Hibriede leer (HL) is die haalbaarste en kostedoeltreffendste onderrigmetode vir die US se toekomstige groei in studentesyfers. Die teikenmark is (inter)nasionale studente in die werkplek wat deur middel van kort blokkontaksessies met US-akademici studeer, gekombineer met 'n groot komponent van aanlyn leer. Hierdie SF-aansoek is vir die vestiging van 'n oorkoepelende HL- institusionele kapasiteit by die US wat spesifieke MH-programme van die fakulteite vir die tydperk 2020-2025 kan ondersteun.    

Die nuwe Nagraadse Diploma in Strategiese Menslike Hulpbronbestuur is gerig op die strategiese bevoegdhede van MH-leiers in die lewering van besigheidswaarde ter nastrewing van die algehele besigheidsdoelwitte van 'n organisasies. Die program is met behulp van insette deur top MH-direkteure, sakelui en denkleiers ontwerp om 'n toonaangewende, strategiese benadering tot die beste MH-praktyke te verseker – in ooreenstemming met die realiteite en kompleksiteite van die nuwe wêreld van werk. Hierdie program sal die Departement van Bedryfsielkunde as die leier in Strategiese Menslike Hulpbronbestuur in die bedryf posisioneer, en sal in die vraag in die mark voorsien wat oor die afgelope twee dekades verwaarloos is.    

Die SIB is 'n verspreide navorsingsnetwerk wat aan die biodiversiteit- en maatskaplike gevolge van biologiese indringing werk. Die sentrum is in 2004 gestig en het baat gevind by drie vyfjaartermyne van befondsing van die program vir DST-NRF Sentrums van Uitnemendheid (SVU) en beduidende medebefondsing deur die US, maar kom aan die einde van Maart 2020 voor die beëindiging van sy SVU-toelae te staan. Die doel sal wees om te verseker dat die belangrikste navorsingsfunksies en vennootskappe van die SIB by die Universiteit Stellenbosch gehandhaaf word en dat addisionele eksterne befondsing steeds verkry kan word. Oorbruggingsfondse vir 'n driejaartydperk sal die SIB in staat stel om verdere derde- en vierdestroominkomste te bekom.   

Die Universiteit Stellenbosch is in 'n unieke posisie, aangesien ons 'n hooggeagte vennoot van die Fraunhofer Gesellschaft in Duitsland is, met verskeie samewerkende navorsingsprojekte wat aan die gang is of reeds voltooi is. Die hoofdoel van 'n Fraunhofer-projeksentrum (FPC) is om samewerkende navorsingsprojekte tussen die 72 Fraunhofer-institute en die Universiteit Stellenbosch te fasiliteer. Die FPC sal 'n gesamentlike onderneming tussen die Fakulteit Ingenieurswese en die Fakulteit Natuurwetenskappe en, in die besonder, die Sentrum vir Hernubare en Volhoubare Energiestudies en die Waterinstituut wees, met sewe van die verwante Fraunhofer-institute binne die Waterstelsels- (SysWasser) en Energie-alliansies van die Fraunhofer Gesellschaft.    

Dit is 'n aansoek om befondsing om die ARUA SVU in Energie as die vlagskip-ARUA-inisiatief by die Universiteit Stellenbosch te vestig. Die befondsing waarom aansoek gedoen is, bring die SVU in aanmerking om aansoek te doen om aansienlike bedrae geoormerkte eksterne, internasionale befondsing (soos onderhandel tussen ARUA en die Verenigde Koninkryk se befondsingsliggaam vir navorsing en innovasie). Die fondse sal benut word om 'n voltydse direkteur aan te stel, navorsing- en netwerkaktiwiteite binne die breër ARUA-netwerk te inisieer, en om daadwerklike pogings aan te wend om toelae-aansoeke te skryf ten einde die sentrum finansieel volhoubaar te maak.   

Die Welgevallen-vernuwingsplan sluit in:    

1. Die US-VINPRO Wingerdprojek – die herontwikkeling van 5 ha asook 16 ha kommersiële wingerde, albei by Welgevallen en in samewerking met Vinpro, om die volhoubaarheid van die onderrig- en navorsingswingerde en die wynkelderwerksaamhede te versterk.
2. Die US-DE HEUS Suiwelnavorsingsprojek – vestiging van 'n gevorderde, intensiewe suiwelnavorsingseenheid by Welgevallen, in samewerking met die internasionale De Heus-groep.   

Hierdie voorstel is vir die opgradering van die Universiteit Stellenbosch Botaniese Tuin op die volgende gebiede:    

1. Konsolideer voortplanting- en buitenshuise groei-areas in 'n enkele ruimte, insluitende nuwe voortplantingsfasiliteite.
2. Ontwikkel nuwe laboratorium- en kantoorruimte binne die huidige gebou vir voortplantingsbeddens wat in onbruik is.
3. Vervang die retikulasie- en besproeiingsnetwerk van tuinboorgatwater, en ondersoek geleenthede om met alternatiewe bronne te vervang, soos nabygeleë ondergrondse dreineringswater.
4. Ontwikkel een groot, nuwe kenmerk, die klipdrupmuur wat ook die beplande opgradering van die restaurant sal bevoordeel.    

