jy gebruik, afhang van die fakulteit waarin jy studeer. As
jy in jou akademiese departement rekenaartoegang sal hê, is dit goedkoper om nie
by ’n rekenaarsentrum óók te registreer nie.
Lettere en Sosiale Wetenskappe, Regsgeleerdheid, Opvoedkunde, Teologie |
Humarga Letteregebou
Derde verdieping |
AgriWetenskappe, Natuurwetenskappe |
NARGA
Admin A
|
Ekonomiese en Bestuurswetenskappe
|
FHARGA Rekeningkunde en Statistiek |
Ingenieurswese
|
FIRGA
Ingenieurswesegebou |
universiteit STELLENBOSCH biblioteek
Die Universiteit Stellenbosch Biblioteek is een
van die grootste ondergrondse biblioteke ter wêreld. Dit bevat meer as
600 000 fisiese boeke en gebinde tydskrifte. Die totale vloerruimte is so
groot soos drie rugbyvelde (17 000 m2). Daar is studieruimtes vir
meer as 1 400 studente, en 27 studiehokkies vir nagraadse studente.
Verskeie seminaarkamers vir gespreksgroepe is ook te kry (moet vooraf by
ontvangs bespreek word).
Van die US Biblioteek se versamelings word buite
die hooffasiliteit, elders op die Stellenboschkampus, gehou, maar alles is op
’n rekenaardatabasis gekatalogiseer. Boonop is daar ’n hele paar ander
satellietbiblioteke om die verskillende fakulteite te bedien, waaronder die
Teologiebiblioteek, die Regsbiblioteek en die Mediese Biblioteek by Tygerberg. Die
Konservatoriumbiblioteek het ’n groot musiekversameling waarna jy in
individuele luisterhokkies kan luister, sowel as ’n uitgebreide versameling
bladmusiek. Raadpleeg die webtuiste van die US Biblioteek vir toegang tot
aanlyn databasisse en vaktydskrifte, en om boeke op reserwe te plaas en
tussenbiblioteeklenings aan te vra. Die afdeling vir nasionale en
internasionale tydskrifte en koerante is op die onderste verdieping geleë. Daar
is ook ’n fotokopieerkamer op die boonste verdieping. Die kopieermasjiene werk
met jou studentekaart. Geregistreerde studente het hulle studentekaarte nodig
om die biblioteek binne te gaan en boeke uit te neem.
As jy nie een van die biblioteekpersoneellede
van aangesig tot aangesig kan spreek nie, gebruik gerus ons e-navraagstelsel, Vra ’n bibliotekaris.
Die biblioteek is gesluit op openbare
vakansiedae en op die eerste en laaste Saterdag van die jaar. Veranderinge aan
biblioteektye word gewoonlik by die ingang geadverteer, maar is ook te kry by: https://libguides.sun.ac.za/hours.
Vir verdere inligting oor die US Biblioteek en
sy dienste, gaan na https://library.sun.ac.za/af-za/Pages/Home.aspx.
die LANGENHOVEN-STUDENTesentrum (NEELSIE)
Die Langenhoven-studentesentrum, wat beter
bekend is as die Neelsie, is die sosiale hartklop van die kampus. Dit heet na
die Afrikaanse skrywer CJ Langenhoven, wat ook aan die Universiteit studeer
het. Hierdie moderne sentrum bied studente ’n wye verskeidenheid kommersiële,
finansiële en vermaakdienste. Die kossaal het sitplek vir 1 200 studente,
en die verskillende kos- en kitskoswinkels het iets vir elke smaak, van
volledige tuisgekookte etes tot ligte maaltye en wegneemkos. Daar is ook ’n
aantal koffiewinkels, avontuur- en reiswinkels, gesondheid- en
skoonheidswinkels, boekwinkels, ’n geriefswinkel, ’n wassery, klereboetieks,
heelwat geskenkwinkels en ’n paar akademiese en sakedienste. Jou studentekaart
bied jou toegang tot die fotostaatmasjiene in die fotokopieerkamer in die
Neelsie. Standard Bank, Absa Bank, Nedbank en Eerste Nasionale Bank (FNB) het
boonop takke in die sentrum. Absa bied valutadienste. Jy kan by enige van
hierdie banke ’n rekening open en die kitsbankfasiliteite gebruik.
Banktye:
Nedbank
Maandag tot Vrydag 09:00 – 15:30
Standard Bank
Maandag tot Vrydag 09:00 – 15:30
Saterdag 08:30 – 11:00
Absa Bank
Maandag tot Vrydag 08:00 – 15:30
First National Bank
Maandag tot Vrydag 09:00 – 15:30
Wat het ek nodig om ’n bankrekening te open?
- Paspoort
- Bevestigingsbrief dat jy by die Universiteit geregistreer is (te key by US Internationaal)
- Bewys van woonadres
Op die boonste verdiepings van die Neelsie is daar 'n danssaal, twee eetsale, die kantore van die Studenteraad, verskeie klubs en verenigings, die redaksiekantoor van die studentekoerant Die Matie, 'n uitsaai-ateljee vir die kampusradiostasie MFM (skakel in by 92.6 FM), 'n donkerkamer vir die Fotografieklub, en 'n restaurant.
Die Matieland-poskantoor is ook in die Neelsie geleë.
Poskantoortye:
Maandag, Dinsdag, Donderdag en Vrydag 08:30–16:30
Woensdag 09:00–16:30, Saterdag 08:00–12:00
Pos word 13:00 op weeksdae gehaal.
