Die verbreding van
toegang vir studente, versterking van navorsinguitnemendheid, versnelling van
transformasie van die personeelkorps en versekering van die relevansie van die
kurrikulum.
Dit is die vier
kernelemente wat prof Ingrid Woolard, nuutaangestelde dekaan van die Fakulteit
Ekonomiese en Bestuurswetenskappe aan die Universiteit Stellenbosch (US), as
die sleutel tot die voortgesette sukses van die fakulteit geïdentifiseer het.
Prof Woolard dien tans as
dekaan van die handelsfakulteit en professor in Ekonomie aan die Universiteit
van Kaapstad (UK). Sy volg prof Stan du Plessis wat vroeër vanjaar as aangewese
bedryfshoof by die US aangestel is, op.
Sy is die eerste vrou wat as dekaan in die 92-jarige geskiedenis van die
fakulteit aangestel word.
“Ek sien uit na die uitdaging om die US se grootste fakulteit te lei.
Die Fakulteit Ekonomiese en Bestuurswetenskappe is bekend vir sy
studentgesentreerde benadering en uitstekende resultate en ek is opgewonde om
by so ʼn toegewyde span aan te sluit.”
Die
US-Rektor en Visekanselier, prof Wim de Villiers, het Woolard se aanstelling verwelkom.
“Ons is
verheug dat sy by die US as Dekaan van die Fakulteit Ekonomiese en
Bestuurswetenskappe, ons grootste fakulteit, gaan aansluit. Sy is ʼn internasionaal
gerekende en gerespekteerde akademikus en sal verdere bestuurservaring na die
Universiteit bring. Sy sal ook betekenisvol kan bydra tot ons toekomsfokus soos
wat ons ons tweede eeu as ʼn toonaangewende openbare universiteit in Suid-Afrika
begin,” het hy gesê.
Ter toeligting van die vier kernelemente wat
sy geïdentifiseer het, het Woolard gesê:
“Ons moet harder druk om
toegang te verbreed en verbeterde finansiële steun en leerondersteuning aan
studente uit arm en gemarginaliseerde gemeenskappe te voorsien. En sodra ʼn student
toegelaat is, het ons ʼn verantwoordelikheid om ʼn omgewing wat studentesukses bevorder,
te voorsien. Die universiteit kan nie ʼn draaideur wees nie.”
Sy beskou ʼn vroeëwaarskuwingstelsel
– waarin studente wat risikogevalle is so vroeg moontlik geïdentifiseer word –
as ʼn belangrike element van hierdie strategie.
Woolard wil ook graag ʼn kultuur
van navorsinguitnemendheid in die Fakulteit kweek.
“Navorsing-‘supersterre’
moet erkenning kry en sodanig beloon word dat dit ander kollegas inspireer.
Akademiese personeel wat in die verlede nie besonder navorsingaktief was nie,
moet aangemoedig word om dit te doen deur die voorsiening van simpatieke
navorsingmentors wat help om hul vertroue op te bou en hindernisse te oorkom.
“As ons boonop meer
strategies oor nagraadse studieleiding dink, deur byvoorbeeld nader aan die ‘wetenskapmodel’
te beweeg waar studente met ʼn stel onderwerpe of temas werk wat deur die
navorsinggroep gekies is (eerder as met uiteenlopende onderwerpe wat deur
individuele studente gekies is), sal dit help om die reputasie van die
navorsingsgroep op te bou en die las op studieleiers te verminder.”
Woolard se eie
navorsingsbelange sluit in die meet van armoede en ongelykheid, werkloosheid,
maatskaplike beskerming en fiskale beleid.
Sy voel baie sterk oor
die transformasie van die personeelkorps en het verskeie suksesvolle strategieë
by UK geïmplementeer, onder meer ʼn maandelikse ontmoeting met swart akademiese
personeel om seker te maak dat die stem van hierdie groep gehoor word. Onder
haar leierskap is die posisie van adjunkdekaan: transformasie geskep en is daar
aangekondig dat ʼn geteikende gelykheidverklaring gebruik moet word wanneer akademiese
poste aanvanklik geadverteer word.
“Ons moet die
transformasieproses versnel deur aggressiewe werwingstrategieë te gebruik en
die kwessies van ʼn onwelkome institusionele kultuur aan te spreek,” het sy
verduidelik.
Wat betref die relevansie
van die kurrikulum, meen Woolard dat die Fakulteit meer werke deur
Afrika-vakkundiges by die kurrikulum moet insluit asook deurlopend moet verseker
dat die kurrikulum voldoen aan die vereistes van professionele liggame sowel as
die behoeftes van die openbare sektor.
Woolard sal op 1 Mei 2018
by die US aansluit.