Die Universiteit Stellenbosch moet toesien dat ons 'n volhoubare watertoevoer uit verskillende bronne het. Die instelling verbruik 10% van alle drinkwater wat deur die Munisipaliteit Stellenbosch voorsien word en het dus 'n aansienlike impak op die Bolandstreek. Die Ertjieskloofdam by die Coetzenburg-sportvelde speel 'n strategiese rol om gedurende die somermaande 'n volhoubare watertoevoer vir hierdie velde te verseker. Hierdie bron word ook gebruik om brande in die berge en die omliggende Boland-areas te blus, en hierdie infrastrukturele bate speel dus 'n belangrike rol as deel van 'n reeks risiko- versagtende maatreëls in die Stellenbosch-area.   

Een van die verantwoordelikhede en sleutelprojekte van die Afdeling Strategiese Inisiatiewe is om die proses vir die integrering van Visie 2040 en Strategiese Raamwerk 2019-2024 (Fase 2 van die Strategiese Proses) binne en regoor die Universiteit Stellenbosch te dryf, te beplan en te implementeer. Dit behels eerstens die visuele uitrol van die verskillende elemente oor alle sektore van die instelling. Tweedens fokus dit op die daarstelling van die grondslag vir die integrering van waardes in die Universiteit deur vermoëns en bevoegdheid te ontwikkel, asook prosesse en strukture wat in die Universiteit veranker moet word.   

Die INTERINFO-stelsel is 'n inligtingbestuurstelsel wat omvattende aktiwiteite en aspekte ten opsigte van internasionalisering behels. Dit sal help met inligtingsbestuur en die beplanning van internasionalisering en sal kommunikasie en doeltreffende besluitneming met betrekking tot internasionalisering verbeter, en sodoende doelgerigte vennootskappe en inklusiewe netwerke verseker. Hierdie stelsel sal die huidige instrumente vir inligtingbestuur vervang wat deur die Sentrum vir Vennootskappe en Internasionaliseringsondersteuning gebruik word, naamlik 'n verouderde ACCESS-databasis en talle Excel-databasisse, en sal met ander inligtingbestuurstelsels by die US, insluitend die SUNStudent-inligtingstelsel, integreer. Dit sal 'n omvattende inligtingbestuurstelsel wees wat in die behoeftes van 'n uiteenlopende groep belanghebbendes sal voorsien en verskeie komponente sal dek, naamlik die vaslegging en berging van bestuursinligting; kliënteverhoudingsbestuur; databewaarplek; vennootskapsontwikkeling, en evaluering en verslagdoening. Die INTERINFO-stelsel sal ook doeltreffende verslagdoening oor strategiese bestuursaanwysers ondersteun. 'n Stelsel soos INTERINFO sal die US ook 'n mededingende voordeel in die HO-omgewing in SA en elders gee, aangesien geen ander soortgelyke omvattende stelsel tans bestaan nie.   

In sy strewe om 'n voorkeurwerkgewer te wees, is die US daartoe verbind om lewenslange leer te bevorder en die ontwikkeling daarvan te ondersteun as 'n leerorganisasie wat op sowel individuele as organisatoriese behoeftes reageer. 'n Behoefte bestaan om 'n platform vir personeelontwikkeling te vestig om meganismes en geleenthede aan werknemers te verskaf om vaardighede te ontwikkel ten einde tot die ontwikkeling van hulle beroep en loopbaan by te dra. Die platform sal personeel voorsien van inligting oor opleidingsintervensies en bevoegdhede wat aan hulle goedgekeurde persoonlike ontwikkelingsplan gekoppel is. Die platform sal vir verskeie aanlyn opleidingsintervensies voorsiening maak. Hierdie projek sal verskillende belanghebbendes regoor die US betrek, insluitende IT, asook omgewings wat vir personeelontwikkeling verantwoordelik is. Die bedrag wat benodig word, sal die koste vir die opstel van die platform vir personeelontwikkeling dek om aanlyn opleidingsprogramme te fasiliteer.    

Die tegnologie-ontwrigting van hoër onderwys – en veral bestuursopvoedkunde – het die afgelope vyf jaar aansienlik toegeneem. Die USB is tans 'n leier in hibriede en aanlyn leer aan die Universiteit, en ook in vergelyking met ander Suid-Afrikaanse bestuurskole. Toenemende mededinging van toonaangewende, wêreldwye bestuurskole verlaag egter die geleentheidskoste vir studente. Hierdie beduidende bedreiging vir die USB se markleierskap in gedigitaliseerde lewering moet verdedig word. Dié investering sal die USB in staat stel om die nodige infrastruktuur in te rig en om ondersteunings- en akademiese personeel te ontwikkel om sy hibriede leer en aanlyn samewerkingstelsels vir die tydperk 2020 – 2025 te ondersteun.   

