Ons jaarlikse Maties Tuiskomsnaweek vir alumni vind van Donderdag 8 September tot Saterdag 10 September 2022 op die Stellenbosch- en Tygerbergkampusse plaas. Ná twee jaar van inperking beloof vanjaar se geleentheid om iets besonders te wees.
Die Alumnikantoor het soos gewoonlik verskeie spesiale geleenthede beplan. Verwag netwerkgeleenthede, kampustoere, 'n sakeontbyt, sportaktiwiteite en baie kuier en gesels. Boonop bied nie minder nie as 11 koshuise gedurende die naweek verjaardagreünies aan en die eerstejaarsgroepe van 1971 en 1972, 1981 en 1982, 1991 en 1992, 2001 en 2002, 2011 en 2012 ontmoet op Stellenbosch en die 1982, 1992 en 2012 gegradueerdes van die Fakulteit Geneeskunde en Gesondheidswetenskappe kom op die Tygerberkampus bymekaar.
Hier's waarna jy kan uitsien:
Donderdag 8 September
'n Rondte gholf
Ons begin Tuiskoms om 11:00 met 'n gholfdag vir ons SWANE (die lede van ons Stellenbosch Vroue-alumnae Netwerk) by die Stellenbosch-gholfbaan. Ons sluit die dag se gholf af met 'n prysuitdeling gevolg deur 'n aandete, waartydens jy geleentheid sal kry om bekroonde wyne van ons wynmaker-alumni te geniet. Die koste is R3 600 per vierbal en die opbrengs gaan aan die US se Beursfonds.
Navrae: Marvin Koopman, marvin@sun.ac.za of Lauren Jimmy, ljimmy@sun.ac.za
Vrydag 9 September
Sakeontbyt
Ons is vroeg uit die vere vir 'n sakeontbyt om 09:00 by die Adam Small-teaterkompleks op Stellenbosch. 'n Paneel deskundiges sal gesels oor die tema “Bul of beer? Leiers se sienings oor die toekoms van die Suid-Afrikaanse ekonomie".
Toonaangewende denkers soos dr Patience Nombeko Mbava (voorsitter van die Suid-Afrikaanse Finansiële en Fiskale Kommissie), dr Marlene le Roux (uitvoerende hoof van Artscape) en Simon Susman, voorsitter van Conservation South Africa, president van Intercontinental Group of Department Stores, raadslid van vyf maatskappye en voorsitter van Woolworths Holdings Bpk, sal gedagtes uitruil. Dr Morné Mostert, strategiese vooruitskouingsadviseur en voormalige direkteur van ons Instituut vir Toekomsnavorsing, sal as moderator optree van wat beloof om 'n hoogs insiggewende gesprek te wees in die lig van die huidige uitdagings en geleenthede in sowel die Suid-Afrikaanse as die wêreldekonomie.
Kaartjies is beperk en kos R250 per persoon, wat 'n volledige Suid-Afrikaanse ontbyt by aankoms insluit. Die geleentheid word aangebied in vennootskap met die Stellenbosch Bestuurskool.
Matie Soirée
Maak jou oë toe en verbeel jou die Bolandse lente, heerlike kosgeure in die lug, en net die beste geselskap ... Kry nou jou vriende bymekaar en maak daardie verbeeldingsvlug 'n realiteit. Ons bied om 14:00 'n Matie Soirée in die Alumni-klubhuis by Die Stal aan.
In samewerking met nege wynplase en ons wynmaker-alumni bied ons 'n proesessie van hulle beste wyne aan. Vir diegene wat iets nie-alkoholies verkies, sal The Raw Berry Press ook daar wees om van hulle uithaler- koudgeperste sappe te bedien.
Terwyl jy met sowel bekende as nuwe gesigte kuier, bederf ons jou met 'n aand van eersterangse vermaak deur kunstenaars soos Koos Kombuis en ons bekroonde Universiteit Stellenbosch Koor. Snuffel ook gerus deur 'n skatkis van herinneringe by ons Matie Herinneringe-uitstalling.
Koste: R100 per persoon
Saterdag 10 September
Bergpad draf, stap of ry fiets
Kom vul jou longe met vars lug en kom aan die gang. Die feesvieringe gaan voort wanneer ons om 07:30 die asemrowende Stellenboschberg te voet, op 'n drafstap of op 'n fiets aanpak. Nie superfiks nie? Moenie bekommer nie, ons maak vir alle fiksheidsvlakke voorsiening, so bring jou vriende, gesin en troeteldiere, en kom geniet die pragtige uitsig oor die dorp. Verversings word ná die tyd by die Alumni-klubhuis bedien.
KLIK HIER vir die volledige Tuiskomsprogram. Enige vrae? Stuur gerus 'n e-pos aan homecoming@sun.ac.za of skakel +27 21 808 2710.
