Die Instituut vir Wynbiotegnologie  – deel van die Departement Wingerd- en Wynkunde – is in 1995 aan die Universiteit Stellenbosch gevestig. Die IWBT is 'n internasionaal erkende nagraadse opleidings- en navorsingsinstituut wat visioenêre opleiding en innoverende navorsing bied om die Suid-Afrikaanse wyn- en wingerdbedrywe te onderskraag.

Die IWBT se navorsingsprogram handhaaf 'n globaal-unieke, geïntegreerde en multidissiplinêre benadering en kombineer voorpunt-, hoë-deurvloei en stelselgebaseerde benaderings, afkomstig van die kernwetenskappe van biologie en chemie, met die tradisionele wynwetenskappe wingerd- en wynkunde. Van die temas behels wingerdstok-ekofisiologie en molekulêre biologie; mikrobiese diversiteit, fisiologie en molekulêre biologie; analitiese chemie en berekeningsbiologie.

'n Akademiese bestuurspan staan aan die hoof van die IWBT en bykomende personeel bestaan uit deeltydse buitengewone akademici, ná-doktorale navorsers, sowel as tegniese, administratiewe en ander ondersteuningspersoneel.

Die IWBT is in die JH Neethling-gebou geleë en beskik oor verskeie moderne en ten volle toegeruste molekulêre en chemiese navorsingslaboratoria. Daar is ook 'n kweekhuis vir transgeniese, wingerdplante en 'n eksperimentele kelder. Die gebou huisves voorts die Sentrale Analitiese GC-MC-fasiliteit van die Universiteit Stellenbosch. Benewens lesingsale en konferensiekamers, trek studente en navorsers ook voordeel uit toegewysde studie-areas en skootrekenaars is op versoek beskikbaar aan studente.