Die Visuele Regstelling-projek sal visuele veranderinge op US-kampusse rig, spesifiek deur middel van nuwe kunsinstallasies, die verwydering of kontekstualisering van histories sensitiewe kuns en ander simbole, tekens op kampus, die benaming en herbenaming van geboue, lokale en ander fasiliteite en persele, die verbetering van toeganklikheid tot fasiliteite, ens. Dit sal die US help in sy strewe na transformasie in en deur visuele regstelling. Die Visuele Regstelling-projek beoog om onderrig en leer aan die US in te lig. Dialoog in onderrig- en leeromgewings oor visuele regstelling en die implementering daarvan is bedoel om kritiese bewustheid te ontlok oor projekte in visuele regstelling wat op kampus onderneem word.    

Die ACS is in 2017 gestig en het in 2018 die eerste Joint Schools in Africa-program met die fokus op ontluikende Afrika-vakkundiges geïnisieer. Dit is 'n natuurlike uitbreiding van die aktiwiteite wat vir die eerste keer in 2016 geïnisieer is deur die Stellenbosch-gebaseerde African Doctoral Academy (ADA) wat ook binne die ACS gesetel is. Die doel van die Joint Schools in Africa-program is om saam met strategiese vennote in Afrika ontluikende Afrika-vakkundiges te ontwikkel deur bekostigbare en gehalte- bevoegdheidsgebaseerde leer by vennootinstellings aan te bied om vakkundige ontwikkeling en loopbaanopleiding te verseker en te versterk. Die doel stem ooreen met die ACS se distale, beoogde uitkoms, naamlik om by te dra tot die ontwikkeling van die vasteland en sy mense deur nuwe en ontluikende vakkundiges wêreldwyd te verbind, en om geleenthede vir navorsing en onderrig- en leerontwikkeling in hoër onderwys te skep. Hierdie voorstel het ten doel om aan dié doelwit 'n hupstoot te gee en om voort te bou op die drie gesamentlike skole wat in Kenia en Uganda geloods is, asook die vennootskap met die PERIPERI School in Tanzanië.   

Die werklading van die US se vyf etiekkomitees het in afgelope jaar eksponensieel gegroei en het in 2018 altesaam 1 621 nuwe aansoeke behels. Die sluit lopende oorsigte soos vorderingsverslae, wysigings, ernstige nadelige gebeure en voorvalle in wat ook deur die NEK's en NEK-kantore nagegaan word. Die gebied van navorsingsetiek groei net só vinnig ten opsigte van kompleksiteit wat tot die lading van die NEK's bydra. Strategiese befondsing word gebruik vir:   

a) Die erkenning van die tyd en verantwoordbaarheidslas wat deur NEK-voorsitters gedra word deur sentrale befondsing vir hulle tyd te voorsien, tot tyd en wyl dié koste in die hoofbegroting opgeneem kan word;
b) 'n Verbeterde sentrale investering in NEK-bestuur regoor die vyf NEK's.
c) 'n Verbeterde investering in opleiding- en bewusmakingsprogramme, wat tot 'n kultuur van verantwoordelike navorsing bydra.    

Die Raad het op sy vergadering van 5 Mei 2014 'n vyfjaar-befondsingsvoorstel goedgekeur vir die Inligting-en-Kommunikasietegnologie (IKT)-projek om die akademiese aanbod by die Universiteit Stellenbosch te bevorder. Die projek is met die Institusionele Voorneme en Strategie 2013-2018 belyn met die fokus om toegang tot ons Universiteit te verbreed, die momentum van volhoubaarheid te handhaaf en ons samelewingsimpak te versterk. Die kernelemente van die projek het ingesluit: Uitbreiding van die reikwydte en rykheid van die akademiese aanbod; geherstruktureerde student-, finansiële en administratiewe prosesse en stelsels; die instaatstellende tegnologie en fisiese infrastruktuur, en 'n volgende-generasie-leer- en -onderrrigsentrum. Die Raad het 'n investering van R218,1 miljoen oor 'n vyfjaartydperk goedgekeur. Hierdie befondsing sal die balans van fondse dek wat vir hierdie projek benodig word.   

Ons huidige Adabas Natural- finansiële stelsel is in 1989 (so oud soos die internet) intern ontwikkel en het die einde van sy lewensiklus bereik. Die stelsel kan nie onderhou en opgegradeer word nie, aangesien die taal van programmering nie meer onderrig word nie en dit lei dus tot 'n vaardigheidstekort. Hierdie befondsing is vir die modernisering van die finansiële stelsel, wat bespoediging, prioritisering en voltooiing behels.   

