Rektor en Visekanselier

Prof Deresh Ramjugernath, die 13de Rektor en Visekanselier
van die Universiteit Stellenbosch, het 1 April 2025 amptelik sy nuwe amp aanvaar.

Ramjugernath, 'n gesoute en hoogs ervare hoëronderwysleier met uitgebreide
senior uitvoerende ervaring in die sektor in Suid-Afrika, dien sedert Januarie 2021
as die Viserektor: Leer en Onderrig aan die US.

Voordat prof Deresh Ramjugernath na Stellenbosch verhuis het, was hy Viserektor: Navorsing en Pro-Visekanselier: Innovasie, Kommersialisering en Entrepreneurskap by die Universiteit van KwaZulu-Natal (UKZN).

Hy beskik oor uitgebreide direksie- en bestuurservaring nadat hy op verskeie maatskappydireksies en organisasierade gedien het.

Ramjugernath is 'n hoogsgerekende wetenskaplike op die gebied van chemiese ingenieurswese en spesifiek in chemiese termodinamika en skeidingstegnologie (hy het op 31-jarige ouderdom die jongste volle professor in sy vakgebied in Afrika geword). Hy het tot 2018 die DWT/NNS Suid-Afrikaanse Navorsingsleerstoel (SARChI) vir Fluoorprosesingenieurswese en Skeidingstegnologie beklee.

Hy was die studieleier vir meer as 130 meestersgraad- en PhD-studente wat gegradueer het en het meer as 20 postdoktorale genote gelei. Daar het al meer as 350 eweknie-beoordeelde vaktydskrifartikels deur Ramjugernath verskyn en hy het al het ten minste 300 referate by internasionale konferensies aangebied.

Ramjugernath het aan UKZN studeer en die grade BSc Ing (Chemies) in 1993, MSc Ing (Chemies) wat in 1995 opgegradeer is na 'n PhD, en 'n PhD in Chemiese Ingenieurswese in 2000 verwerf.

Prof Ramjugernath woon op Stellenbosch saam met sy vrou, prof Prathieka Naidoo, 'n bekwame akademikus in eie reg, en hulle drie dogters. Behalwe dat hy 'n hondeliefhebber en 'n ywerige sportliefhebber is wat tennis, padel en gholf speel, is Ramjugernath lief vir die buitelewe.

Akademiese uitnemendheid

"Een van ons grootste uitdagings sal ongetwyfeld volhoubaarheid wees. Dit sluit finansiële, maatskaplike en omgewingsvolhoubaarheid in. Kwessies rondom finansiering – veral NSFAS en studenteskuld – is destabiliserend. Daarmee saam gaan die wanopvatting dat 'n universiteitsgraad die enigste pad na sukses is, wat universiteite verder belas. Terselfdertyd moet universiteite meer doen om gegradueerdes nie net met tegniese kennis toe te rus nie, maar ook met vaardighede, bevoegdhede en eienskappe vir indiensneembaarheid. Daarom sal ons akademiese vernuwing by die US voortsit.

"En 'n groot deel hiervan sal die idee van toekomsbestendigheid deur tegnologie wees. Dit is nie opsioneel om kunsmatige intelligensie, digitale transformasie en hibridiese leer te omarm nie – dit is noodsaaklik. Dit is die enkele grootste geleentheid om hoër onderwys te verbeter."

Die feit dat hy die afgelope vier jaar vir die portefeulje van studentesake verantwoordelik was, het hom bykomende insig in die lewens van studente gegee.

“Ons wil 'n akademiese omgewing skep waar elke student, ongeag hulle sosio-ekonomiese agtergrond, die nodige hulpbronne, mentorskap en geleenthede het om te kan floreer. Ek glo universiteite moenie net opvoed nie, maar ook bemagtig om te verseker dat elke student tot Suid-Afrika se ontwikkeling, ekonomiese groei en algehele welstand kan bydra.

Daarom strek ons verbondenheid verder as akademiese prestasie. Terwyl ons werk om groter skenkerfinansiering te bekom, nuwe vennootskappe te sluit en bestaande vennootskappe te versterk, is ons daartoe verbind om 'n toekoms te bou waar elke student toegang tot holistiese ondersteuning het – akademies, finansieel, sielkundig en professioneel. Hierdie omvattende benadering tot studentesukses weerspieël ons oortuiging dat onderwys nie bloot 'n pad na indiensneming is nie, maar 'n katalisator vir positiewe sosiale verandering.”

Mense, kulture en prosesse

"Die wêreld – en daarmee saam die wêreld van werk – is besig om te verander. Daarom wil ek ook op die bevordering van 'n vermenslikte en bemagtigende kultuur by die Universiteit fokus. Ek wil mense, kultuur en stelsels prioritiseer wat almal by die US sal laat floreer.

“Om die beste in mense na vore te bring, is 'n kwessie van inter-, multi- en transdissiplinêre samewerking, meen Ramjugernath. "Van die grootste deurbrake wat ons nou sien, is die resultate van interdissiplinêre navorsing – deur 'n gevoel van spanwerk te bevorder. Dit is hoe ons die 'boosste probleme' in die wêreld aanpak.

Vennootskappe en volhoubaarheid

"Universiteite kan nie in isolasie floreer nie. Strategiese vennootskappe is die sleutel tot volhoubaarheid en open deure vir geleenthede. Ons moet ons verskillende inkomstestrome verder tot voordeel van alle vennote verhoog.

"Ek brei onder meer ons internasionaliseringsagenda uit. Dit gaan egter nie net oor samewerking met ander universiteite nie, maar ook met die regering, die burgerlike samelewing en nywerhede en bedrywe – beide plaaslik en wêreldwyd. Om dit te ondersteun, gaan ons 'n vennootskapskantoor stig om pogings te koördineer terwyl kampvegters regoor die Universiteit bemagtig word.

"Ons moet in dit alles nie ons unieke omgewing vergeet nie, sê Ramjugernath. "Ons is goed op pad om Stellenbosch as die innovasiehoofstad van Suid-Afrika te vestig – 'n Afrika-ekwivalent van Silikonvallei. In ons werk, ons onderrig, ons navorsing en ons sosiale impak moet ons 'n entrepreneuriese ingesteldheid inneem. In 'n groot mate is dit waaroor inklusiewe transformasie gaan – dit beteken om te behoort, verteenwoordiging en groei. Dit gaan oor die bou van 'n werklik diverse, inklusiewe, multikulturele en veeltalige instelling waar ons nooit selfingenome word nie, maar voortgaan om te verander, te verken en te ontdek. Transformasie gaan oor die bevordering van 'n kultuur wat die beste in almal na vore bring."

Kontak

Maretha Joyce
Persoonlike Assistent
 +27 21 808 4490
mjoyce@sun.ac.za

Mohamed Shaikh
Uitvoerende Bestuurder: Rektoraat

Chriszelda Adendorff
Persoonlike Assistent
+27 21 808 9353
chrisz@sun.ac.za