OUTOMAATTEORIE, TALE EN TOEPASSINGS
Ons bestudeer probleme met betrekking tot outomate en tale, waaronder hoe om hierdie formalismes uit data te bepaal. Ons pas die teorie toe op praktiese probleme op die gebied van beeldverwerking, diagramvertolking, musiekskepping, soekmetodes vir gereelde uitdrukkings, en vele meer.
PROGRAMTOETSING EN -VERIFIKASIE
Ons onderneem toetsing, programontleding, simboliese uitvoering, probabilistiese simboliese uitvoering, logikagebaseerde tegnieke en modelkontrole vir sowel opeenvolgende as gelyklopende stelsels. Ons help ontwikkel ook die gewilde Java PathFinder-gereedskapstel, sowel as die CSeq- en ESBMC-instrumente wat op die ontleding van gelyklopende en ingebedde sagteware konsentreer.
KUNSMATIGE INTELLIGENSIE
Ons ondersoek verskeie aspekte van kunsmatige intelligensie, waaronder probabilistiese modellering en masjienleer, soekalgoritmes, evolusionêre berekening, en swermintelligensie. Toepassingsgebiede sluit in rekenaarvisie, natuurliketaalverwerking, robotika, en rekenaarspelers vir verskeie speletjies.
BREËBAND- EN MOBIELE NETWERKE
Ons bestudeer aansporingskemas om samewerking en prestasie in mobiele ad hoc-netwerke te bevorder en te verbeter. Protokolle vir dataversending in voertuiggebaseerde ad hoc-netwerke word ook ondersoek, sowel as die gedrag van die Bitcoin-blokketting, en die winsgewendheid van verskillende oneerlike dataontginningskemas.
BEREKENING EN SAMELEWINGSIMPAK
Hierdie interdissiplinêre navorsingsgebied kombineer Rekenaarwetenskap op interessante maniere met verskillende ander vakrigtings. Dit gaan oor die verkenning van ’n ekosisteem wat bestaan uit oorvleuelende, iteratiewe fases van gemeenskapsgebaseerde behoeftebepaling, gevolg deur die gesamentlike ontwerp en beplanning, die gesamentlike implementering en produksie, die gesamentlike toetsing, ontleding, monitering en evaluering en, laastens, die gesamentlike oordenking van inligtings- en kommunikasietegnologie- (IKT-)instrumente, in plaaslike tale en op plaaslike kulturele maniere, mét en déúr plaaslike gemeenskappe.