Ons huidige Adabas Natural-studente-inligtingstelsel (SIS) is in 1989 (so oud soos die internet) intern ontwikkel en het die einde van sy lewensiklus bereik. Die stelseltegnologie is verouderd, vaardighede is skaars en belangrike ontwikkelings- en ondersteuningspersoneel tree binnekort af. Die US het die strategiese mandaat om toegang deur middel van toenemende buigsaamheid te verbreed – deur byvoorbeeld nietradisionele kursusse en programme, semesters en kwartale, hibriede leer, ens. te administreer. Die US vereis akkurate, intydse data wat deur middel van gebruikersvriendelike ontleding en paneelborde aangebied word om beter ingeligte en doeltreffende institusionele besluite te neem. Na afloop van 'n grondige keuringsproses (versoek om inligting en versoek om voorstelle), word ons huidige studente-inligtingstelsel vervang deur die Academia-oplossing wat deur Serosoft in Indië verskaf word. Dit sal al die vereistes/vermoëns vir die studentelewensiklus insluit, en die funksionaliteit kan ook ander US-stelsels vervang wat tans buite die sentrale SIS-stelsel gebruik word, waar van toepassing. Dit het die vermoë om op nuwe en snelveranderende sakevereistes te reageer, en om die US te voorsien van verbeterde verslagdoening- en ontledingsfunksies wat deur gebruikers self uitgevoer kan word. Die stelsel sal 'n beter algehele gebruikerservaring vir personeel en studente bied, met moderne koppelvlakke en toeganklikheid via enige elektroniese toestel wat toegang tot die internet het.   

Die ontwikkeling en uitrol van 'n strategie vir institusionele handelsmerkposisionering, die ontwikkeling van monolitiese handelsmerkargitektuur en 'n verfriste/nuwe visuele identiteit.   

Die ontwikkeling van 'n nuwe, doelmatige Universiteit Stellenbosch-webwerf, met die korporatiewe inhoud van die webwerf wat ook bygewerk word. Die nuwe webwerf sal 'n belangrike kanaal wees vir die implementering van 'n nuwe strategie vir handelsmerkposisionering, 'n verfriste visuele identiteit, asook die bou, versterking en beskerming van die US se reputasie.   

Die tweede gedeelte van befondsing hou verband met die versterk van die openbare betrekkinge- en eksterne komponent, kapasiteite en vermoëns van die US, met 'n spesifieke fokus op internasionale blootstelling. Die skepping van 'n instaatstellende bedryfsomgewing vir MFM-gemeenskapsradiostasie word ook as 'n belangrike kommunikasiekanaal in die vooruitsig gestel.    

Die Universiteit Stellenbosch (US) Skool vir Datawetenskap en Rekenaardenke (DiSeCT) is die Universiteit se gesamentlike reaksie op die land en vasteland se dringende behoefte aan meer kundigheid in datawetenskap en rekenaardenke. DiSeCT se waardeproposisie is om Suid-Afrika se mededingendheid in die 4de Industriële Revolusie te versterk. DiSeCT sal in die besonder die tuiste wees van hoogs interdissiplinêre inisiatiewe wat oor die grense van departemente en fakulteite strek en die volle akademiese projek sal dek. Voorbeelde sluit in, maar is nie beperk nie tot, die ontwikkeling van nuwe gemengdeleermodules, die loodsing van Bewys van Konsepte in Hoëprestasie-rekenaarkunde in vennootskap met bedryfsvennote, en die vestiging van 'n interne konsultasiediens om die navorsing- en ontwikkelingsgemeenskap, by die US en ekstern, te ondersteun. Hierdie strategiese 'high-rise'-projek is ontwerp om tot die US se posisionering as 'n toonaangewende, navorsingsintensiewe universiteit in en vir Afrika by te dra.   

SPL beoog om in 2021 die Nagraadse Diploma in Openbare Finansiële Bestuur (PGDipPFM – SAKO ID 71819) bekend te stel. Hierdie befondsing bestaan uit saadbefondsing vir die ontwikkeling van die leermateriaal en 'n aanlyn platform vir die lewering van die kursus vir die PGDipPFM, en om toe te sien dat geskikte personeel- en ander hulpbronne vir die eerste nuwe inname van studente in 2021 in plek is. Die verwagte voltooiingsdatum van die projek is 1 Januarie 2023.   

Die Gevorderde Diploma is by die aanvanklike konseptualisering en beplanning van die voorgraadse diploma (Volhoubare Ontwikkeling) ingesluit. Dit volg op die driejaar- voorgraadse diploma en is noodsaaklik vir artikulasie van die voorgraadse na die nagraadse diploma (Volhoubare Ontwikkeling).   

Die Gevorderde Diploma is in 2019 deur die Senaat goedgekeur. Die proses van ewekniebeoordeling is deur die Komitee vir Hoëronderwysgehalte voltooi. Ons wag op Sako-registrasie en verwag dit teen Augustus 2020.   

Hierdie oorbruggingsbefondsing dek kurrikulumontwikkeling en ad hoc-onderrigkoste tot tyd en wyl onderrigsubsidies beskikbaar is en die bydrae van studentegelde groei.    

Hierdie befondsing verskaf aanvangskapitaal vir die gestruktureerde MSc in Masjienleer (ML) en Kunsmatige Intelligensie (KI) wat in die Afdeling Toegepaste Wiskunde gehuisves en gekoördineer word. Hierdie vooruitdenkende program bied 'n praktiese en onmiddellike manier om die Universiteit Stellenbosch strategies aan die voorpunt van 'n wêreldwyd belangrike navorsingsgebied te plaas, deur 'n groot groep navorsingstudente te lewer wat vertroud is met die gevorderde teorie en toepassing van ML en KI. Volhoubaarheid se projeksies dui daarop dat die program in sy derde jaar selfonderhoudend sal wees en beduidend sal groei.   

