Geweld
op grond van gender is ʼn beduidende dog voorkombare hindernis tot
geslagsgelykheid. In reaksie op die toenemende bedreiging van geweld van
hierdie aard in die land in die geheel het die Universiteit Stellenbosch die
instelling se zerotoleransie-benadering tot die saak tot ʼn nuwe vlak verhef.
Ten
einde hierdie kritieke saak te voorkom en te hanteer, het die Universiteit
onlangs aangekondig dat ʼn antigeslagsgeweld-reaksie daargestel sal word,
waarvolgens sake verbonde aan gendergeweld gekoördineer en gemoniteer sal word.
Die besluit volg op die vrystelling van die US se EndRapeCulture-verslag 2017.
Op
grond van die bevindinge en aanbevelings van die verslag, het die Eenheid vir
Gelykwaardigheid (EvG), wat by die Sentrum vir Studentevoorligting en ‑ontwikkeling
in die Afdeling Studentesake gesetel is, voorgestel dat ʼn portefeulje vir ʼn kultuur wat gendergeweld en verkragting
teenstaan, ingestel word om sommige van die groot uitdagings wat in die verslag
genoem is, te hanteer.
Volgens
mnr Jaco Greeff Brink, hoof van die EvG, sal ʼn toegewyde Antigeslagsgeweld-koördineerder
vir ʼn driejaartydperk met ingang Januarie 2018 aangestel word, wat sy/haar
dienste aan alle US-personeel en -studente beskikbaar sal stel.
“Een
van die vernaamste funksies van hierdie portefeulje is om met ʼn omvattende
institusionele aksieplan vorendag te kom wat die kultuur van gendergeweld en
verkragting by die US betref”, sê Brink. Hy voeg by dat die US-bestuur se goedkeuring
van hierdie nuwe pos ʼn aanduiding is dat hulle die bekamping van genderweld en die
beëindiging van verkragtingskultuur as strategies belangrik vir die US beskou.
Brink
voeg by dat die aanstelling van ʼn koördineerder slegs gehoor gee aan een deel
van die verslag se aanbevelings, maar sê dat strategiese vennootskappe met
ander belangrike rolspelers,
wat die Transformasiekantoor, Menslike Hulpbronne, Kampussekuriteit en ʼn
voorgenome moniteringskomitee insluit, in die toekoms gevorm sal word.
“Dit
is uiters krities in ons gedeelde verantwoordelikheid en reaksie rakende
diepgaande kwessies met betrekking tot gendergeweld”, sê hy.
Die
nuwe portefeulje sal onder beskerming van die EvG staan, wat ʼn kollektiewe
benadering tot sosiale geregtigheid en diskoers oor sosiale ongelykwaardigheid by
die US bevorder. Die EvG gaan uit van die standpunt dat ʼn proses van billikheid
nodig is om groter gelykheid in die samelewing te bewerkstellig. Die eenheid
koördineer ook aanmeldings oor onbillike diskriminasie en teistering en
implementeer ook ʼn omvattende institusionele MIV/vigs-reaksie.