Logistics
Welkom by Universiteit Stellenbosch

Kwantitatiewe Bestuur: Voorgraads

​Het jy al ooit gewonder hoe besigheidsvrae soos die volgende beantwoord word: Wat is die goedkoopste manier (of roete) om nuwe voertuie vanaf verskeie hawens na motorhandelaars te vervoer? Watter salarisprogram moet 'n maatskappy aankoop indien sy opsies verskil in prys, gebruikersondersteuning en gebruikersvriendelikheid? Hoe kan die kwaliteit van diens of 'n vervaardigde produk gemeet word? Hoeveel tellers moet die bank gebruik om die kliënte gelukkig te hou? 

Kwantitatiewe bestuur behels die gebruik van wiskundige modelle om probleme soos hierbo op te los om sodoende beter bestuursbesluite te neem en te ondersteun. Oplossings vir hierdie modelle word met behulp van die rekenaar verkry, getoets en dan op die oorspronklike probleem van toepassing gemaak. Die tegnieke kan toegepas word in ʼn wye verskeidenheid bestuursareas, bv. kwaliteitsbeheer, vooruitskatting van vraag, voorraadbeheer, produksiebestuur, en die skedulering van hulpbronne en personeel.


Loopbaangeleenthede

Ons afgestudeerde studente werk onder andere by finansieringsmaatskappye, produksieaanlegte en fabrieke, kettingwinkels, logistieke besighede, staatsdepartemente of semi-staatsorganisasies (soos die Departement van Waterwese en Bosbou, of Transnet-filiale). 'n Goeie opleiding in kwantitatiewe bestuur sal 'n persoon in staat stel om as 'n bestuurder met 'n kombinasie van bestuurs- en analitiese vermoëns 'n onderneming se bedryfsfunksies en -prosesse te ontleed, te bestuur en besluite kwantitatief te fundeer.


Raadpleeg asseblief die amptelike Ekonomiese en Bestuurswetenskappe Jaarboek vir meer inligting oor modulekombinasies en vereistes.