Hierdie aansoek is om saadbefondsing om 'n Duits-befondsde loodsprojek (GMCC) te ondersteun wat ten doel het om fondse te benut om 'n omvattende digitale navorsingsdatabasis vir musiek in Suider-Afrika (MUSA) te skep. Digitale aanlyn katalogusse, gedigitaliseerde bronne en literatuur het algemene instrumente vir navorsing geword. Die Universiteit Stellenbosch sal deur die ontwikkeling en huisvesting van die MUSA-databasis, wat 'n baanbrekertaak is, die geleentheid kry om die leiding te neem in die posisionering van musiekkennis in digitale geesteswetenskappe in Suider-Afrika, of moontlik in Afrika as geheel. MUSA het die potensiaal om nie net een van die belangrikste platforms vir navorsing oor musiek in Suider-Afrika te word nie, maar ook 'n model vir soortgelyke projekte in ander dissiplines van die geesteswetenskappe.   

Die dorp Genadendal, met sy velerlei en komplekse historiese samelope (kolonisasie, musiekgeskiedenis, apartheid, ens.), is 'n hoogs beduidende brandpunt vir kulturele oordrag. Die musiekversamelings van die Morawiese Sendingmuseum weerspieël dit. GMCC leen hom daartoe om as 'n loodsprojek vir die omvattende MUSA-databasis te dien. MUSA sal in 'n deurlopende proses uiteindelik tot 'n aanlyn ensiklopedie van musiek in Suider-Afrika groei.    

Die interne ouditbevindinge (Deloitte-verslag gedateer Augustus 2016) dui op verskeie swakhede in ons bestaande kontroles ten opsigte van eksamensekuriteit. Hierdie aansoek behels befondsing om deur die implementering van strenger sekuriteit en innoverende prosesse aandag te skenk aan die sekuriteit- en reputasierisiko's wat met assesserings gepaard gaan. Die US is tans nie in staat om beveiligde digitale akademiese rekords doeltreffend uit te reik nie. Weens die huidige pandemie kan die US ook nie enige amptelike akademiese rekords uitreik nie, gegewe die stelselbeperkings wat ons kliëntetevredenheid ernstig beïnvloed. Hierdie aansoek is dus om befondsing om deur die implementering van 'n geskikte digitale oplossing sekuriteitsmeganismes en dienslewering met die digitalisering van akademiese rekords te verbeter.   

Die befondsing sal ons pogings ten opsigte van risikomatiging en digitalisering ondersteun, asook die studente-ervaring en personeelwelstand verder verbeter. Die befondsing sal die US uiteindelik aan die voorpunt van innovasie op hierdie gebied plaas.    

KMR-spektroskopie is van kardinale belang vir alle chemieverwante navorsing. Die huidige toerusting by die US is in 'n droewe toestand, aangesien die vervaardiger van die instrumente in 2014 sy aktiwiteite by KMR-spektroskopie gestaak het, insluitend die ondersteuning van bestaande toerusting. Onherstelbare ineenstorting van verouderde toerusting is net 'n kwessie van tyd.   

Benewens 'n aansoek aan die Nasionale Toerustingprogram (NTP, NNS) van R10m en ooreengekome bydraes deur die Fakulteit Natuurwetenskappe (R10m) en ALE-fondse (R10m), word 'n investering van die Strategiese Fonds aangevra om die benarde toestand van die KMR-spektroskopiefasiliteite by die Universiteit Stellenbosch te verlig.    

Leeslyste was nog altyd 'n noodsaaklike onderrig- en leerinstrument. Die toename in elektroniese en digitale materiaal en oplossings, soos leerbestuurstelsels (LBS), beteken egter dat daar weer na huidige praktyke gekyk moet word om 'n makliker, doeltreffender en meer betroubare manier te vind om hulpbronlyste saam te stel en te bestuur; om dit aan studente beskikbaar te stel en om studente in staat te stel om dit te gebruik. By die Universiteit Stellenbosch bied die meeste kursusse tans nie 'n omvattende en eerste-oogopslag-opsomming van alle leeslyste nie. Sommige leeslyste is slegs in gedrukte formaat beskikbaar, wat in die huidige paradigma van kontaklose leer of e-leer 'n uitdaging is.   

Om studente te help om sin hiervan te maak, moet leeslyste deur die SUNLearn LBS gestruktureer, geannoteer en beskikbaar gestel word. Die biblioteek sal vir hierdie doel 'n kursusleeslysstelsel (Leganto) op die huidige infrastruktuur implementeer wat aan studente en dosente aanlyn toegang tot alle kursusmateriaal binne die bekende omgewing van SUNLearn sal voorsien.   

Die Translational Fellow (TF) Programme is 'n innoverende program wat daarop gemik is om die kommersiële potensiaal en waarde van die US se innovasie- en Intellektuele Eiendom (IP)-portefeulje te versterk en om sodoende die impak te verhoog van navorsing wat by die Universiteit Stellenbosch (US) gedoen word, en terselfdertyd aan onlangs gegradueerde nagraadse studente die geleentheid te bied om 'n pad van entrepreneuriese groei te volg.   

