Die Universiteit Stellenbosch (US) se Eenheid vir Gestremdhede het
dit nou vir personeel en studente makliker gemaak om Suid-Afrikaanse
Gebaretaal (SAGT) aan te leer deur sy SAGT-kursus gratis aanlyn
beskikbaar te stel vir die volgende vier weke.
Die aanlyn-aanbieding van hierdie gewilde kursus begin vandeesweek en sal kosteloos wees.
“Die
US se Rektor en Visekanselier, prof Wim de Villiers, het 2020 as die
Universiteit se Jaar vir Persone met Gestremdheid verklaar, maar terwyl
ons ons aktiwiteite vir die jaar beplan het, het ons voor die
COVID-19-pandeme te staan gekom,” sê dr Marcia Lyner-Cleophas, Hoof van
die Eenheid vir Gestremdhede in die US se Sentrum vir
Studentevoorligting en -ontwikkeling.
“Ons het nietemin
met ons beplanning voortgegaan, maar het ons aktiwiteite na die
kuberruimte verskuif. Omdat die Jaar vir Persone met Gestremdhede by die
US is, stel ons ’n vier weke lange reeks van twee SAGT-video’s per week
aanlyn beskikbaar waartoe enigiemand toegang kan kry om basiese
gebaretaal in hul vrye tyd te leer,” verduidelik Lyner-Cleophas.
Deelnemers
sal agt video’s gratis ontvang. Die SAGT-kursus sal aanstaande jaar
voortgesit word met ses sessies wat op die kampus aangebied sal word
teen ’n minimum koste van R120. Hierdie video’s sal verpligtend wees om
met die SAGT-kursus in 2021 te kan voortgaan.
Stuur ’n e-pos na disability@sun.ac.za om vir die kursus te registreer.
·
September is bewustheidsmaand vir doofheid in Suid-Afrika en is deel
van die Internasionale Bewustheidsmaand vir Doofheid. Die
Pan-Suid-Afrikaanse Gebaretaalraad (PANSAT) het vroeër vandeesmaand die
Handves vir Suid-Afrikaanse Gebaretaal bekendgemaak, gegewe die
grootskaalse gebrek aan toegang wat mense met doofheid steeds in
Suid-Afrika ondervind