Hierdie befondsing implementeer 'n TF-program wat nagraadse studente befonds om ná graduering ten minste een jaar te spandeer om die volwassenheid van vroeë-stadium-innovasies te bevorder. Die program sal die waarde van die US se innovasiepyplyn en transaksievloei verhoog, terwyl innovasies vinniger gekommersialiseer kan word deur belangrike uitdagings in die proses van kommersialisering die hoof te bied.   

Die voorgestelde lesingreeks fokus op navorsing vir impak, genetwerkte en samewerkende onderrig en leer, en doelgerigte vennootskappe en inklusiewe netwerke. Dit spruit uit die HOPE-projek se inisiatief oor voedselsekerheid wat aanleiding gegee het tot die interdissiplinêre MSc-programme in voedsel en voeding, en navorsingsprojekte binne die Southern Africa Food Lab. Die voetspoor sal oor die fakulteite van AgriWetenskappe, Ekonomiese en Bestuurswetenskappe en Geneeskunde en Gesondheidswetenskappe strek, en by organisasies in die openbare en private sektor regoor Afrika.   

Dit sal die vorm van 'n hoëvlak-, dialogiese lesingreeks aanneem, waar innovasies deur belanghebbendebetrokkenheid en volgehoue deelname geïdentifiseer en gerealiseer word, om sodoende te verseker dat toegang tot hierdie kennis deur uitreik- en kommunikasie-aktiwiteite verkry word. Dit sal denkleiers byeenroep om gesprekvoering te lei en deur die ontwikkeling van werkswinkels en kort kursusse van strategiese belang kontinuïteit te verseker.   

Die US se Fakulteit Regsgeleerdheid herdenk in 2021 sy eeufees. As deel van hierdie viering sal die fakulteit die African Human Rights Moot Court-kompetisie aanbied om sy verbintenis tot transformasie, diversiteit en menseregte ten toon te stel. Hierdie hoëprofielgeleentheid sal 250 vakkundiges, studente, regters en regspraktisyns van regoor Afrika na Stellenbosch bring.   

Die Moot-kompetisie is 'n hoëvlak-, strategiese projek wat al ses strategiese doelwitte wat in Visie 2040 uiteengesit word, bevorder. Dit bied 'n unieke geleentheid vir die US om tot die breër menseregte-opvoedkunde op die vasteland by te dra en sal 'n blywende impak op die US se Afrika-netwerke hê.   

US Techpreneurskapsentrum poog om die sinergieë te benut wat tussen tegnologie en entrepreneurskap bestaan. Die US Techpreneurskapsentrum sal die Universiteit Stellenbosch se kundigheid in datawetenskap en sake-inkubasie benut om entrepreneuriese aktiwiteite te bevorder deur studente van 'n pragmatiese leeromgewing te voorsien. Dit sal hulle in staat stel om vaardighede te ontwikkel en om ná graduering werkplasing by maatskappye te kry.   

Die US Skool vir Datawetenskap en Rekenaardenke sal 'n koderingsprogram ondersteun en ontwikkel, terwyl die US LaunchLab deur sy inkubasieprogram op entrepreneurskap, innovasie en sakebeginsels sal fokus. Die resultaat sal 'n inspirerende, pragmatiese, entrepreneuriese inisiatief vir alle US-studente wees.   

Fondse word vir infrastruktuurontwikkeling voorsien om 'n hidrogeologie-veldkursus saam te stel. Die voorstel stem ooreen met die land se onmiddellike behoefte aan prakties geskoolde personeel vir die volhoubare gebruik en bestuur van toenemend skaars waterbronne in 'n veranderende klimaatsopset, en is deel van die departementele strategie om aanbiedinge in geo-omgewingswetenskappe uit te brei. Die voorgestelde veldkursus sal ons program internasionaal mededingend maak en sal navorsing- en onderrigsinergieë tussen akademiese en bedryfsbelanghebbendes ontwikkel.   

Covid-19 en die skuif na ERTLA en ARTLA het klem gelê op die kritieke belang van assessering, die gepaardgaande uitdagings en risiko's, en die enorme voordele vir studente as dosente daarin slaag om dit reg te kry.   

Hierdie projek versoek ondersteuning van die Strategiese Fonds vir 'n driejaarprojek om veranderinge in kultuur en praktyke deur middel van 'n vakkundige, stelselmatige benadering te prioritiseer en te versnel, in ooreenstemming met die beginsels van die nuwe Assesseringsbeleid (2021).   

As die Eenheid vir Strategiese Kommersiële Projekte binne SunCom, het Innovus die behoefte geïdentifiseer om 'n sentrale borgskapkantoor vir die US te vestig, met die doel om die sentrale punt van kontak, fasilitering en volledige bestuur van alle borgskapverwante aangeleenthede en aktiwiteite by die Universiteit Stellenbosch te word. Die projek poog om borgskap as 'n gewaardeerde kommersiële bydraer tot die US se vyfde inkomstestroom te optimaliseer, terwyl alle gepaardgaande reputasie-, finansiële en ander risiko's vir die US gematig word.   

Die jaarlikse US Opedag is 'n universiteitswye bemarkingsgeleentheid wat voornemende studente vir voorgraadse studies werf en die aansoeksiklus aan die gang kry. Dit was gewoonlik (voor die pandemie) 'n geleentheid op die kampus, maar is in 2021 weens die Covid-19-pandemie aanlyn aangebied. Die aanlyn Opedag was 'n reuse-sukses en het dubbel die getal studente van regoor die wêreld bereik. Die US sal vanaf 2022 'n hibriede benadering tot die Opedag volg met die aanbieding van 'n geleentheid op die kampus, tesame met 'n aanlyn geleentheid. Hierdie oorbruggingsbefondsing sal die struktuur van die hibriede Opedag in staat stel om oor die volgende drie jaar pos te vat.    

Entrepreneurskap sal 'n faktor wees wat die sukses of mislukking van Afrika bepaal. Die Universiteit Stellenbosch het 'n unieke geleentheid om homself in Afrika se toonaangewende entrepreneuriese middelpunt te omskep deur te investeer in 'n samewerkende voorstel tussen die Universiteit Stellenbosch Bestuurskool, Innovus en die Universiteit Stellenbosch.   

Die US kan Afrika se middelpunt vir entrepreneuriese navorsing, innovasie, onderrig, investering en suksesvolle beginnerondernemings wees deur die volgende aksies te onderneem: Koördinering van die talle entrepreneuriese aktiwiteite, die vestiging van 'n "University Start-up Lab (USL)", en die benutting van strategiese befondsing (A) as 'saadbefondsing' om 'n lewensvatbare en volhoubare sakemodel vir die gekoördineerde entrepreneurskapspoging regoor die Universiteit te definieer.   

Hierdie voorstel behels 'n kapitaalinvestering in die vestiging van 'n toegewyde e- sport- en speellokaal as die primêre basis vanwaar strategiese institusionele e-sport- en verwante inisiatiewe nagestreef kan word. Die inisiatief stel 'n samewerkende poging tussen Innovus en Maties Sport voor en is daarop gerig om munt te slaan uit die potensiaal wat e-sport met betrekking tot die lewering van spesifieke institusionele doelwitte inhou.   

Die US beskik oor erkende institusionele kundigheid op die gebied van plantgesondheid en gewasbeskerming (naamlik plantpatologie, mikrobiologie, virologie, entomologie en onkruidwetenskap). Plantsiekte- diagnostiese dienste, in samewerking met opleiding- en navorsingsprogramme, vorm deel van die aanbod van die meeste vooraanstaande landboufakulteite wêreldwyd.   

Die Plantsiekte-kliniek van die Departement Plantpatologie bied 'n geleentheid om in samewerking met toonaangewende bedryfsvennote 'n selfonderhoudende, kommersiële dienssentrum te ontwikkel. Die voorgestelde uitbreiding en kommersialisering van die Plantsiekte-kliniek behels hervestiging vanaf die hoofkampus (Lombardi-gebou) na doelgeboude fasiliteite by die Paul van der Bijl-laboratorium op Welgevallen.   

Die doel met die stigting van die Skool vir Klimaatstudie is om transdissiplinêre akademiese kapasiteit vir intellektuele en toegepaste sintese tussen die klimaatverwante kennisstelsels van die fakulteite van die US te skep. Die potensiële rol van die US geniet erkenning deur die Global Alliance of Universities on Climate wat 'n klein groep vooraanstaande universiteite regoor die wêreld bymekaarbring. Die doel is om die verskillende aktiwiteite op hierdie gebied by die US te koördineer en te integreer en om 'n platform te bied vir samewerkende leer en navorsing, asook die ontwikkeling van kennis.   

SACEMA het 'n geskiedenis van uitnemendheid, inklusiwiteit en innovasie wat oor 15 jaar strek, en bied in Afrika 'n omgewing van wêreldgehalte vir leer, navorsing en impak op die gebied van epidemiologiese modellering en ontleding.   

Die doel van hierdie toekenning is vir SACEMA om:   

a) van 'n DSI-NNS Nasionale Sentrum van Uitnemendheid na 'n Universiteit Stellenbosch Tipe II-sentrum om te skakel;
b) binne die nuwe Skool vir Datawetenskap en Rekenaardenke te herposisioneer; en
c) die befondsingsmodel wat op kernbefondsing steun, te verander van 'n enkele instelling tot 'n gediversifiseerde portefeulje van befondsde projekte.   

Die Universiteit Stellenbosch het by 'n wêreldwye tendens aangesluit om aansienlik op die gebied van volhoubaarheid in kapasiteitsbou te investeer. Dit is deel van die instelling se algehele doelwit om homself te posisioneer as die toonaangewende, wêreldwyd-erkende, navorsingsintensiewe universiteit op die Afrika-vasteland.   

Hierdie aansoek is om befondsing ter ondersteuning van die ontwikkeling van 'n samehangende stel nagraadse opleidingsprogramme om hierdie navorsingskrag en strategiese voordeel te ondersteun en te benut. Dit is soortgelyk aan inter- en transdissiplinêre nagraadse opleidingsprogramme in volhoubaarheid wat deur ander toonaangewende internasionale navorsingsuniversiteite ontwikkel word.   

Hierdie nuwe program sal voortbou op bestaande PGDip-, MPhil- en PhD-programme by die CST, en is daarop gerig om hierdie programme te ontwikkel, te herposisioneer en te voorsien van 'n handelsmerk op die gebied van snel-ontluikende en hoogs beleidsrelevante volhoubaarheidsoorgange.   

Die program sal binne die nuwe Tipe 2-Sentrum vir Volhoubaarheidsoorgange (CST) binne EBW gehuisves wees, maar het ten doel om 'n aantal volhoubaarheidsgerigte eenhede regoor die kampus te bedien, insluitend die nuutgeskepte Skool vir Klimaatstudies.   

Hierdie inisiatief sal op die nuwe en opwindende gebied van groen (hernubare) waterstofingenieurswese 'n navorsingsvoetspoor by die Universiteit Stellenbosch vestig, verstewig en bevorder, insluitend die produksie, berging en vervoer, die benutting en die stelselintegrasie van groen waterstof. Hoewel waterstof as 'n studieveld goed gevestig is, het die belangstelling in veral die produksie van groen waterstof as 'n kritieke deel van die pad na ontkoling onlangs groot aandag getrek. Die Universiteit Stellenbosch se platform vir navorsing in waterstofingenieurswese is dus daarop gerig om 'n naam vir homself te maak en internasionaal aan te sluit by die navorsing oor groen waterstofingenieurswese, en om befondsing te bekom deur aktief aan internasionale oproepe om befondsing deel te neem.   

Die Universiteit Stellenbosch se platform vir Identiteit- en Toegangsbestuur (IAM) het dringende vernuwing nodig. Die bestaande platform loop 'n risiko van:   

1) uitbuiting van kubersekuriteit;
2) gebrek aan funksionele kapasiteit deur die vervanging van verouderde SIS; en
3) onvoldoende bestuur deur 'n derde party.   

Die IAM-stelsel bied toegang tot die Universiteit aan 5 000 MH-personeellede, 5 049 derdeparty-aanstellings, 32 189 aktiewe ingeskrewenes vir 'n volle graad, 6 232 deelnemers aan kort kursusse en meer as 210 000 alumni. IAM is op een of ander manier betrokke by elke eindgebruiker, sakeproses en inligtingstelsel, toepassings en komponente van infrastruktuur. IAM se reikwydte is dus omvattend en as die Universiteit sy digitale aspirasies wil verwesenlik, is IAM 'n belangrike instaatsteller.   

Die MaRooN (Maties-risiko van nieoordraagbare siekte) Gesondheidspaspoort is 'n interaktiewe instrument wat deur die Universiteit en sy Institusionele Komitee vir Gesondheid en Welstand geïdentifiseer is om gesondheid en welstand te assesseer en, deur middel van ingebedde algoritmes, vroeë intervensies in die personeel- en studentebevolking van die US oor alle kampusse te fasiliteer.   

Dit sal terselfdertyd help om 'n veiliger omgewing op kampus te skep en die strategiese doelwitte van die US bevorder. Hierdie inisiatief vervul ook die sekondêre rol van 'n kragtige, longitudinale navorsing- en opvoedkundige instrument wat ondersoekers in staat stel om te assesseer of NCD-verwante risikoprofiele tussen die onderskeie kohorte verskil. Dit maak ook voorsiening vir die evaluering van die doeltreffendheid van intervensies en veranderinge aan die algehele gesondheidsprofiel van die US-kampus met verloop van tyd.   

Innovus word erken as 'n top TTO in Afrika. Plaaslike en internasionale universiteite en ander organisasies nader Innovus TTO gereeld om gesprekke te voer oor beste praktyke, hulp met personeelopleiding aan te vra, en om dienste te lewer wat met innovasie, kommersialisering en tegnologie-oordrag verband hou. Hierdie belangstelling dui op die kommersiële potensiaal om 'n afgeskeide eenheid te vorm om die Innovus IP en instrumente te kommersialiseer, soortgelyk aan Oxentia wat deur Oxford University Innovation gevestig is.   

Die projek het ten doel om:   

1) Innovus se tegnologie-oordrag IP en instrumente te kommersialiseer; en
2) Plaaslike en internasionale universiteite, wetenskaplike rade en privaat organisasies wat tans 'n gebrek aan kundigheid in innovasie, kommersialisasie en tegnologie-oordrag het, in staat te stel om hulle personeel se vaardighede uit te brei en om die prosesse en bevoegdhede te bekom wat vir suksesvolle innovasie, kommersialisasie en tegnologie-oordrag nodig is.   

Die oorkoepelende doelwitte van die projek is:   

1) Ontwikkel 'n produk- en diensaanbod op grond van Innovus se IP en instrumente.
2) Bied die produk- en diensaanbod aan kliënte.
3) Vestig 'n geoormerkte besigheidseenheid om die produk- en diensaanbod te kommersialiseer. Dit kan die vorm van 'n afgeskeide maatskappy (spinout company) aanneem.
4) Bou die besigheidseenheid op in 'n volhoubare en skaalbare besigheid.